Ձեր վստահելի աղբյուրը

«Համահայկական բանկի մասին» ՀՀ օրենքը շատ պարզունակ օրենք է: Այսօր Ազգային ժողովի արտահերթ նիստի ժամանակ ներկայացնելով հիշյալ օրենքի նախագիծը, նման տեսակետ հայտնեց Կենտրոնական բանկի նախագահ Արթուր Ջավադյանը: Նրա ներկայացմամբ, Համահայկական բանկի հիմնադիրը լինելու է ԿԲ-ն կամ Հայաստանի Հանրապետությունը, կանոնադրական կապիտալը լինելու է 100 միլիոն դոլար, իսկ Բանկի վերահսկողությունն իրականացվելու է ԿԲ կողմից: Ըստ Ա. Ջավադյանի, Բանկը գործելու է երկու սկզբունքով. Նախ այն պետք է ներդրումներ անի բացառապես շահութաբեր ոլորտներում, և երկրորդ. Չպետք է մրցակցի այլ առևտրային բանկերի հետ: Դրանից զատ, Բանկը պետք է ազատված լինի շահութահարկից, չպետք է վճարի լիցենզավորման տուրք և իր գործունեությամբ պետք է նպաստի «հայության մրցունակության բարձրացմամն ամբողջ աշխարհում»:

Այս առնչությամբ անկախ պատգամավոր Վիկտոր Դալլաքյանը հարց ուղղեց, թե ի՞նչ է նշանակում «հայության մրցունակության բարձրացում» և օրինակ ինչպե՞ս է Համահայկական բանկը բարձրացնելու ֆրանսահայի մրցունակությունը: ԿԲ ղեկավարը հարցին ի պատասխան նշեց, որ Համահայկական բանկը կարող է անգամ ֆինանսավորել ֆրանսահայ գործարարի ծրագիրը, եթե դա նպաստելու է Հայաստանի զարգացմանը, չկոնկրետացնելով, սակայն, թե ինչպե՞ս է որոշվելու, որ սփյուռքահայ բիզնեսմենի դրսում իրականացվող գործունեությունը նպաստում է ՀՀ զարգացմանը:

ՕԵԿ խմբակցության պատգամավոր Հեղինե Բիշարյանն իր հերթին ասաց, որ «Համահայկական բանկ» գեղեցիկ անվամբ բանկի ստեղծումով կարծես հնարավորություն ենք տալիս նոր Բանկին վերահսկողական ֆունկցիա իրականացնել այլ բանկերի գործունեության վրա, այն էլ ԿԲ վերահսկողությամբ, ապա հավելեց. «Նույնկերպ կարելի է ստեղծել Համահայկական Ազգային ժողով կամ համահայկական դատական համակարգ»: Այս առնչությամբ Ա. Ջավադյանն ասաց, որ Համահայկական բանկը օժտված է լինելու բանկերին բնորոշ բոլոր գործառնությունների իրավունքով և բնական է, որ նրա գործունեությունը պետք է կարգավորվի ԿԲ կողմից: