Ձեր վստահելի աղբյուրը

Վիճակախաղ ՀԴՄ-ներով, վիճակախաղ` դեղորայքով: ՀԴՄ-ների դեպքում հասկանալի է` որոշում կա, իսկ ի՞նչ է անում առողջապահության նախարարությունը դեղերի վաճառքի ընթացքում իրականացող վիճակախաղերի դեպքում:

Առողջապահության նախարարի իրավական խորհրդական Սուրեն Քրմոյանը Panorama.am-ին հայտնեց, որ այս հարցում իրենք սկսել են դիմել «լուրջ քայլերի»:

«Իրենց դեղերի վաճառքը շատացնելու համար վիճակախաղի միջոցով փորձում են գովազդել այն: Տվյալ դեղը գովազդելու համար ընկերությունը նախ պետք է առողջապահության նախարարության թույլտվությունն ունենա, ու գովազդի տեքստում այդ փաստն անպայման պետք է նշվի: Այսօր մենք հայտնաբերում ենք այնպիսի դեպքեր, երբ առանց մեր թույլտվության... ինչ ասես արել են: Այդ իսկ պատճառով էլ սկսել ենք լուրջ միջոցներ ձեռնարկել` նմանատիպ ակցիաները, դեպքերը կանխելու համար»,-ասաց Ս. Քրմոյանը:

Նա նշեց, որ իրենք մամուլից իմացել են, որ դեղագործական «Լեկ» ընկերությունն իր արտադրած «Ամոքսիկլավ» մանկական անտիբիոտիկը գովազդելու համար նոր միջոց է գտել` վիճակախաղ: Ս. Քրմոյանը նշեց, որ իրենք արդեն զգուշացրել են այդ ընկերությանն ու արդեն տարբեր պոլիկլինիկաներում այդ մասին տեղյակ պահող գովազդային վահանակները հանվել են, «թեև դրանք փակցրել էին կրկին անօրինական»:

Ի դեպ, նա նշեց, որ հիվանդանոցներում արգելվում է բժիշկներին աշխատանքային ժամերին որևէ դեղ գովազդել, սակայն, ըստ մեր տեղեկության, վերջին օրերին բժիշկները մեծ շահագրգռվածությամբ հիվանդներին հենց այդ դեղն են առաջարկել:
Նշենք, որ «Ամոկսիկլավը» հակաբորբոքային դեղ է, ինչպես գրված է դեղի բաղադրատոմսում` միայն բժիշկների թույլտվությամբ կարող են օգտագործել:

Ընդհանրապես, ինչ վերաբերվում է դեղորայքի ու սննդի գովազդներին, ապա նախ այն գովազդող ընկերությունը կամ գովազդ պատվիրողը պետք է համաձայնության գա առողջապահության նախարարության հետ: «Դեղերի մասին» օրենքն արգելում է միայն դեղատոմսով թույլատրելի դեղերի գովազդը:

Իսկ ինչ վերաբերում է սննդին, ապա առողջապահության նախարարությունն այս տարվա հուլիսի 22-ից է իրավասություն ստացել հետևել դրանց գովազդներին: Ս. Քրմոյանը նկատեց, որ միայն իրենց ուսումնասիրությունից հետո կարող են տվյալ սնունդը գովազդել ու անպայման, ինչպես դեղերի պարագայում, պետք է նշեն առողջապահության նախարարության հետ համաձայնեցված լինելու փաստը:

Սակայն Panorama.am-ի այն դիտարկմանը, որ հուլիսի 22-ից հետո էլ ցուցադրվում են դեռևս մինչ այդ նկարահանված գովազդային տեսահոլովակներ, նա նշեց, թե «արդեն սկսել են միջոցներ ձեռնարկել` հեռուստաալիքներին, մամուլին տեղեկացրել են, որ սնունդ գովազդելու համար անպայման պետք է ունենան իրենց թույլտվությունը»:

Բայց մի՞թե ավելի ճիշտ չէր լինի, որ նախ արգելվեին սննդի հետ կապված բոլոր գովազդային տեսահոլովակների ցուցադրությունը, այնուհետև` ուսումնասիրելուց հետո, թույլ տային: Չէ՞ որ օրինապաշտ հայերիս պարագայում «հալած յուղի» տեղ կընդունվի` եթե օրենքը կա ու ցույց են տալիս` ուրեմն թույլատրված է:  

Դեղ, սնունդ: Անհրաժեշտ, բայց փաստորեն նաև` սպառնացող: Իսկ եթե մի բան այն չլինի՞: Վերջում միայն երևի նկատողություն կարվի անողին, վերջում կփնտրվի մեղավորը կամ վերջում հրահանգ կտրվի «այլևս չանելու»:

Էհ, էլի՞ հայի ետին խելք. Վերջներս` լավ: