Ձեր վստահելի աղբյուրը

«Բուհական հաստատությունների ծախսերի միայն 12 տոկոսն է հատկացնում պետական բյուջեն»,- այսօր 2009 թվականի պետական բյուջեի խորհրդարանական քննարկումների ժամանակ իր ելույթում նշեց ԱԺ գիտության, կրթության, մշակույթի, երիտասարդության և սպորտի հարցերի հանձնաժողովի նախագահ Արմեն Աշոտյանը, հավելելով, որ դրա հետևանքով իջնում է կրթական մակարդակի նշաձողը, որովհետև ԲՈՒՀ-երը ստիպված են լինում ֆինանսավորման աղբյուրներից չզրկվելու համար ուսումնական հաստատությունից չհեռացնել վատ սովորող, սակայն վճարունակ ուսանողին:

Հաջորդ մտահոգությունը, որի մասին խոսեց հանձնաժողովի նախագահը վերաբերում էր գիտական հաստատությունների աշխատողների ցածր աշխատավարձներին: Նա «նոնսենս ու զավեշտալի» համարեց, որ գիտաշխատողը Հայաստանում կրկնակի անգամ ցածր աշխատավարձ է ստանում, քան կրթական հիերարխիայում ավելի ցածր կանգնած հանրակրթական դպրոցի ուսուցիչը: Ա. Աշոտյանը առաջարկեց ոչ թե նվազեցնել ուսուցչի աշխատավարձը, որը նույնպես բարձր չէ, այլ գիտնականների աշխատավարձերը բարձրացնել, որպեսզի նման զավեշտալի փաստ չարձանագրվի:

Խոսելով երիտասարդության մասով բյուջետային ֆինանսավորման մասին, նա տեղեկացրեց, որ պատրաստվում է երիտասարդության մասին օրենքի ընդունում, ըստ որի այդ ոլորտը որակական ու քանակական թռիչք պետք է ապրի, իսկ դա իր արտահայտությունը պետք է ունենա բյուջեում:

Անդրադառնալով մամուլի խնդիրներին, պատգամավորը տեսակետ հայտնեց, որ պետք է ավելացվի մարզային լրատվամիջոցների ու պարբերականների բյուջետային ֆինանսավորումը: Նա տեղեկացրեց, որ 2009 թվականի բյուջեով առաջին անգամ կֆինանսավորվի նաև հրեական համայնքի պարբերականը, ինչպես դա տեղի է ունենում այլ ազգային փոքրամասնությունների պարբերականի դեպքում:

Ա. Աշոտյանը զավեշտալի ու զարմանալի համարեց նաև այն, որ բյուջեում գումարներ չեն գտնվում ֆինանսավորելու համար Հայ առաքելական եկեղեցին, որին Սահմանդրությամբ բացառիկ դեր է վերապահված հայ իրականության մեջ: