Ձեր վստահելի աղբյուրը

ԱԺ ֆինանսավարկային և բյուջետային հարցերի հանձնաժողովի նախագահ Գագիկ Մինասյանը լրագրողների հետ հանդիպման ժամանակ նշեց, որ համաշխարհային ֆինանսատնտեսական ճգնաժամի հետ կապված մարտահրավերները դեռ առջևում են: «Չնայած ասում են, որ աշխարհում ճգնաժամն իր պիկին կհասնի այս տարվա կեսերի, սակայն դա չի նշանակում, որ դրանից հետո ամեն ինչ կկարգավորվի: Ամիսներ կամ գուցե տարիներ են հարկավոր, որ ամեն ինչ վերադառնա այն մակարդակին, ինչ եղել է նախքան ճգնաժամը»,- ասաց նա:

Առաջիկա մարտահրավերներին դիմակայելու համար, ըստ ԱԺ պատգամավորի, նախ պետք է խրախուսվի փոքր և միջին բիզնեսը և հատկապես Սյունիքի ու Լոռու մարզերում, որտեղ լուրջ խնդիրներ են առաջացել լեռնահանքարդյունաբերության բնագավառում: «Իշխանությունների կողմից հռչակված փոքր և միջին բիզնեսի զարգացման համար ծրագրերն ուղղված են հենց այդ երկու ռեգիոններին: Առաջնահերթ պետք է իրականացվեն փոքր և միջին բիզնեսի խրախուսման միջոցառումներ, որի շնորհիվ ժամանակավորապես իրենց աշխատանքները թողած մեր հայրենակիցները կկարողանան իրենց հաշվարկը գտնել այս ոլորտում»,- ասաց Գ. Մինասյանը:

Ըստ բանախոսի, իշխանությունների հռչակած ծրագրերի համաձայն` իրատեսական նախագծեր ներկայացնող ընկերությունները ստանալու են լուրջ ֆինանսական ներդրում, իսկ եթե ձեռնարկությունը ունի բավականին լուրջ հնարավորություններ, սակայն չունի համապատասխան միջոցներ, որ իրականացնի բիզնես ծրագրերի մշակումը, իշխանություններն իրենք են պատրաստ իրականացնել այդ պայմանները, սակայն պետական միջոցները չփոշիացնելու համար իշխանությունները կսեփականաշնորհեն որոշակի բաժնետոմսեր` հետ վերադարձնելու պայմանով:

Բանախոսը նաև նշեց, որ իշխանությունները ձեռնամուխ են լինելու նաև այնպիսի տնտեսության ֆինանսավորմանն ու աջակցմանը, որոնք ունեն առավել մեծ կոոպերացիայի կարգավիճակ, հնարավորություններ Հայաստանի սահմաններում, որպեսզի մի ձեռնարկությանն օժանդակելու պայմաններում կարողանա աջակցել մի ամբողջ խումբ ձեռնարկությունների: «Մենք պետք է խթանենք այն տնտեսությունները, որոնք փոխարինելու են ներկրող ապրանքներին, բայց դրա համար անհրաժեշտ է համապատասխան մակարդակ, տնտեսության համապատասխան պոտենցիալ: Այս խնդիրների լուծումն է, որ պետությունն առաջնահերթ է համարում»,- ասաց ԱԺ պատգամավորը:

Գ. Մինասյանի խոսքով, տնտեսական ճգնաժամի բացասական ազդեցությունները մեղմելու համար կառավարությունը ձեռնամուխ է լինում նաև ավելի մեծ ծրագրերի իրականացմանը` շինարարություն, երկաթուղային և ավտոմոբիլային ճանապարհների կառուցում: Ըստ նրա, Գյումրիում սկսվելու է մեծ ծավալով շինարարական աշխատանքներ, որոնք կապահովեն նոր աշխատատեղեր, ինչպես նաև Հայաստան-Իրան երկաթուղու, Հայաստան-Բաթումի ավտոմայրուղու կառուցում: «Այս ծրագրերի ֆինանսավորումը բավականին իրատեսական են»,- ընդծեց նա ու ավելացրեց, որ ծրագրերի իրականացման համար լրացուցիչ օժանդակություն կարող է ցուցաբերել Համահայկական բանկը:

Ճգնաժամային իրավիճակից դուրս ելնելու տարբերակ է նաև, ըստ Գ. Մինասյանի, պետական տրանսֆերտները: «Եթե կարողանանք հայթայթել էժան վարկային միջոցներ, շատ լավ կլինի: Հայաստանն ունի այդ հնարավորությունները. նվազ հարկային բեռ, փոքր դիֆիցիտ ունեցող երկիր է»,- ասաց բանախոսը: Նա համոզված էր, որ առաջիկայում լինելու են նոր ու հզոր վարկային ներդրումներ:

Նաև տեղեկացրեց, որ չնայած այն խոսակցություններին, թե մասնավոր տրանսֆերտների ծավալները նվազել են, իրականում նվազել են տրանսֆերտների աճի տեմպերը: Նախորդ տարվա առաջին 10 ամիսները 2007 թ. հետ համեմատած, նկատվել է աճ` 40 տոկոս, իսկ դեկտեմբերին` 20 տոկոս: «Ստեղծված իրավիճակի հետ պետք է համակերպվենք. համաշխարհային տնտեսությունը գտնվում է ոչ դասական, ոչ սովորական, ոչ ստանդարտ իրավիճակում: Հայաստանի տնտեսությունն այս առումով բացառիկ չէ»,- իր խոսքը եզրափակեց Գագիկ Մինասյանը: