Ձեր վստահելի աղբյուրը

«Վերջին շրջանում ԼՂ խնդրով զբաղվող ԵԱՀԿ Մինսկի խմբի համանախագահները, անգամ ԵՄ ներկայացուցիչները սկսել են ավելի հաճախ այցելել Ղարաբաղ և դա դրական միտում է»,- այսօր լրագրողների հետ հանդիպման ժամանակ նման տեսակետ հայտնեց Գլոբալիզացիայի և տարածաշրջանային համագործակցության վերլուծական կենտրոնի ղեկավար, քաղաքագետ Ստեփան Գրիգորյանն ու հավելեց. «Այսօր կան արդեն միտումներ, որ առանց ԼՂ-ի հարցը չի կարող լուծվել և պետք է զարգացնել դրանք»: Նրա խոսքով, Կոսովոյի ու Վրաստանի կազմում գտնվող հանրապետությունների անկախացումից հետո եվրոպացիներն սկսել են ավելի շատ լսել չճանաչված հանրապետությունների կարծիքը: «Ես դա զգում եմ նաև իմ հանդիպումների ու շփումների ժամանակ»,- ընդգծեց Ս. Գրիգորյանը:

Նա անդրադարձավ նաև Եվրոպայում գազային խնդրին, մասնավորապես գազի Եվրոպա հասցնելու այլընտրանքային ուղիներին: Քաղաքագետի ներկայացմամբ, հատկապես օգոստոսյան պատերազմից հետո պարզ դարձավ, որ «Նաբուկո» նախագծի համար, որը նախատեսում է նոր կառուցվելիք գազամուղով Կենտրոնական Ասիայից գազը հասցնել ԵՄ երկրներ, Վրաստանը հուսալի չէ: Այդ պարագայում, ըստ նրա, էապես մեծանում է Հայաստանի դերը և մեր երկիրը պետք է ակտիվ աշխատանքներ տանի, որպեսզի «Նաբուկոյի» մի ճյուղը Հայաստանով անցնի:

«Դա բոլորից լավ հասկանում են Թուրքիայում, սակայն Ադրբեջանը կտրականապես դեմ է նման հեռանկարին» ասաց Ս. Գրիգորյանը, հավելելով, որ եթե հնարավոր լինի այդ խնդրում ընդհանուր հայտարարի գալ Թուրքիայի հետ, խնդիրը հնարավոր է և լուծում ստանա:|

Ինչ վերաբերում է ՆԱՏՕ-ին ինտեգրվելու Հայաստանի հեռանկարին, քաղաքագետն ասաց. « Ես ասել ու ասում եմ, որ ռազմավարական իմաստով, Հայաստանի տեղը ՆԱՏՕ-ն է, սակայն այսօրվա փոփոխվող աշխարհում դրան շատ լուրջ պետք է մոտենալ: Մենք պետք է կարողանանք բալանսավորված քաղաքականություն վարել»: Նրա ներկայացմամբ, Վրաստանի կողմից դեպի ՆԱՏՕ ուղղված կոշտ քաղաքականությունը, որը ոչ մի այլընտրանքի տեղ չէր թողնում, բերեց նրան, որ, ի վերջո, «եկան հարվածեցին նրան»:

Սա հաշվի առնելով, Ս. Գրիգորանը կարծիք հայտնեց, որ ճկուն դիվանագիտություն վարելու համար շատ երկրներում ասենք նախագահն ու վարչապետը լինում են տարբեր քաղաքական ուժերի ներկայացուցիչներ ու կարողանում են անհրաժեշտ պահին, անել անհրաժեշտ հայտարարություններ: