Ձեր վստահելի աղբյուրը

ՄԱԿ-ի հայաստանյան գրասենյակում այսօր տեղի ունենացավ Կրթության և գիտության նախարարության ներկայացուցիչների և նախնական և միջին մասնագիտական համակարգի դոնոր կազմակերպությունների, շահագրգիռ այլ մարմինների հանդիպում, որի ընթացքում ամփոփվեցին 2008 թվականին կատարված աշխատանքները, ինչպես նաև` ներկայացվեցին 2009 թվականի ընթացքում նախատեսվող ծրագրերը:

ԿԳ փոխնախարար Արա Ավետիսյանը նշեց, որ այս հանդիպման նպատակն այն է, որ դոնոր կազմակերպություները մոդուլային պլաններով ներկայացնեն իրենց հաշվետվությունները և 2009 թվականին կատարելիք ծրագրերը:

«Նախնական և միջին մասնագիտական կրթությունը այսօր պետության և սպասարկման ոլորտի զարգացման հարցում մեծ դեր ունի: Այս ոլորտի զարգացմանը օգնել են ոչ միայն պետական կառույցները, այլև հասարակական կազամկերպությունները»,- հավելեց նա:

Փոխնախարարի խոսքերով, այսօր նախնական և միջին մասնագիտական կրթության զարգացումը հիմնված է պետություն-աշխատաշուկա–կրթություն օղակի ձևավորման հիման վրա:

ԿԳՆ նախնական և միջին մասնագիտական կրթության վարչության պետ Արտակ Աղբալյանը նշեց, որ, սկսած 2006 թ-ից, այս ոլորտում իրականացվում է մեծ բարեփոխումների ծրագիր ԵՄ հետ` «Աջակցություն ՀՀ աղքատության հաղթահարմանը` նախնական և միջին մասնագիտական կրթության ճանապարհով», որի շրջանակներում անցած տարի ՀՀ վարչապետի հրամանով հանրապետության 10 մարզերում ընտրվեցին 12 պիլոտային քոլեջներ, որոնք մինչև 2010 թվականը կստանան բազմագործառույթային ուսումնական հաստատությունների կարգավիճակ և կիրականացնեն նախնական և միջին մասնագիտական կարճաժամկետ դասընթացներ:

Նա նշեց, որ այս տարի ստեղծվել է Մասնագիտական կրթության և ուսուցման զարգացման ազգային կենտրոնը և Մասնագիտական կրթության և ուսուցման զարգացման ազգային խորհուրդը: Այս տարի ձևավորվել են նաև մասնագիտական հաստատությունների կառավարման խորհուրդներ, որտեղ ներառված են նաև սոցիալական գործընկերներ: «Այսօր գործատուն հնարավորություն ունի մասնակցելու քոլեջի կառավարման գործընթացին` սկսած տնօրենի ընտրությունից` մինչև հաշվետվությունների ընդունումը տարեկան կտրևվածքով»,- հավելեց Ա. Աղբալյանը:

Նրա խոսքերով, Մասնագիտական կրթության և ուսուցման զարգացման ազգային կենտրոնի գործունեության արդյունքում ստեղծվել են մի շարք մասնագիտական չափորոշիչներ, որոնց թիվը 2009-ին կհասնի մոտ 100-ի:

Վարչության պետի տեղեկացմամբ` տարիներ շարունակ այս ոլորտում վերապատրաստումներ չեն եղել և այս տարի վերապատրաստվել են շուրջ 800-ից ավելի դասախոսներ և արտադրական ուսուցման վարպետներ:

Ըստ նրա` այս ոլորտում բարեփոխումների հիմնական նպատակը գործատուների պահանջների բավարարելն է, ինչպես նաև` որակյալ կադրեր թողարկելը:

Նա տեղեկացրեց, որ այս տարի Վանաձորում բացվել է մեկ արհեստագործական ուսումնարան, 2009-ին ևս երկու ուսումնարան կբացվի, մեկը Գյումրիում, մյուսը` Գավառում:

Նա տեղեկացրեց, որ հաջորդ տարի պետական բյուջեից տրամադրվող գումարներից բացի այս ոլոտի զարգացման համար կիրականացվի 230-250 մլն դրամի աշախատանքներ:

Ա. Աղբալյանը նշեց, որ այժմ հանրապետությունում գործում է 80 պետական և 30 ոչ պետական միջին մասնագիտական հաստատություն, 30 արհեստագործական նախնական ուսումնարան, 15 միջին մասնագիտական հաստատություն, որոնք իրականացնում են նաև արհեստագործական ծրագրեր: