Ձեր վստահելի աղբյուրը

Մինչև մեկ տարեկան երեխաների մահացության դեպքերը նվազել են. վկայում են վիճակագրական տվյալները: Այս տարվա ինն ամիսների ընթացքում մինչև մեկ տարեկան երեխաների մահացության դեպքերը, նախորդ տարվա նույն ժամանակահատվածի համեմատ նվազել են 22-ով: Այս մասին Panorama.am-ին հայտնեց ազգային վիճակագրության մարդահամարի և ժողովրդագրական բաժնի պետ Կարինե Կույումջյանը:

Այս տարվա ինն ամիսների ընթացքում գրանցվել է մինչև մեկ տարեկան 312 երեխայի մահվան դեպք, նախորդ տարվա նույն ժամանակահատվածի` 334-ի դիմաց: Նրա ներկայացմամբ, մինչև մեկ տարեկան երեխաների 61.7 տոկոս մահվան դեպքերը պայմանավորված են եղել շուրջծննական շրջանում առաջացած առանձին վիճակներով, բնածին անկանոնություներով և ձևախախտումային այլ խանգարումներով:

Կ. Կույումջյանի խոսքով, հաշվետու ժամանակահատվածում հղիության հետ կապված բարդությունների պատճառով (ծննդյան և հետ ծննդյան ժամանակահատվածում) գրանցվել է մայրական մահացության 13 դեպք, ինչը նախորդ տարվա նույն ժամանակահատվածի (4 դեպք) համեմատ աճել է:

Ընդ որում, շատերի համար էական չէ. 13-ի՞ մեջ է  1977 թվականին ծնված Գ. անունով քաղաքացուհին, ով մահացել էր Սուրբ Աստվածամայր բժշկական կենտրոնի ծննդատանը ծննդաբերության ժամանակ: Թե ու՞մ մեղքով էր այդ մահը, դեռ որ չպարզվեց, դարձավ միայն վիճակագրություն: Հիշեցնենք, որ ՀՀ Ոստիկանությունից  հայտնել էին, որ սեպտեմբերի 1-ին մուտքագրվել է այս դեպքի հետ կապված դիմում (դիմել է Գ-ի սկեսրայրը), իսկ «քրեական գործ կհարուցվի, եթե դատափորձաքննությունը պարզի, որ կան մեղավորներ»: