Ձեր վստահելի աղբյուրը

«Թե՛ Վանաձորում, թե՛ Ալավերդիում համաճարակային իրավիճակը վերահսկվում է և կարելի է ասել, հետզհետե նահանջում է: Դա են վկայում վերջին երկու օրերին բուժկենտրոններից դուրսգրումներն ու այն, որ նոր դեպքեր չեն գրանցվում»,-Panorama.am-ի հետ զրույցում ասաց առողջապահության նախարարության պետական հիգիենիկ և հակահամաճարակային տեսչության գլխավոր մասնագետ Լիանա Թորոսյանը:

Առողջապահության նախարարության երեկ` նոյեմբերի 3-ին, տրամադրած տվյալներով, Վանաձորի ինֆեկցիոն հիվանդանոցում բուժօգնություն է ստանում  28, Ալավերդու բժշկական կենտրոնում` 3 հիվանդ: Իսկ ահա նոյեմբերի 1-ին տրամադրած տվյալներում նշվում էր, որ Վանաձորում բուժում է ստանում 26 հիվանդ:

Այս պարագայում, ինչպես են մասնագետները նշում, թե հիվանդների թիվը չի ավելացել կամ նոր դեպքեր չեն գրանցվել, Panorama.am-ի հարցին Լ. Թորոսյանը պատասխանեց. «Հիվանդների խնամքով զբաղվող ընտանիքի անդամների մոտ ևս առաջացել են վարակի թույլ դրսևորումներ: Այդ մարդիկ համարվում են կոնտակտային ճանապարհով վարակվածներ: Պարզապես, հետագա բարդություններից խուսափելու համար նրանց ձևակերպել ենք որպես հիվանդներ ու այժմ ստանում են համապատասխան բուժում»:

Նրա խոսքով, վարակվելու այդ եղանակը մասնագետները չէին բացառել: Կոնտակտային ճանապարհով վարակվածների մոտ հիվանդության նշանները շատ թույլ են, ուղեկցվում են «լուծով ու թեթև սրտխառնոցով»:

Ըստ Լիանա Թորոսյանի, չնայած բնակչության շրջանում տարվող իրազեկման աշխատանքներին, այնուամենայնիվ, կոնտակտային ճանապարհով վարակներն առաջացել են հենց անզգուշության ու սանիտարահիգիենիկ որոշակի պայմաններ չպահպանելու պատճառով:

Ինչևէ, այսօրվա դրությամբ, Վանաձորի ինֆեկցիոն հիվանդանոցում է գտնվում 22 հիվանդ, 8-ն ըստ մասնագետի, հենց այսօր դուրս կգրվեն, իսկ Ալավերդիում դրությունը կայուն է, բուժումը շարունակում է 3 հիվանդ: