Ձեր վստահելի աղբյուրը

Այսօր Հայաստանի առողջապահության, էկոնոմիկայի նախարարությունների, Դեղերի և բժշկական տեխնոլոգիաների փորձագիտական կենտրոնի, Դեղ արտադրողների ու ներմուծողների միության, Առողջապահության համաշխարհային կազմակերպության (ԱՀԿ) և ԱՄՆ ՄԶԳ ֆինանսավորմամբ իրականացվող «Մրցունակ մասնավոր հատված Հայաստանում» (CAPS) ծրագիրը համատեղ հանրապետությունում առաջին անգամ կազմակերպել էին դեղագործության ոլորտի զարգացմանն ու միջազգային չափանիշներին նվիրված համաժողով:

Դեղերի ու բժշկական տեխնոլոգիաների փորձագիտական կենտրոնի ղեկավար Էմիլ Գաբրիելյանի խոսքով, համաժողովի նպատակը դեղագործության որակի բարձրացման կառավարումն ու դեղերի արտադրության ոլորտում միջազգային չափանիշների վերաբերյալ իրազեկումն է: «Դեղերի շրջանառությունը մեր երկրում լուրջ զարգացման ու ձևափոխությունների կարիք ունի: Իհարկե, սա շատ մեծ բնագավառ է, դրա համար էլ շատ խնդիրներ կան, բայց պետք է հաշվի առնել, որ 15-20 տարի առաջ մենք հանդես էին գալիս միայն որպես դեղօգտագործող՝ պացիենտ, բայց դեղերի արտադրության, նրա շրջանառության քաղաքական սկզբունքներից շատ հեռու էինք կանգնած: Շատ ուրախալի է, որ քայլ առ քայլ սկսեցինք հասկանալ ոլորտում առկա խնդիրների էությունը: Դեղը, ոչ կոշիկ է, ոչ ցեմենտ է, ոչ էլ՝ երկաթ, նա կարևորագույն բժշկական գործոն է»-ասաց Է. Գաբրիելյանը:

Ըստ նրա, այս առումով էլ, հատուկ պահանջներ են մշակվել դեղի արտադրության, օգտագործման ու կիրառման համար: Ազգային ժողովի սոցիալական, բնապահպանական ու առողջապահական հարցերի մշտական հանձնաժողովի նախագահ Արա Բաբլոյանի խոսքով, այսօր շատ երկրներ ներմուծում կամ արտահանում են միայն միջազգայնորեն ընդունված «Պատշաճ արտադրական գործունեության» (ՊԱԳ) չափանիշների արտադրված դեղորայք, ու ըստ նրա, հանրապետությունում արտադրվող դեղորքայքը նույնպես պետք է համապատասխանի այդ չափորոշիչներ, որ կարողանա դիմանալ ոլորտում առկա մրցակցությանը: CAPS ծրագրի մրցունակության ավագ փորձագետ Ալան Սաֆֆերին նույնպես կարևորեց այդ սկզբունքը:

Առողջապահության փոխնախարար Թաթուլ Հակոբյանի խոսքով, արտադրական հզորությունների ներկայի վիճակը հաշվի առնելով ոլորտում միջազգային ստանդարտների ներդրումը մի քանի անգամ հետաձգվել է: «Շուտով կառավարության որոշմամբ հիմք կընդունենք Երամիության ՊԱԳ կանոններն ու բոլոր դեղագործական ընկերությունները պետք է ներկայացնեն իրենց գործողությունների պլանը»,-ասաց Թ. Հակոբյանն ու ավելացրեց, որ ոլորտի վերահսկողություը թույլ կտա ապահովել պահանջվող որակը:
Նշենք, որ այժմ երկրում գործում է 17 լիցենզավորված դեղագործական ընկերություն: