Ձեր վստահելի աղբյուրը

Տարատեսակ խմիչքի դատարկ շշեր, արևադարձային մրգերի կեղևներ ու պայթելու աստիճան աղբով լցված-փքված պոլիէթիլենային տոպրակներ: Տոներից հետո մայրաքաղաքի գրեթե բոլոր համայնքներում, կարևոր չէ` աղբաման է, թե ոչ, կարելի է նման պատկերի ականատես լինել: Համայնքների սանմաքրման ծառայություններն այնքան անբարեխղճորեն են մոտենում իրենց աշխատանքին, ժամանակին չեն հավաքում օրերով կուտակված աղբը, որ այն սառցակալում է:

Երևանի քաղաքապետարանի կոմունալ տնտեսության վարչության պետ Գագիկ Խաչատրյանին քաղաքում ոչ միայն տոներին, այլև` ընդհանրապես, աղբահավաքության ուղղությամբ իրականացվող աշխատանքը չի գոհացնում: «370 միավոր տեխնիկայով ուզում ենք 700 միավոր տեխնիկայի աշխատանք կատարել, երբեք չի ստացվի»,- Panorama.am-ին ասաց նա:

Պաշտոնյայի տվյալներով, քաղաքային աղբը տեղափոխվում է Նուբարաշենի քաղաքային աղբավայր. օրական այստեղ շուրջ 200 բեռնատար մեքենա թափում է 450-ից 500 տոննա աղբ: Նուբարաշենի աղբավայրի 52, 3 հեկտար տարածքից այժմ օգտագործվում է 8 հեկտարը: Հիսունականներից մինչ այժմ այս աղբավայրում 7, 5-ից 8 մլն տոննա աղբ է կուտակված: «Մաքուր Երևան» ծրագրի շրջանակներում աղբավայրի աջակողմյան հարթակից 14 հազար քառակուսի կմ տարածքը ամբողջությամբ ծածկվել է հողով: «Հողով ծածկված մասում ինքնաայրման երևույթներ տեղի չեն ունենում, բայց ջերմոցային գազերի արտանետում լինում է», - ասաց Գագիկ Խաչատրյանը:

Քաղաքապետարանի և աղբի վերամշակմամբ շահագրգռված պետական այլ մարմինների պատվերով ու Համաշխարհային բանկի գումարներով գերմանական «Ֆիխտներ» ընկերությունը ուսումնասիրություն է կատարում ողջ Հայաստանում` պարզելու ինչ վիճակ է տիրում աղբահանության ոլորտում: «Բոլոր թաղային համայնքների հետ արդեն հանդիպել են, հետաքրքրվել, թե համայնքները որքան աղբահանող տեխնիկա և աշխատուժ ունեն, ուսումնասիրել են իրականացվող աշխատանքների որակը: Իրենց պահանջով ներկայացրել ենք նաև Երևանի Գլխավոր հատակագիծը, որպեսզի ճիշտ հաշվարկներով ներկայացնեն ծրագիրը»,- տեղեկացրեց Գագիկ Խաչատրյանը: Պաշտոնյայի խոսքով, իրենք ցանկանում են այնպիսի ծրագիր ունենալ, որը կներառի աղբահանության ողջ գործընթացը` սկսած դրա հավաքումից, վերջացրած աղբի տեսակավորմամբ ու վերամշակմամբ:

«Ֆիխտներին» մինչև այս տարվա օգոստոս ժամանակ է տրված քաղաքային իշխանություններին նման ծրագիր ներկայացնելու համար: «Էսքան տարի դիմացել ենք, մի քիչ էլ կդիմանանք էլի, ի՞նչ է եղել, որ»,- նկատեց քաղաքապետարանի պաշտոնյան:
2009-ի օգոստոսին ամբողջությամբ փաթեթը կներկայացվի մրցույթի, որի ժամանակ էլ պարզ կլինի, թե ով և ինչպես պետք է իրականացնի Հայաստանի Հանրապետության աղբահանությունը: Մրցույթին մասնակցել ցանկացող կազմակերպությունները պետք է ներկայացնեն ծրագիր, թե ինչպես պետք է իրականացնեն բազմաբնակարան շենքերի և մասնավոր տնատիրություններից աղբահանությունը և աղբի վերամշակումն ու տեսակավորումը:

Դեռ մի քանի տարի առաջ Նուբարաշենի աղբավայրի վերամշակման հայտ էր ներկայացրել ճապոնական «Շիմիզու» կազմակերպությունը: Սակայն հայկական կողմը այդ կազմակերպության ներկայացրած ծրագրին հավանություն չի տվել: ««Շիմիզու» կազմակերպության ներկայացրած պայմանները չէինք կարող ընդունել, քանի որ մենք գլոբալ խնդիր ենք դնում` աղբահանություն, աղբի վերամշակում, տեսակավորում և այլն: Սակայն «Շիմիզուն» պետք է օգտագործեր աղբավայրը 16 տարի, և ոչ մի այլ ծրագիր չէինք կարող ներառել աղբավայրում: Դա մեզ համար ընդունելի չէր և մենք սկսեցինք բանակցություններ վարել, ավելի լավ ծրագրեր փնտրել: Խնդիրն այն է, որ աղբի վերամշակման գործընթացը զարգացնելու ուղղությամբ չպետք է մենաշնորհ տրվեր մի կազմակերպության»,- հավելեց Գագիկ Խաչատրյանը:

Նկատենք, որ ճապոնական կազմակերպության ներկայացրած հայտով, աղբավայրից աղբի փտման հետևանքով առաջացած մեթան գազից արտադրվելու էր էլեկտրաէներգիա: