Ձեր վստահելի աղբյուրը

Կրթության և գիտության նախարարությունում այսօր կնքվեց քառակողմ փոխըմբռնման հուշագիր` Նորվեգիայի կառավարության կողմից ‎‎ֆ‎ինանսավորվող «Միասին ապրել, միասին սովորել» եռամյա ծրագրի իրականացմանը օժանդակելու վերաբերյալ: Հուշագիրը ստորագրեցին Կրթության և գիտության նախարարի տեղակալ Բագրատ Եսայանը, Տավուշի մարզպետի տեղակալ Լևոն Սարգսյանը, «Առաքելություն Արևելք» դանիական մարդասիրական կազմակերպության հայաստանյան մասնաճյուղի տնօրեն Կիմ Հարցները և «Հույսի կամուրջ» հասարակական կազմակերպության նախագահ Սուսաննա Թադևոսյանը:

Բագրատ Եսայանը նշեց, որ ծրագրի իրականացման երեք տարիների ընթացքում Տավուշի մարզում բոլոր դպրոցները կիրականացնեն ներառական կրթություն: Նրա խոսքով, ծրագրի նպատակն է ստեղծել օրինակելի մոդելներ և մեխանիզմներ, որոնք հավասար հնարավորություններ են տալիս հաշմանդամ և կրթության առանձնահատուկ պայմանների կարիք ունեցող երեխաներին` ստանալու կրթություն և լիարժեք ներգրավվելու համայնքային հարաբերություններում: «Այս ծրագիրը կնպաստի հանրապետությունում ընդլայնել ներառական դպրոցների ցանկը: Այժմ հանրապետությունում ներառական կրթություն է իրականացվում 31 դպրոցում, որը շատ քիչ է Հայաստանի համար»,- հավելեց նա: Ծրագրի ընդհանուր արժեքն է` 850.000 եվրո:

Փոխնախարարի խոսքով, ծրագրի խնդրիներ են Տավուշի մարզում ստեղծել ներառական կրթության զարգացման համակողմանի մի մոդել, որը հնարավոր կլինի հետագայում ներդնել ՀՀ մյուս մարզերում և քաղաքներում:

Ծրագրի միջոցով իրականացվելու է կրթության առանձնահատուկ պայմանների կարիք ունեցող երեխաների հայտնաբերման և գրանցմանգործընթացը, ինչպես նաև փորձարկվելու է նրանց տվյալների հավաքագրման բազան, որը հիմք կարող է հանդիսանալ կրթության առանձնահատուկ պայմանների կարիք ունեցող երեխաների տվյալների ազգային բազայի ստեղծման համար: Ծրագիրը հնարավորություն է տալու աջակցել կրթության և գիտության նախարարությանը` մշակելու և կամ լրամշակելու ներառական կրթության որակի չափանիշներ և գնահատման մեխանիզմներ, օրենսդրական և նորմատիվ փաստաթղթեր, որոնք կխթանեն ՀՀ-ում ներառական կրթության կայուն զարգացումը, ինչպես նաև կրթության առանձնահատուկ պայմանների կարիք ունեցող երեխաների կրթության մատչելիությունը և որակը:

Ծրագիրը աջակցելու է ԿԳՆ Կրթության ազգային ինստիտուտին` վերապատրաստել Երևանի և բոլոր մասնաճյուղերի վերապատրաստողներին` հետա‎գայում հանրակրթական դպրոցների ներառական կրթության իրականացման և կարողությունների հզորացման վերապատրաստումները շարունակելու նպատակով: Ինչպես նաև զարգացնել ԿԳՆ ժշկահոգեբանամանկավարժական գնահատման կենտրոնի աշխատակազմի կարողությունները` արդյունավետ համակարգելու Հայաստանում երեխաների կրթության առանձնահատուկ պայմանների կարիքի գնահատման աշխատանքները և կրթական կարիքի գնահատման ու կրթության կազմակերպման հարցերի վերաբերյալ անհրաժեշտ խորհրդատվություն իրականացնելու դպրոցների և հոգեբանամանկավարժական ծառայությունների մասնագետների համար:

«Առաքելություն Արևելք» դանիական մարդասիրական կազմակերպության հայաստանյան մասնաճյուղի տնօրեն Կիմ Հարցները նշեց, որ դեռևս 2003 թվականից իրականացրել են մոտ 1 մլն դոլար արժողությամբ տարբեր ծրագրեր` Հայաստանում ներառական կրթության զարգացման համար: Նրա խոսքով, այդ ծրագրերի շնորհիվ է, որ այսօր շուրջ 31 դպրոցում իրականացվում է ներառական կրթություն: «Այս ծրագրի շրջանակներում վերապատրաստվելու են Տավուշի մարզի այն ուսուցիչները, որոնք դպրոցներում կիրականացնեն ներառական կրթություն»,- հավելեց նա: