Ձեր վստահելի աղբյուրը

Նախագահ Սերժ Սարգսյանն այցելեց «Լիկվոր» դեղագործական ձեռնարկություն, ուր անձամբ ծանոթացավ արտադրության գործընթացին, շրջեց ձեռնարկության արտադրամասերում:

«Լիկվոր» դեղագործական ընկերությունը հիմնադրվել է 91-ին և սկսել է գործել հիվանդանոցային մի սենյակում, այնուհետև ընդլայնել է իր գործունեությունը: Ընկերությունն արտադրում է ներերակային, ակնաբուժական և ներարկման ստերիլ դեղամիջոցներ: Եվրոպական զարգացման և վերակառուցման բանկի կողմից կատարած ներդրումների հաշվին` ընկերությունը ձեռք է բերել գերմանական հոսքագիծ, ինչը հնարավորություն է տվել ընդլայնել արտադրանքի տեսականին: Ընկերության կողմից առաջարկվող դեղերի անվանացանկը ընդգրկում է 60 անուն դեղորայք և պլանավորում է ընդլայնել իր արտադրանքի տեսականին տարեկան 3-5 նոր դեղամիջոցներով: Ընկերությունում նախատեսում են կառուցել նաև նոր գործարան:

«Նախագահի այցը հիմնականում կապված է մարտի ութի հետ, քանի որ մեր աշխատակազմի գերիշխող մասը կանայք են»,-ասաց «Լիկվոր» դեղագործական ընկերության տնօրեն Սերգեյ Մաթևոսյանը և նշեց, որ դրսի շուկաների հետ հարաբերություններում ռեցեսիան իրեն զգացնել է տալիս, իսկ ներքին շուկայում դեռ պահպանում են արտադրության և վաճառքի տեմպերը:

Գնային քաղաքականության հետ կապված տեղական արտադրող ընկերության տնօրենը նշեց, որ իրենց կողմից որևէ թանկացումներ չեն լինելու: Ընկերության տնօրենը նաև ասաց, որ ԱՊՀ երկրներ արտահանվող դեղամիջոցները մրցունակ են:

83 հիմնական և 107 ընդհանուր աշխատող ունեցող ընկերությունը հիմա նաև դիմել է ՀՀ կառավարությանը` 2.4 մլն ԱՄՆ դոլարի չափով վարկի տեսքով աջակցություն ստանալու համար: Այդ գումարից 1.8 մլն ԱՄՆ դոլարը նախատեսվում է ծախսել արտադրական մասնաշենքի շինարարարկան աշխատանքերի վրա:

«Բիզնես ծրագիրը, որը ներկայացրել է ընկերությունը, նոր ձեռնարկության կառուցումն է, որը մեր կարծիքով երկու տիպի խնդիր կարող է լուծել` բարձր գիտատար արտադրություն և արտահաման խթանում: Այս ոլորտի հետ կապված լուրջ վերլուծություններ են իրականցվել, արտահանելիության տեսնակյունից կարևոր երեք ոլորտներ կան`տեղեկատվական բարձր տեխնոլոգիաներ, զբոսաշրջություն և դեղագործություն, որը ընդլայնվելու հնրավորություն ունի»,-ասաց ՀՀ էկոնոմիկայի նախարար Ներսես Երիցյանը:

Նախարարը ասաց նաև, որ ընկերության ներկայացված բիզնես ծրագիրը կառավարության օժանդակ օպերատիվ շտաբում քննարկել են, կքննարկվի նաև կառավարությունում, իսկ քննարկման փուլում ճշտվում են ծրագրի հետ կապված ռիսկերը, ակնկալիքները, երաշխիքները:

«Շատ գոհ եմ աշխատանիքից: Նախագահը նվիրեց շատ, շատ գեղեցիկ ծաղիկներ, նաև առաջին շնորհավորողը նախագահն էր և մեզ մաղթեց լավ տրամադրություն, հաջողություն և միշտ գեղեցիկ լինել»,- ասաց ընկերության որակի վերհսկման բաժնի պետ Գայանե Պեպանյանը:

Վերջում աշխատակիցներին հուշ մնաց նաև նախագահի հետ լուսանկարը: