Ձեր վստահելի աղբյուրը

 Ազգային ժողովն այսօր առաջին ընթերցմամբ ընդունեց նվազագույն աշխատավարձը 25 հազար դրամից 30 հազար դրամ սահմանելու վերաբերյալ կառավարության օրենսդրական նախաձեռնությունը: Ընդ որում, ՀՅԴ խմբակցության ղեկավարը հայտարարեց, որ վերապահումով է կողմ քվեարկում այդ նախաձեռնությանը, քանի որ նվազագույն աշխատավարձի 5 հազար դրամով ավելացումը բավարար չի համարում, իսկ «Ժառանգություն» խմբակցության ներկայացուցիչը հայտարարեց, որ նույն պատճառաբանությամբ իրենք ձեռնպահ են քվեարկելու, խոստանալով, որ կողմ կքվեարկեն երկրորդ ընթերցման ժամանակ, եթե ընդունվի նվազագույն աշխատավարձը 40 հազար դարձնելու իրենց առաջարկությունը:

2009 թվականի պետական բյուջեի նախագծի քննարկումների ժամանակ անդրադառնալով այս խնդրին, ֆինանսների նախարար Տիգրան Դավթյանն ասաց. «Շատ է դա, թե քիչ, դա փիլիսոփայական հարց է»: Նրա խոսքով, նվազագույն աշխատավարձը 40 հազարի հասցնելու ցանկությունը ըմբռնելի է իր համար, սակայն բյուջեի հնարավորությունները նման բան թույլ չեն տալիս:

Տ. Դավթյանը հիշեցնելով միջազգային ֆինանսական ճգնաժամի մասին, տեսակետ հայտնեց, որ հաջորդ տարին Հայաստանի համար հեշտ չի լինելու և հավելեց. «Պետք է տրամադրվենք նրան, որպեսզի որոշ իմաստով զսպենք մեզ»:

ՕԵԿ խմբակցության պատգամավոր Հեղինե Բիշարյանն էլ բարձրացրեց երաժշտական դպրոցներում, սպորտ դպրոցներում ու մանկապարտեզներում մանկավարժների ցածր աշխատավարձերի հարցը, նշելով, որ անհամամասնություն է առաջացել դպրոցներում աշխատող մանկավարժների և մանկապարտեզներում աշխատող մանկավարժների աշխատավարձերի միջև:

Այս առնչությամբ նախարար Դավթյանը համաձայնեց, որ իսկապես վերջին տարիներին հատուկ ուշադրություն է դարձվել ուսուցիչների աշխատավարձի բարձրացման վրա և ժամանակն է նույն ուշադրությունը սևեռել նաև այլ կրթական հաստատություններում աշխատող մանկավարժների աշխատավարձերի վրա: «Կփորձենք գալիք տարիներին մեղմել այդ անհամամասնությունը և նրանց աշխատավարձը նույնպես հասցնել դպրոցների ուսուցիչների աշխատանվարձին»,- ընդգծեց նա: