Ձեր վստահելի աղբյուրը

Հայ աշակերտները մասնակցել են կրթության որակի ուսումնասիրման ամենահեղինակավոր ԹԻՄՍԻ (Trends in International Mathematics and Science Study) միջազգային հետազոտությանը և ցուցաբերել բավականաչափ բարձր արդյունքներ:

ՀՀ ԿԳՆ Գնահատման և թեստավորման կենտրոնի փոխտնօրեն Արսեն Բաղդասարյանն այսօր լրագրողների հետ հանդիպման ժամանակ նշեց, որ ԹԻՄՍԻ-ի կրթության որակի ուսումնասիրման միջազգային հետազոտությունը գնահատում է աշխարհի տարբեր երկրների աշակերտների առաջադիմության միտումները մաթեմատիկայից և բնագիտական առարկաներից: Նրա տեղեկացմամբ, այդ հետազոտությանը Հայաստանը մասնակցում է երկրորդ անգամ, առաջին անգամ մասնակցել է 2003 թվականին: 2007-ին անցկացված հետազոտությանը մասնակցել է 67 երկիր:

Ըստ բանախոսի, այս հետազոտությանը մասնակցելու համար պետությունը 4-րդ և 8-րդ դասարանների համար պետք է վճարեր 20 հազար ԱՄՆ դոլար և 20 հազար եվրո, սակայն երկու հետազոտություների համար էլ Հայաստանը գումար չի մուծել, քանի որ ԿԳ նախարարը նամակով դիմել է հետազոտության կազմակերպիչներին և տեղեկացրել է, որ Հայաստանն այդքան մեծ գումարներ մուծել չի կարող:

Արսեն Բաղդասարյանը հայտնեց, որ ԹԻՄՍ-ը ուսումնասիրում է 4-րդ և 8-րդ դասարանի աշխակերտների ակադեմիական գիտելիքներն ու դրանք կիրառելու հմտությունները: «Սա հնարավորություն է տալիս, արդեն երկրորդ անգամ Հայաստանում կրթական արդյունքները համեմատել այլ երկրների հետ, ինչպես նաև երկրի ներսում` ըստ տարածաշրջանների: Թեստը նպատակ ունի գնահատելու երեխայի իմացությունը, գիտելիքը կիրառելու կարողությունը և դատողությունը»,- հավելեց նա:

ԹԻՄՍԻ հետազոտության հիմնական նպատակն է համեմատել տարբեր կրթական համակարգերով երկրների միջնակարգ դպրոցի
աշակերտների գիտելիքների մակարդակը մաթեմատիկայից և բնագիտական առարկաներից: Ի հայտ բերել աշակերտների
գիտելիքների մակարդակի վրա տարբեր գործոնների ազդեցությունը:

Հայաստանից մասնակցել է 150 դպրոց, որոնք ընտրվել են պատահականության սկզբունքով: Կրթական արդյունքները գնահատելիս որպես նշաձող սահմանվել են գերազանց (625), բարձր (550), միջակ (475) և ցածր (400) շեմերը` համապատասխան միավորներով: 

Հայաստանի 4-րդ և 8-րդ դասարանի աշակերտները մաթեմատիկայից և բնագիտական առարկաներից ստացել են միջին միավոր` 500: «Ես կարծում եմ, որ 2003 թվականին հայ աշակերտներն իրենց գիտելիքները չեն կարողացել լավ դրսևորել, քանի որ թեստային համակարգին դեռ ծանոթ չեն եղել»,- հավելեց նա: Այս հետազոտությանը ամենաբարձր ցուցանիշները ցուցաբերել են Հոնգ Կոնգի աշակերտները:

ԳԹԿ փոխտնօրենը հայտնեց, որ հետազոտությունն անցկացվում է չորս տարին մեկ անգամ: ԹԻՄՍ-2007-ին մասնակցած երկրներից մոտավորապես 40-ը մասնակցել էին նախորդ հետազոտություններին:

Այս հետազոտության ընթացքում բացի գիտելիքների գնահատումից կատարվում է աշակերտների դպրոցական և ընտանեկան առօրյայի վերաբերյալ հարցում, որի օգնությամբ բացահայտվում են այն գործոնները, որոնք այս կամ այն չափով ազդում են աշակերտի առաջադիմության վրա: Նմանատիպ հարցում կազմակերպվում է նաև մաթեմատիկայի և բնագիտական առարկաների ուսուցիչների և դպրոցների տնօրենների համար: Ստացված և մշակված բոլոր այս տվյալների վերլուծության արդյունքում բացահայտվում է երկրի կրթության իրական վիճակն ու զարգացման միտումները:

Արսեն Բաղդասարյանը նշեց, որ մյուս հետազոտությունն անցկացվելու է 2011 թվականին, սակայն պարզ չէ, թե Հայաստանը այս անգամ առանց գումար մուծելու կարող է մասնակցել, թե ոչ: