Ձեր վստահելի աղբյուրը

ՀՀ վարչապետի կողմից հաստատվել է «Աշխարհի առաջատար բուհերում բարձրակարգ կադրերի պատրաստման նպատակով ՀՀ և սփյուռքահայ առավել օժտված երեխաների հայտնաբերման և նրանց այդ առաջատար բուհերն ընդունվելուն օժանդակելու ծրագրի հայեցակարգի» ժամանակացույցը: Հայեցակարգի հեղինակ, ֆիզիկամաթեմատիկական գիտությունների դոկտոր, ՀՀ ԳԱԱ թղթակից անդամ Արթուր Իշխանյանն այսօր տեղեկացրեց, որ հայեցակարգը վարչապետի կողմից հաստատվել է հոկտեմբերի 3-ին: Հիշեցնենք, որ այն ավելի վաղ արժանացել էր կառավարության հավանությանը և հաստատմանը:

Արթուր Իշխանյանն ասաց, որ այս ծրագրի իրականացման համար ստեղծվել է աշխատանքային խումբ և «Լույս» հիմնադրամ, որտեղ արդեն իսկ ներդրումներ են կատարել, հիմնակում` սփյուռքահայ բարերաները: Ծրագրի իրականացման համար պետբյուջեից տրամադրվել է 45 մլն դրամ: ԳԱԱ թղթակից անդամը հայտնեց, որ հայեցակարգի ընդունումից հետո ծրագրին մասնակցելու համար հիմնադրամ են ուղղվել բազմաթիվ դիմումներ: Արթուր Իշխանյանը հայտնեց, որ հոկտեմբերի 10-ին հայտարարվել է այս ծրագրի գործադիր տնօրենի թափուր պաշտոնի համար մրցույթ: Այժմ հայտեր են ընդունվում:

Ծրագրի հեղինակը տեղեկացրեց, որ կառավարության կողմից հաստատվել է հայեցակարգի միայն առաջին դրույթը, այն է` արտերկրի բուհերում սովորելու համար եռաստիճան կրթական համակարգի ուսանողներին տրամադրել կրթաթոշակ: Իսկ ավագ դպրոցների աշակերտներին արտերկրի բուհերում սովորելու համար կրթաթոշակներ տրամադրելու և հետկրթական ժամանակահատվածին վերաբերող ծրագրերը գտնվում են քննարկման փուլում: Նա վստահեցրեց, որ այս հայեցակարգը անցել է մի քանի փորձաքննություն, քննարկվել է անգամ ֆորումներում, բուհերի դասախոսների, պատգամավորների հետ, որոնք տվել են իրենց հավանությունը: Ըստ նրա, այս ծրագիրն ուղղված է առաջնորդների ձևավորմանը և «ուղեղների» արտահոսքի նվազեցմանը:

Արթուր Իշխանյանը նշեց, որ արտերկրում սովորելու համար ընտրվել է աշխարհի լավագույն բուհերի ցանկը: «Այդ բուհեր ընդունվելը բավականին դժվար է և հիմնականում այդտեղ ընդունվում են միջազգային օլիմպիադաներին մասնակցած ուսանողները: Ինչ վերաբերում է հայտերի ընտրությանը, ապա բոլոր դիմողներին հնարավորություն է տրվելու քննություններ հանձնել, իսկ ընդունվելու դեպքում ստանալ պետական կրթաթոշակ: Չի լինելու մասնագիտությունների ընտրության սահմանափակում»,- հավելեց նա:

Համաձայն հայեցակարգի, այն ուսանողները, որոնց տրամադրվել է կրթաթոշակ, պետք է յուրաքանչյուր տարի 1-ից 2 անգամ մոտ մեկ ամիս տևողությամբ այցելեն հայրենիք, մասնակցեն հայոց լեզվի, պատմության և մշակույթի ինտենսիվ դասընթացներին, նաև լսեն բազմաթիվ վերլուծական դասախոսություններ հանրապետության տարբեր գերատեսչություններում:
Նրա խոսքով, կոռուպցիոն ռիսկերը բացառելու համար, ծրագրից դուս են բերված պաշտոնյանինների կողմից որևէ գործառույթի կատարում: «Յուրաքանչյուր դիմումի գրացումից հետո 30 օրվա ընթացքում տեղեկացվում է քննություններին մասնակցելու մասին, որից հետո դիմողը կարող է հանձնել քննությունները»,- ավելացրեց նա:

Իսկ երաշխիքների մասին, որ հայ կամ սփյուռքահայ ուսանողը արտերկրում սովորելուց հետո կգա և կաշխատի Հայաստանում, Ա. Իշխանյանն ասաց.« Հայեցակարգում ներառված է հետբուհական ժամանակաշրջանի ծրագրիը: «Լույս» հիմնադրամը հանձն է առնում Հայաստանում եղած աշխատատեղերի համար մրցույթ կազամակերպել հենց այս ծրագրին մասնակցած անդամների համար: Եթե նրանք ընդունվեն աշխատանքի ապա հիմնադրմը 3-5 տարով տրամադրելու է գրանտ, որպեսզի այդ մարդու աշխատավարձը մրցունակ լինի միջազգային շուկայում»:

ԳԱԱ թղթակից անդամը հայտնեց, որ նման ծրագրի իրականացվում է նաև Վրաստանում և Ադրբեջանում: Այժմ արտերկրում Ադրբեջանից սովորում է 700, իսկ Հայաստանից միայն 80 հոգի: