Ձեր վստահելի աղբյուրը

«Միշտ պետք է պայքարենք, որ ադրբեջանցուն չվերադարձնեն Ադրբեջան: Մենք չունենք դեսպանատուն Հունգարիայիում, բայց տարբեր լծակներով կարելի է այդ հարցը հնչեցնել, որպեսզի չմտածեն, թե մենք մոռացել ենք Գուրգեն Մարգարյանին: Լավ հասկանում ենք, որ նա Ադրբեջան վերադառնալուն պես կստանա ազգային հերոսի կոչում և չի լինի սովորական դատապարտյալ: Սա յուրահատուկ դեպք է: Սա ուղղակի մտադրված սպանություն է և կապ չունի Գուրգենի հետ, սա անմիջական կապ ունի նրա ազգային պատականելիության հետ»,-նշում է «Գուրգեն Մարգարյան» հասարակական բարեգործական հիմնադրամի նախագահ Աշոտ Քոչոյանը:

Հիշեցնենք, որ 2004 թվականի փետրվարի 19-ին վերապատրաստման նպատակով Բուդապեշտում գտնվող ադրբեջանցի Ռ. Սաֆարովը կացնահարել էր հայ սպա Գուրգեն Մարգարյանին ու այդ հանցագործության համար հունգարական դատարանի կողմից դատապարտվել ցմահ ազատազրկման: Արդեն մի քանի տարի է, որ Ադրբեջանը տարբեր մակարդակներով աշխատանքներ է իրականացնում Սաֆարովին Ադրբեջան վերադարձնելու ուղղությամբ:

«Նա ազնիվ ընկեր էր, բարի, կատակասեր»,- հիշում է նրա մանկության ընկերը, որի սեղանին հիմա թղթե մի կապոց կա: Ասում է, որ Գուրգենի մահից հետո այդ թղթապանակի պարունակության իրագործումն են կարևորում:

Ընկերներով ստեղծած հիմնադրամը մի քանի տարի առաջ դիմել է քաղաքապետարան Լենինգրադյան-Լենինական խաչմերուկին հարող տարածքում Գուրգեն Մարգարյանի անունը կրող հուշակոթող և ծառուղի կառուցելու խնդրանքով: Համապատասխան նախագծի մշակման և ավարտին բերելուց հետո ներկայացված փաստաթղթերի հիման վրա նշված տարածքում քաղաքապետարանը հիմնադրամին է հատկացրել մոտ երեք հազար քռ. կմ հողակտոր:

«Ցավալի էր, որ ինչ-որ բաներ չէր ստացվում, բայց միշտ ետ չենք կանգնել մեր մտքերից»,-Panorama.am-ի հետ զրույցում նշեց հիմնադրամի նախագահը: Ըստ նախագծի, ծառուղում կկանգնեցվի Գուրգեն Մարգարյանի հուշարձանը: Այն կլինի բազալտից, կունենա հինգ մետր բարձրություն և երեք և կես մետր լայնություն: Հուշակոթողը խաչի տեսք է ունենալու: Ճարտարապետը Ասլան Մխիթարյանն է:

«Մենք դեռ չգիտենք, թե ինչ տեքստ է լինելու գրված, պիտի որոշենք: Նկարի խնդիրը նույնպես դեռ հստակեցված չէ: Հնարավոր է նաև նկարի փոխարեն ինչ-որ սիմվոլ օգտագործենք: Նախապես ցանկանում ենք ֆինանսներ հայթայթել հուշաքարի համար, որը մոտ 10 միլիոն դրամ է պահանջում, իսկ ամբողջ այգին կառուցելը կարժենա 75 միլիոն դրամ: Այն կլինի զբոսավայր, խաղահրապարակ չի լինի: Ի դեպ միշտ ստացել ենք աջակցություն: Հիմա պատրաստվում ենք տարբեր տեղեր դիմել: Թե որքան կտևի` չեմ կարող ասել»,-նշեց պարոն Քոչոյանը:

Նախատեսվող այգու ծառուղու յուրաքանչյուր ծառ կկրի Երևանի Աջափնյակ համայնքում բնակվող և Ղարաբաղյան պատերազմում զոհված մարտիկների անունները:

Ինչ վերաբերում է սպանության հինգերորդ տարելիցին, Գուրգեն Մարգարյանի անունը կրող մանկապարտեզում և դպրոցում կանցկացվեն միջոցառումներ, որից հետո ընկերները, հարազատները, դպրոցականները կայցելեն Եռաբլուր` զոհված սպայի շիրմին հարգանքի տուրք մատուցելու: