Ձեր վստահելի աղբյուրը

Առողջապահական ոլորտի մասնագետներն այսօր աշխատանքային քննարկման ժամանակ անդրադարձան Հայաստանի առողջապահական համակարգի նախապատրաստման և արձագանքման կարողություններին` արտակարգ իրավիճակների ժամանակ: Ի դեպ, այս կապակցությամբ կազմավորվել է աշխատանքային խումբ, որն իր գործունեությունը սկսել է 2008-ի ապրիլի 21-ից: Խումբը կազմված է տարբեր ոլորտների առաջատար 13 մասնագետից:

Այսօրվա աշխատանքային քննարկման ժամանակ «Սրբ. Գրիգոր Լուսավորիչ» բժշկական կենտրոնի տնօրենի տեղակալ Տիգրանուհի Էքմեքչյանն ասաց, որ ուսումնասիրվել են բժշկական հաստատությունների արտակարգ իրավիճակների պատրաստվածության աստիճանը, առաջ են քաշվել հիմնախնդիրներ և մանրամասն քննարկվել խմբի ադամների կողմից:

Առաջին հարցը վերաբերում է արտակարգ իրավիճակներին ու աղետներին վերաբերող օրենսդրական դաշտին, գերատեսչությունների փոխհամաձայնեցված գործողություններին ու աղետների կառավարմանը: Իսկ երկրորդ հիմնախնդիրը, ԲԿ-ի տնօրենի տեղակալի խոսքով, վերաբերում է աղետների ժամանակ առողջապահական համակարգի դերին: Ըստ այդմ, խումբն անհրաժեշտ է համարում արդիականացնել նախահիվանդանոցային և հիվանդանոցային անհետաձգելի բժշկական ծառայությունները և համալրել դրանց նյութատեխնիկական բազան:

Քննարկման մասնակիցներն ուշագրավ են համարում նաև աղետների ժամանակ վարակիչ և ոչ վարակիչ հիվանդությունների ու թունավորումների կանխարգելման, վերահսկման գործողությունների առկա իրավիճակը: Այստեղ մասնագետներն առաջարկում են ԱՆ-ում ստեղծել աղետների ու արտակարգ իրավիճակների արագ արձագանքման օպերատիվ ծառայություն կամ ներկայացուցչույթուն:

«Սրբ. Գրիգոր Լուսավորիչ» բժշկական կենտրոնի տնօրենի տեղակալի խոսքով, Հայաստանի, Ադրբեջանի ու Թուրքիայի միջև արտակարգ իրավիճակների վերաբերյալ գործող տեղեկատվական համակարգ չկա, ինչը կարող է աղետների կանխման ու դրանց հետևանքների վերացման խոչընդոտ հանդիսանալ, քանի որ երեք երկրներն էլ գտնվում են նույն սեյսմիկ գոտում, ուստի այդ համակարգի ստեղծումը, մասնագետների կողմից, անհրաժեշտ է համարվում:

Առողջապահության փոխնախարար Թաթուլ Հակոբյանն, այս առումով կարևոր է համարում նաև համապատասխան ուսուցման բարելավումը, քանի որ ցանկացած ոլորտում գործող բժիշկ պետք է հնարավորություն ունենա գիտելիքներն ու հմտությունները ներդնելու` հատկապես աղետների, պատերազմական իրավիճակների ժամանակ:

Փաստաթուղթը հետագայում կներկայացվի ՀՀ կառավարությանը: