Ձեր վստահելի աղբյուրը

Հայ հասարակության այն հատվածը, որը լավատես է և մեծ հույսեր ունի, որ Միացյալ նահանգները երբևէ կճանաչի 1915 թվականի Հայոց ցեղասպանության փաստը, նոյեմբերի 4-ից ցնծության մեջ է. Միացյալ Նահանգներում տեղի ունեցած նախագահական ընտրություններում հաղթել է դեմոկրատների թեկնածու Բարաք Օբաման: Օբամայի և նրա վարչակազմի գալուստը լավատեսություն է ներշնչում հայ հանրությանը, քանի որ նախընտրական քարոզարշավի ընթացքում դեմոկրատ թեկնածուն խոստացել է ճանաչել Հայոց Ցեղասպանության փաստը: Այդպիսի հայտարարությամբ, ի դեպ, հանդես են եկել Օբամային նախորդած և 1965-ից հետո ԱՄՆ-ն ղեկավարած բոլոր նախագահները, որոնք սակայն, իրենց ելույթներում սահմանափակվել են 1915-ը միայն որպես «ողբերգական իրադարձություն» որակելով:

«Ես և Ջո Բայդենը հավատում ենք, որ Հայոց Ցեղասպանությունը ոչ թե կարծիք է կամ տեսակետ, այլ փաստաթղթերով հիմնավորված եղելություն, որի հենքը պատմական ճնշող իրադարձություններն են»,- նախընտրական քարոզարշավի ժամանակ հայտարարել է Օբաման:

Նկատենք, որ սենատոր Ջո Բայդենը դեմոկրատ նախագահի երդմնակալությունից հետո փոխնախագահ դառնալու ամենահավանական թեկնածուն է, ով լինելով Սենատի Արտաքին հարաբերությունների հանձնաժողովի նախագահ, հեղինակել է սենատում շրջանառության մեջ դրված Հայոց ցեղասպանության մասին 106-րդ բանաձևը:

Օբամայի ընտրությունը ոգևորել է մասնավորապես Ամերիկայի հայկական համայնքին: ՀՅԴ Հայ դատի հայաստանյան գրասենյակի ղեկավար Կիրո Մանոյանի ակնկալիքները ԱՄՆ նորընտիր նախագահ Օբամայից մեծ են. նա վստահ է, որ նորընտիր նախագահը ի վերջո կճանաչի Հայոց ցեղասպանության փաստը:

«Մեր հույսերը մեծ են, քանի որ նրա գործողություններն էլ դա են վկայում»,-Panorama.am-ին ասաց Կիրո Մանոյանը` հավելելով, որ նախագահական ընտրություններից մի քանի օր առաջ նա կրկնել է իր խոստումը և Սենատում հանդես եկել Հայոց ցեղասպանության փաստը ընդունելու մասին հայտարարությամբ:

Այս հարցում խիստ զգուշավոր է սփյուռքահայ վերլուծաբան, քաղաքագետ Ռիչարդ Գիրակոսյանը: Panorama.am-ին տված հարցազրույցում նա ասաց, որ ԱՄՆ կողմից ցեղասպանության փաստի ճանաչումն անհնարին է, քանզի «թեկնածուի այդ դիրքորոշումը չի համապատասխանի ԱՄՆ պաշտոնական քաղաքականության սկզբունքներին»:

«Չի բացառվում, որ նախագահի պաշտոնն ստանձնելուն պես նախագահ Օբաման խուսափի ցեղասպանության փաստը ճանաչելուց և որոշի, որ ԱՄՆ հետաքրքրություններն ու շահերն ավելի կարևոր են` ԱՄՆ-Թուրքիա հարաբերությունների զարգացման և դրանց բարելավման առումով»,- կարծում է պարոն Գիրակոսյանը:

Ըստ քաղաքագետի, ԱՄՆ-ի համար կարևոր է իր արտաքին քաղաքականությունն ամրապնդելը և այդ առումով նա չի սառեցնի հարաբերությունները ՆԱՏՕ-ի անդամ և իր դաշնակից Թուրքիայի հետ` ընդունելով Հայոց Ցեղասպանության փաստը:

«Այնուամենայնիվ, չնայած նրան, որ Օբամայի ընտրությունը ԱՄՆ արտաքին քաղաքականության հարցում տարբեր ուղղություններով սրընթաց փոփոխություններ կբերի, միևնույնն է` ԱՄՆ քաղաքականությունը ցեղասպանության ճանաչման հարցում կմնա նույնը»,- պնդում է Ռիչարդ Գիրակոսյանը:

Այս հարցի վերաբերյալ զգուշավոր արտահայտվեց նաև ՀՀ արտաքին գործերի փոխնախարար Արման Կիրակոսյանը: Նրա համոզմամբ` Ցեղասպանության փաստի ճանաչման և դրա հետևանքով Թուրքիայի հետ հարաբերությունների սառեցման հետևանքով կարող են խնդիրներ առաջանալ ԱՄՆ արտաքին քաղաքականության համար: Սակայն, դիվանագետի կարծիքով, հայերի ցեղասպանության ճանաչումը նախատեսող բանաձևի ընդունումը «ոչ միայն չի խանգարի, այլև կնպաստի կայունության հաստատմանը»:

Վերլուծաբան Ռիչարդ Գիրակոսյանի կանխատեսմամբ` հնարավոր է, որ Օբամայի վարչակազմը, այնուամենայնիվ, Ցեղասպանության մասին հարցը առաջ տանի մինչև ԱՄՆ Կոնգրես կամ նույնիսկ աջակցի, որ Հայոց Ցեղասպանության հարցը ճանաչվի ԱՄՆ Կոնգրեսի մակարդակով: Այսքանը` ոչ ավելին:

Իսկ պարզելու համար թե ինչպե՞ս կզարգանան դեպքերը և արդյո՞ք նորընտիր նախագահը հետամուտ կլինի իր խոստմանը, պետք է սպասել` առավելագույնը 4 տարի` հունվարի 20-ից սկսած, քանի որ Օբամայի և փոխնախագահի պաշտոնում նրա թեկնածու Ջո Բայդենի երդմնակալության պաշտոնական արարողությունը տեղի կունենա հենց այդ օրը Վաշինգթոնում: