Ձեր վստահելի աղբյուրը

Հայաստանում մանկական հիվանդություններից տարածված են փորլուծությունը, սուր ռեսպերատոր վարակներով և սնուցման հետ կապված մի շարք հիվանդություններով: Այս մասին այսօր լրագրողների հետ զրույցում ասաց Ազգային ժողովի առողջապահության հարցերով մշտական հանձնաժողովի նախագահ Արա Բաբլոյանը:

Նրա խոսքով, այժմ ծննդատներում մայրերին խորհուրդ է տրվում երեխաներին կրծքով կերակրել առնվազն մինչև 6 ամսական հասակ: «Կրծքով երկար ժամանակ կերակրելը թույլ է տալիս երեխային զերծ պահել մի շարք հիվանդություններից: Իսկ ինչ վերաբերում է մանկաբուժության ոլորտում մեր անելիքներին, ապա խնդիրներ ունենք նեոնատալ մահացածության հետ կապված և այստեղ մեր անելիքներն ավելի լայն են, քանի որ նրանք չեն սահմանափակվում միայն մանկաբուժության հատվածով: Մենք աշխատում ենք ուժեղացնել մոր և մանկան, դեռահասների առողջության օղակները, քանի որ այստեղ է ապագա սերունդների առողջության հիմքը»,-ասաց Ա. Բաբլոյանը:

Ըստ նրա, մանկաբուժության ոլորտում շատ անելիքներ կան հատկապես հանրապետության մարզերում: Սակայն խնդիրները չեն վերաբերում միայն մանկաբուժության ոլորտին: Այդ առումով, Ա. Բաբլոյանի խոսքով, կառավարությունն ու նախարարությունը ծրագրեր է մշակել, որոնք պետք է բարելավեն մասնագետների աշխատանքը հեռավոր մարզերում, կազմակերպվում են ուսուցողական ու վերապատրաստման ծրագրեր, որոնք թույլ կտան կրթելու տեղի, շրջանի բանկաբույժներին:

Նշենք, որ այժմ հանրապետության 5 մարզերում՝ Շիրակում, Լոռիում, Արմավիրում, Գեղարքունիքում ու Տավուշում, մտավոր, ֆիզիկական ու խոսքի խնդիրներ ունեցող երեխաները կարող են տեղում ստանալ համապատասխան բուժօգնություն: