Ձեր վստահելի աղբյուրը

«Կենգուրու» միջազգային մաթեմատիկական մրցույթին մասնակցության հայտ է ներկայացրել հանրապետության շուրջ 400 դպրոց: Այս մասին Panorama.am-ին հայտնեց «Կենգուրու» միջազգային մաթեմատիկական մրցույթի ծրագրերի համակարգող Վիգեն Շիրվանյանը: Նշենք, որ «Կենգուրու»-ին  մասնակցության ամրագրման վերջնաժամկետ է սահմանվել փետրվարի 2-ը:

Վ. Շիրվանյանի խոսքով, ակնկալվում է, որ մրցույթին կմասնակցի մոտ 20 հազար աշակերտ. դպրոցներից պահանջվել է մինչև մարտի 6-ը ներկայացնել վերջնական ճշտված մասնակից աշակերտների թիվը: Երկուշաբթի օրը բոլոր մասնակցության հայտ ներկայացրած դպրոցներին կուղարկվեն  փաթեթներ, որտեղ նշված են մրցույթի մասնակցության կանոնները, պայմանները, մրցույթի մասնակցության համար մուծվող գումարի բանկային հաշվեհամարը, ինչպես նաև 2008 թվականի մրցույթի ամբողջ խնդիրների ցանկը:

Վ. Շիրվանյանը նշեց, որ մրցույթին մասնակցելու համար յուրաքանչյուր երեխա պետք է մուծի 970 դրամ: Նա վստահեցրեց, որ մրցույթին մասնակցելու համար սահմանված գումարը «Կենգուրու առանց սահմանների» միջազգային ասոցիացայի պահանջն է: Մասնակցության համար մուծվող գումարն ամբողջությամբ օգտագործվում է մրցույթի կազմակերպման, մրցույթի մասնակիցների և հաղթողների համար հուշանվերներ գնելու համար:

Մրցույթի ծրագրերի համակարգողը հայտնեց, որ մասնակից բոլոր դպրոցներն ու աշակերտները կստանան մասնակցության հավաստագրեր և փոքրիկ հուշանվերներ, լավագույն արդյունքներ ցուցաբերած երեխաները կարժանան պատվոգրերի, հատուկ մրցանակների, իսկ մրցույթի հաղթողները կմասնակցեն ամենամյա միջազգային ամառային ճամբարների, որոնք կազմակերպվում են «Կենգուրու առանց սահմանների» միջազգային ասոցիացիայի անդամ եվրոպական երկրներից որևէ մեկում: Հիմնականում ճամբարները անցկացվում են Ռումինիայում, Բուլղարիայում, Ֆրանսիայում: Այդ ճամբարում 8-12 օր հանգստանում են մրցույթին մասնակցած բոլոր երկրների հաղթած երեխաները:

Նշենք, որ 12 տարեկանից ցածր հաղթողներին չեն թույլատրում գնալ ճամբար, նրանք ստանում են համարժեք պարգևներ իրենց երկրներում:

Մրցանակների են արժանանում նաև մարզերում ամենաակտիվ մասնակցություն դրսևորած դպրոցները:

«Կենգուրու»-ին կարող են մասնակցել 3-րդից 11-րդ դասարանցիները: Վ. Շիրվանյանը նշեց, որ մրցույթին մասնակցելու համար փայլուն մաթեմատիկական գիտելիքներ չեն պահանջվում, քանի որ խնդիրները հիմնված են տրամաբանության և խաղերի սկզբունքի վրա:

Նրա խոսքով, մրցույթի նպատակն է նոր լիցք հաղորդել Հայաստանում անցկացվող առարկայական մրցույթներին և օլիմպիադաներին: «Ինչպես նաև քաջալերել կրթական համակարգում մաթեմատիկա առարկայի զարգացումն ու տարածումը, բարձրացնել աշակերտների հետաքրքրությունը մաթեմատիկա առարկայի հանդեպ, նպաստել աշակերտների ակտիվ մասնակցությանը միջազգային մրցույթներին, օգնել երեխաների ներուժի բացահայտմանը և նրանց ինքնադրսեւորմանը»,- հավելեց մրցույթի ծրագրերի համակարգողը:

Վիգեն Շիրվանյանի խոսքով, «Կենգուրու» մրցույթի առավելությունն այն է, որ այն մատչելի է բոլոր երեխաներին` անկախ առաջադիմությունից: Այն բանաձևերի իմացություն չի պահանջում: Մրցույթի մասնակցության համար նախնական փուլ չկա, այն անցկացվում է դպրոցում` երեխաների համար հարազատ միջավայրում: Մրցույթը իրականացվում է նույն օրը մրցույթի մասնակից բոլոր դպրոցներում, և վերջապես մաթեմատիկան առավել գրավիչ ու սիրելի է դարձնում:

«Կենգուրու 2009»-ը անցկացվելու է մարտի 19-ին: Այս մրցույթին ամեն տարի մասնակցում է ավելի քան 5 միլիոն երեխա, աշխարհի մոտ 50 երկրներից: «Կենգուրուն» կազմակերպում են «Այբ» կրթական հիմնադրամը` ՀՀ կրթության և գիտության նախարարության հովանու ներքո:

Նշենք, որ 2008թ. մայիսին «Այբ» կրթական հիմնադրամը Հայաստանում անցկացրեց «Կենգուրու» առաջին փորձնական մրցույթը, որին մասնակցեցին 6 դպրոցների 3-11-րդ դասարանցի 639 աշակերտներ Երևանից, Գյումրիից ու Վանաձորից: Նրանք բոլորն էլ ստացել են հավաստագրեր, իսկ 46-ն արժանացել նաև պատվոգրերի, 4-ը գերազանց, 42-ը` լավ արդյունքների համար:

Անցած տարի հոկտեմբերին Հայաստանը` ի դեմս «Այբ» կրթական հիմնադրամի, դարձավ «Կենգուրու առանց սահմանների», ասոցիացիայի անդամ, որը հնարավորություն տվեց այս տարի անցկացնել այդ մրցույթը: Նշենք, որ «Կենգուրու» մրցույթը ծնունդ է առել Ավստրալիայում 1980-ականների սկզբին: