Ձեր վստահելի աղբյուրը

Ո՞վ է պատասխանտու Վանաձորում ու Ալավերդիում բռնկված համաճարակի համար, ջրամատակարարում իրականացնող ընկերությունները, թե՞ առողջապահության նախարարությունը: Այս հարցերի պատասխանն առայժմ միանշանակ չէ: Panorama.am-ը խոսելով տարբեր կողմերի ներկայացուցիչների հետ փորձել է հնարավորինս պարզել հարցի պատասխանը:

Խմելու ջրի հսկողության վերաբերյալ ՀՀ ԱՆ նորմերի համաձայն, երկրում խմելու ջրի որակի նկատմամբ իրականացվում է արտադրական հսկողություն և պետական սանիտարահամաճարակային վերահսկողություն: Խմելու ջրի որակի արտադրական հսկողությունն ապահովվում է ջրամատակարարման համակարգի շահագործումն իրականացնող կազմակերպության կողմից: Պետական անիտարահամաճարակային վերահսկողությունը խմելու ջրի որակի նկատմամբ իրականացվում է ՊՀՀ տեսչության մարմինների կողմից` պլանային կարգով և սանիտարահամաճարակային ցուցումներով:

Panorama.am-ին «Երևան Ջուր» ընկերությունից տեղեկացրին, որ ընկերությունը պատասխանատու է միայն քաղաքի ու մերձակա 30 գյուղերի ջրամատակարարման համար, «Լոռի ջրմուղ-կոյուղի» ընկերությունը` Վանաձոր քաղաքի ու շրջակա տարածքների համար է պատասխանատու, «Շիրակ ջրմուղ-կոյուղի»-ն` Գյումրիի ու շրջակայքի, Արմավիրի տարածքում պատասխանատու է «Նոր ակունք» ընկերությունը, իսկ հանրապետության մյուս տարածքների խմելու ջրի որակի համար պատասխանատու է «Հայ ջրմուղ-կոյուղի» ընկերությունը:

Այս առիթով Panorama.am-ը զրուցեց «Լոռի ջրմուղ-կոյուղի» ընկերության տնօրեն Արարատ Գինոսյանի հետ և հիշեցրեց, որ դեպքերի հաջորդ օրը ընկերության հանրության հետ կապերի պատասխանատուն նշել էր, թե ընկերության փորձագետների հավաստմամբ, «համաճարակի պատճառը 99.9 %-ով ջուրը չի կարող լինել», սակայն այժմ առողջապահության նախարարության հակահամաճարակային ու հիգիենիկ տեսչության վարչությունը նշում է, որ հիվանդների կղանքների մանրէաբանական հետազոտության արդյունքում հայտնաբերած պայմանական հարուցիչները կարող են առաջանալ միայն ջրի պատճառով:

«Սկսած առաջին օրվանից մենք մեր գործունեությունը վարում ենք նորմատիվ ակտերի համապատասխան և մինչս օրս տված տվյալները չեն ապացուցում, որ վարակի պատճառը ջուրն է: Մենք չենք կարողանում հասկանալ, թե ոնց են այդ կարծիքները հիմնավորվում: Խնդիրը պայմանավորված է նրանով, որ իրենք են մասնագետները, ոչ թե մենք: Հենց իրենք են ասում, որ եթե այդ բացիլը լիներ ջրում, ապա ջրամատակարար կազմակերպությունը չէր կարող բացահայտել դա, քանի որ, իրականում, մենք չունենք այդ բացիլի դեմ պայքարելու հնարավորությունը»,-նշեց Ա. Գինոսյանն ու ավելացրեց, որ քլորի միջոցով դրա դեմ հնարավոր չէր պայքարել, իսկ ընկերությունը կարողանում է միայն քլորով ախտահանում իրականացնել:

Բացի այդ, ընկերության տնօրենը նշեց, որ իրենց նույնիսկ ինֆորմացիա չեն տրամադրել, թե բացիլը ջրատարի որ հատվածում է հայտնաբերվել և «եթե այն հայտնաբերել են, ապա ինչու՞ չեն տեղեկացնում ընկերությանը»: Իսկ այն հարցին, թե արդյունքում ո՞վ է մեղավոր հարյուրից ավելի մարդկանց հիվանդանոցում հայտնվելու համար, Ա. Գինոսյանը նշեց, որ դրան կարող է պատասխանել միայն տեսչության կողմից կազմված մասնագիտական խումբը:

«Այդ ինչպես եղավ, որ վիրուսը նաև Ալավերդիում հայտնաբերվեց: Այն դեպքում, երբ մենք ջրատարներով առանձին ենք: Ալավերդու ջուրը մատակարարում է «Հայ ջրմուղ» ընկերությունը, մենք նրանց հետ ոչ գործ ունենք, ոչ էլ ջրատարներով կապված ենք»,-նկատեց ընկերության տնօրենը և ավելացրեց, որ ընկերության կողմից իրականացվող ամենօրյա ստուգումներն այժմ եռակի անգամ խստացվել են:

Այս նույն հարցերի պատասխանը ստանալու ակնկալիքով Panorama.am-ը զրուցեց պետական հիգիենիկ և հակահամաճարակային տեսչության գլխավոր մասնագետ Լիանա Թորոսյանի հետ ով, ևս մեկ անգամ փաստեց, որ տեսչության մասնագետների հավաստմամբ վարակի հիմնական պատճառը ջուրն է և ավելացրեց, որ ջրի որակն ապահովում են համապատասխան տարածքը ջրով ապահովող ընկերությունները: «Իսկ մեր կողմից իրականցվում է որակի վերահսկողություն, արդյոք մատակարարվող խմելու ջուրը համապատասխանում է մեր ստանդարտներին, թե ոչ: Այդ ընկերություններն ունեն համապատասխան լաբորատորիաներ, որտեղ էլ, որ իրականացվում են համապատասխան հետազոտությունները»,-նշեց Լ. Թորոսյանն ու ավելացրեց, որ տեսչությունը յուրաքանչյուր տարածքում ստուգման աշխատանքներն իրականացնում է ըստ նախապես կազմված ժամանակացուցի, որը կազմում է յուրաքանչյուր տեղամաս: Առաջատար մասնագետը կրկին նշեց, որ դեպքերից հետո տեսչությունը ջրի որակի վերահսկման համար լրացուցիչ միջոցառումներ է իրականացվում՝ կատարվում է ամենօրյա նմուշառում, մանրէաբանական ու այլ հետազոտություններ:

Նշենք, որ առողջապահության նախարարությունն ու հանրապետության տարբեր տարածքներում ջրամատակարարումն իրականացնող ընկերությունների աշխատանքերը կանոնակարգվում են ըստ նախարարության ընդունած կանոնադրության՝ առանց որևէ պայմանագրի:

Նկատենք նաև, որ Վանաձոր ու Ալավերդի քաղաքների խմելու ջրերի սկզբնաղբյուրները տարբեր են: Ինչպես Panorama.am-ին տեղեկացրին «Հայ ջրմուղ- կոյուղի» ընկերությունից,Ալավերդին խմելու ջուր ստանում է Ստեփանավանի տարածաշրջանում գտնվող մի քանի աղբյուրներից, իսկ բնապահպանության նախարարությունում ասացին, որ Վանաձորը ջուրը ստանում է քաղաքի տարածքում գտնվող մի քանի աղբյուրներից: Բացի այդ, նախարարությունից տեղեկացրին, որ աղբյուրների ջրի մաքրության համար բնապահպանության նախարարությունը պատասխանատվություն չի կրում, քանի որ ջրօգտագործման իրավունքն արդեն պատկանում է տվյալ ընկերությունները: «Մինչև ջրի օգտագործման իրավունքը ընկերություններին հանձնելը, նախարարությունը պատասխանատու է ջրի որակի համար, իսկ օգտագործման իրավունքն իրենց հանձնելուց հետո պատասխանատուն այդ ընկերություններն են»,-ասաց նախարարության հասարակայնության հետ կապերի բաժնի պատասխանատու Արծրուն Պեպանյանը: Նույնը նաև հաստատեցին «Հայ ջրմուղ-կոյուղի» ընկերությունից:

Ո՞վ է պատասխանտու Վանաձորում ու Ալավերդիում բռնկված համաճարակի համար, ջրամատակարարում իրականացնող ընկերությունները, թե՞ առողջապահության նախարարությունը, թե՞ էլի ով: