Ձեր վստահելի աղբյուրը

«Ամանորի նախաշեմին տեղական ապրանքային շուկայում առաջին անգամ նկատվում է գների նվազում, ինչպես սովորաբար լինում է եվրոպական երկրներում»,-գրեթե մեկ շաբաթ առաջ նման հայտարարություն արեց «Տնտեսական մրցակցության պաշտպանության պետական հանձնաժողովի նախագահ Աշոտ Շահնազարյանը:

Իսկ ահա ինչպես ցույց տվեց մեր անցկացրած մոնիտորինգը` վերջին օրերին բարձրացել են կաթնամթերքի, ձվի, մսի, պանրի և այլ ապրանքների գները: Եթե օրեր առաջ տավարի միսը վաճառվում էր 1700-1800 դրամով, ապա այժմ այն արդեն 1900-2000 դրամ է, խոզի բդի 1 կգ արժե 3500-4000 դրամ, մինչդեռ մեկ շաբաթ առաջ այն արժեր 2500-3000 դրամ: «Լոռի» տեսակի պանրի 1 կգ գինը 1500-1600 դրամից բարձրացել է մինչև 1800 դրամ: Թանկացել են նաև բաստուրման, սուջուխը, մրգերը:

ՏՄՊՊՀ-ի կողմից իրականացվող մոնիտորինգը, ինչպես Panorama.am-ին տեղեկացրեցից հանձնաժողովից, դեռ շարունակվում է: Դեռ ինչքան է շարունակվելու ու ինչ արդյունք կունենա, դեռ պարզ չէ:

Մեր կատարած ուսումնասիրությունը փաստում է, որ ժողովուրդի շրջանում խուճապ է. Աշխատող զանգվածը դեռ աշխատավարձ չի ստացել, դրսից «օգնություն» ստացողների «գումարը դեռ տեղ չի հասել»: Ամեն օր մտնում են խանութներ ու ծանոթանում նոր` արդեն թանկ գներին, ու մտքներում փորձում գուշակել` «մինչև մեր փող ստանալը` տեսնես ինչքա՞ն կթանկանա»:

Հարց, որը ոչ մեկի հայտնի չէ, նույնիսկ նրանց, ովքեր վաճառում են այդ ապրանքները: