Ձեր վստահելի աղբյուրը

2009 թվականի մայրաքաղաքի ամանորյա ծրագիրը մեկնարկելու է հրապարակում՝ դեկտեմբերի 31-ին, ժամը 21:00-ին սկսվող համերգով: Այս մասին հայտնեց քաղաքապետարանի երիտասարդական հարցերի ու սպորտի վարչության պետ Կամո Մովսիսյանը: Ժամը 24:00-ին նոր տարվա մուտքը կազդարարվի մեծ հրավառությամբ, իսկ համերգը, վարչության պետի հավաստմամբ, կավարտվի ուշ գիշերին` «մինչև մարդիկ կհեռանան հրապարակից»:

Սուրբ Ծննդին նվիրված համերգային ծրագիրը տեղի կունենա հունվարի 6-ին՝ ժամը 19:00-ին: «Այդ օրվան համերգին մասնակցելու են ազգագրական խմբերը: Այդպես Սուրբ Ծնունդը տոնեցինք նաև 2008-ին ,ու քանի որ քաղաքացիների կողմից շատ լավ ընդունվեց, այս անգամ էլ որոշեցինք հրավիրել ազգագրական խմբերին: Իսկ միջոցառումների ավարտը կլինի հունվարի 13-ին՝ Հին Նոր տարվա օրը, ժամը 19:00-ին. այդ օրը նույնպես հրավառություն կլինի»,-ասաց Կ. Մովսիսյանը: Նրա խոսքով, վարչությունը բոլոր համայնքներից արդեն ստացել է ամանորյա ծրագրերը ու այժմ դրանք քննարկման փուլում են գտնվում:

Անդրադառնալով հրապարակի ու տոնածառի զարդարման աշխատանքներին, վարչության պետը նշեց, որ տոնածառն ու հրապարակն անցյալ տարվա համեմատ ավելի լուսարձակ են լինելու:

«Պետք է նշեմ, որ մեր տոնածառը ամենաբարձրն է լինելու ԱՊՀ երկրներում տեղադրվող բոլոր տոնածառներից` 27 մ բարձրության, ու այս տարի` ավելի շքեղ»,-ասաց նա: Իսկ ինչ վերաբերում է հրապարակի տարածքում «երեխաներին շնորհավորել ցանկացող» Ձմեռ Պապերին ու նրանց հետ նկարվելուն, ապա Կ. Մովսիսյանը նշեց, որ տոնածառի շուրջ աշխատելու են միայն քաղաքապետարանի կողմից վարձատրվող Ձմեռ Պապիները. նրանց հետ նկարվելու համար հարկավոր չէ վճարել: Անցյալ տարվա փորձը, ըստ նրա, ցույց է տվել, որ նույնիսկ այս պայմանների դեպքում «քաղաքացիները փորձում են վճարել նրանց»:

Նշենք, որ վարչության պետի համավաստմամբ, այս տարվա համերգային ծրագրի ու քաղաքի ձևավորման համար քաղաքապետարանը բյուջեից տրամադրել է շուրջ 50 մլն դրամ: