Ձեր վստահելի աղբյուրը

ՈՒԵՖԱ-ի պաշտոնական կայքն նոր մանրամասներ է հաղորդել Լատվիա-Հայաստան հանդիպման ընթացքի վերաբերյալ: Մինչ դրանց անդրադառնալը, սակայն, հարկ է շեշտել, որ Հայաստանի ազգային հավաքականի գլխավոր մարզիչ Յան Պոուլսենը գոհ է իր սաների ցուցադրած խաղամակարդակից, սակայն դժգոհ է արդյունքից` համարելով, որ մեր թիմը կարող էր հանդիպումն ավարտել իր օգտին: Դանիացի մարզիչը Ռոբերտ Զեբելյանի և վնասվածք ստացած Սամվել Մելքոնյանի բացակայության պայմաններում ստիպված էր հարձակողական այլ երկյակ կազմել` վստահելով Գևորգ Ղազարյանին և Դավիթ Մանոյանին, իսկ ահա Լատվիայի ընտրանու գլխավոր մարզիչ Ալեքսանդր Ստարկովը չէր պատրաստվում ոչ մեկի զարմացնել և հավատարիմ էր մնացել իր սկզբունքներին` կապված կազմում քիչ փոփոխություններ կատարելու հետ` անկախ խաղի ստուգողական բնույթից:

Լատվիացիների մեկնարկային կազմը դասական տեսք ուներ: Կիսապաշտպանությունում հանդես էին գալիս միասին հավաքականում ավելի քան 350 հանդիպում անցկացրած Վիտալի Աստաֆևը, Անդրեյ Ռուբինը և Յուրի Լայզանսը, իսկ հարձակման գծում խաղում էին փորձառու Մարիս Վերպակովսկիսը և Գիրտս Կառլսոնսը:

Ստարկովին հասկանալ կարելի է. Նրա հավաքականը, որն աշխարհի առաջնության ընտրական մրցաշարում իր խմբում զբաղեցնում է 4-րդ հորիզոնականը, առջևում երկու կարևոր խաղ ունի Լյուքսեմբուրգի ընտրանու հետ: Լատվիացիները պլանավորում են այդ հանդիպումներում վեց միավոր վաստակել: Հիմնական կազմը, որը մեր հավաքականի հետ խաղում ասպարեզ մտավ հենց սկզբից, այս պահի դրությամբ օպտիմալն է, և, դատելով ամեն ինչից, հենց այս տեսքով Լատվիայի հավաքականը կնախապատրաստվի լյուքսեմբուրգցիների հետ հանդիպումներին: Սակայն նույնիսկ այս կազմով մրցակիցը ոչ մի անլուծելի խնդիր չկարողացավ առաջադրել մեր թիմի պաշտպանությանը, որը պարզապես անթերի էր գործում:

Ըստ ՈՒԵՖԱ-ի պաշտոնական կայքի թղթակցի` հանդիպման առաջին խաղակեսում ուժերը հավասար էին: Ոչ մեծ առավելություն ուներ Լատվիայի ընտրանին, բայց գործը գոլային ռեալ պահերի չէր հասնում: Աչքի ընկնելու լավ հնարավորություն ուներ Մարիս Վերպակովսկիսը, սակայն երկու անգամ իսպանական «Սելտայի» հարձակվողի սպառնալիքները չեզոքացրեց Գևորգ Կասպարովը: Առաջին կեսի վերջնամասում արդեն խաղի մեջ մտավ լատվիացիների դարպասապահը` հետ մղելով Արարատ Առաքելյանի վտանգավոր հարվածը:

Ընդմիջումից հետո Լատվիայի հավաքականի առավելությունն անհետացավ: Խաղը հավասարվեց, և հանդիպումն սկսեց ընթանալ փոխնիփոխ գրոհների նշանաբանով: Պոուլսենի, սաներն ավելի կազմակերպված էին ու նպատակամղված: Մեր հավաքականի մի քանի գրոհներ կարող էին հանգեցնել ցանկալի արդյունքի, սակայն հերթական անգամ իրեն լավագույն կողմերով դրսևորեց Վանինը: «Վենտսպիլսի» դարպասապահը հետ մղեց կարճ և միջին տարածությունից կատարված մի քանի տհաճ հարված:

Լատվիա-Հայաստան խաղում դարպասապահներն ու պաշտպաններն ավելի ուժեղ էին, քան հարձակվողները: Ճիշտ է` հանդիպման ավարտից 5 րոպե առաջ Արտյոմ Ռուդնևը կարող էր հաղթանակ պարգևել իր թիմին, սակայն նրա հարվածից հետո փայլուն խաղ ցուցադրեց Գևորգ Կասպարովը: ՈՒԵՖԱ-ի կայքի համար կատարած իր մեկնաբանության մեջ Լատվիայի ֆուտբոլի ֆեդերացիայի գլխավոր քարտուղար Յանիս Մեժեցկիսը խոստովանել է, որ հաշիվը բխում է հանդիպման տրամաբանությունից: «Արդյունքը կարելի է արդար համարել: Մինչև ընդմիջում մենք կարող էինք գոլ խփել: Երկրորդ կեսում հաջողությանն ավելի մոտ էին հայ ֆուտբոլիստները,- նշեց նա:- Ընդհանուր առմամբ` այս խաղը մեզ համար օգտակար ու կարևոր էր բոլոր առումներով»:

Լատվիայի հավաքականի կիսապաշտպան Անդրեյ Ռուբինը, որը հանդես է գալիս ադրբեջանական «Ինտերում», Բաքու վերադարձից հետո հարցազրույց է տվել ապասպորտ.ազ կայքի թղթակցին:

«Կարծում եմ, որ Ադրբեջանի հավաքականը Հայաստանի ընտրանուց ավելի ուժեղ է: Վերջին հանդիպումից հետո ես այդպիսի եզրակացության եմ հանգել: Մենք կարող էինք հաղթել, եթե իրացնեինք գոլային հնարավորությունները: Ցավոք, մեզ դա անել չհաջողվեց»,- ասել է լատվիացի ֆուտբոլիստը:

Իհարկե, այլ կերպ նա չէր էլ կարող արտահայտվել` հաշվի առնելով այն հանգամանքը, որ խաղում է Ադրբեջանի առաջնությունում, և Հայաստանի հավաքականի հասցեին արված յուրաքանչյուր լավ արտահայտություն կարող է ուղղվել իր դեմ: Եվ գիտակցաբար չի խոսում այն մասին, որ նույն հաջողությամբ կարող էին նաև պարտվել, ավելին` փորձում է սիրաշահել ադրբեջանցիներին այդ երկրում սովորական դարձած շողոքորթությամբ: