Ձեր վստահելի աղբյուրը

ՀՀ արդարադատության նախարար Գևորգ Դանիելյանը հանդիպել է ցմահ ազատազրկում կրող Ստեփան Գրիգորյանի, Արմեն Տեր-Սահակյանի, Արմենակ Մնջոյանի և Արսեն Արծրունու հետ: Դատապարտյալները հանդիպման ընթացքում ներկայացրել են իրենց դժգոհությունները` կապված մահապատիժը ցմահ ազատազրկմամբ փոխելու հետ: Վերջիններս հայտնել են, որ իրենք վիճարկում են ՀՀ նախագահի 2003թ. օգոստոսի 30-ի հրամանագրով իրենց ներման հիմքով ցմահ ազատազրկում սահմանելը: Ըստ դատապարտյալների, դա ՀՀ Սահմանադրության, միջազգային փաստաթղթերի և ներպետական օրենսդրության խախտում է:

Նախարար Դանիելյանը հանդիպման ընթացքում, չհամաձայնելով դատապարտյալների որոշ եզրահանգումների հետ, նախ, առաջարկել է որ այդ եզրահանգումները համարժեքորեն արտացոլվեն օրենսդրության պահանջներին:
Նախարարը հանգամանորեն պարզաբանումներ է տվել հնչեցված բոլոր հարցերին: Մասնավորապես, Հայաստանի Հանրապետության Նախագահի հրամանագիրը եղել է ոչ թե օրենսդրության փոփոխության հիման վրա պատժատեսակի փոխարինման վերաբերյալ իրավական ակտ, ինչը և կլիներ անիրավաչափ, այլ դատապարտյալներին շնորհվել է ներում:

ախարարը պարզաբանել է նաև, որ դատախազը, ղեկավարվելով Հայաստանի Հանրապետության քրեական դատավարության օրենսգքրքի 52-րդ հոդվածի 2-րդ մասով, նախկինում մահապատժի դատապարտված անձանց վերաբերյալ դատական կարգով չվերանայված դատական ակտերը վերանայելու նպատակով, համապատաuխան միջնորդություն է ներկայացրել դատարան: Պարզաբանվեց նաև, որ ցմահ ազատազրկումը մահապատժի հետ համեմատ մեղմ պատժատեսակ է, ինչը հաստատվում է նաև միջազգային մի շարք փաստաթղթերով, իսկ օրենքի փոփոխությունները, որոնք հանգեցրել են պատժի մեղմացման` ունեն հետադարձ ուժ:

Դատապարտյալները նախարարին են ներկայացրել նաև մի շարք առաջարկներ` կապված քրեակատարողական հիմնարկի պայմանների հետ, որոնց վերաբերյալ նախարարը հայտնել է, որ կքննարկվեն բոլոր առաջարկները և կկայացվեն հիմնավորված որոշումներ: Այս մասին տեղեկացնում են Քրեակատարողական հիմնարկների մամուլի ծառայությունից: