Ձեր վստահելի աղբյուրը

Արժույթի միջազգային հիմնադրամի Գործադիր խորհուրդը նախօրեին հաստատեց 28 ամիս տևողությամբ 368 միլիոն ՍԴՌ-ի (շուրջ 540 միլիոն դոլար) Օժանդակության վարկային ծրագիրը: Այս մասին հայտնեցին ԱՄՀ-ից:

Նշենք, որ վարկը միտված է գլոբալ ճգնաժամի հետևանքների հաղթահարմանը, ազգային արժույթի և ֆինանսական համակարգի նկատմամբ վստահության վերականգմանը և կարիքավոր խավերի պաշտպանությանը: Ծրագրի հաստատման արդյունքում Հայաստանին անմիջապես հատկացվելու է 161.5 միլիոն ՍԴՌ (շուրջ 237 միլիոն դոլար), իսկ վարկի մնացած գումարը կտրամադրվի 9 մասնավճարներով` ըստ եռամսյակային դիտարկումների: Օժանդակության վարկը, կազմելով Հայաստանի բաժնեչափի շուրջ 400 տոկոսը, ԱՄՀ-ի միջոցներից օգտվելու բացառիկ հնարավորություն է: Այն հաստատվել է ԱՄՀ-ի Հատուկ ֆինանսավորման մեխանիզմների գծով արագացված ընթացակարգի համաձայն:

Հայաստանի կառավարության ծրագիրը հիմնված է մի շարք հետևողական միջոցառումների վրա, որոնք իրականացվում են փոխարժեքի, դրամավարկային, ֆինանսական և հարկաբյուջետային քաղաքականությունների գծով և շարունակական կառուցվածքային բարեփոխումների ծրագրի ներքո:

Ծրագրի գերակայություններն են` վերադարձ ճկուն փոխարժեքային քաղաքականության, ֆինանսական հատվածի հզորացում` կայունություն և վստահություն ապահովելու նպաատկով, մակրոտնտեսական կայունացման նպատակով հարկաբյուջետային գերակայությունների վերանայում, միևնույն ժամանակ ապահովելով սոցիալական ծախսերի և պետական ներդրումների անհրաժեշտ մակարդակը, հարկային եկամուտների հավանական թերհավաքագրման պայմաններում:

Կանխատեսվում է, որ 2009 թ. համախառն արտաքին ֆինանսավորման գծով Հայաստանի պահանջարկը կազմելու է մոտ 1.6 միլիարդ դոլար, ընդ որում աճի միտումը որոշ դանդաղեցմամբ կպահպանվի մինչև 2011 թվական: Աջակցության վարկը թույլ կտա 2009-2011 թթ. ընթացքում զգալիորեն կրճատել ֆինանսական ճեղքվածքը: Լրացուցիչ ֆինանսավորում կտրամադրվի նաև դոնոր կազմակերպությունների և միջազգային գործընկերների, այդ թվում` Համաշխարհային բանկի կողմից:

Գործադիր խորհրդի կողմից Հայաստանյան քննարկման ավարտից հետո ԱՄՀ-ի Գործադիր փոխտնօրեն և նախագահի պաշտոնակատար պարոն Մուրիլո Պորտուգալն աել է.

«Անբարենպաստ համաշխարհային զարգացումներից ելնելով 2009 թ. սպասվում է իրական աճի կրճատում, որը պայմանավորված է Ռուսաստանում և այլ հարևան երկրներում արձանագրված տնտեսական անկումով: Միջազգային գների, տնտեսական աճի անկումը, ինչպես նաև ազգային դրամի արժեզրկումը կնպաստեն արտաքին ընթացիք հաշվեկշռի պակասուրդի կրճատմանը: Միջնաժամկետ հեռանկարը շարունակում է բարենպաստ մնալ: Սակայն Հայաստանը խոցելի է տարածաշրջանային հնարավոր հետագա տնտեսական անկման և քաղաքական լարվածության առջև:

Արժեզրկման պատճառով առաջացող գնաճային ճնշումներին դիմաակայելու և դրամային արտահայտությամբ ակտիվների նկատմամբ պահանջարկը խթանելու նպատակով անհրաժեշտ է իրականացնել կոշտ դրամավարկային քաղաքականություն:

Թեպետ քիչ հավանական է, որ արժեզրկումը բացասաբար կանդրադառնա նաև ֆինանսական հատվածի վրա, սակայն նման զարգացումները կանխելու նպատակով մշակվել են համապատասխան ծրագրեր: Եկամուտների հավանական թերհավաքագրման պայմաններում, կշարունակվի իրականացվել շրջահայաց հարկաբյուջետային քաղաքականություն, ոչ-առաջնահերթ ծախսերի կրճատման շնորհիվ կապահովվեն բյուջեի սոցիալական ծախսերը և պետական ներդրումները:

ԱՄՀ-ն վստահ է, որ Հայաստանի իշխանությունների կողմից իրականացվող քաղաքականությունները հետևողական բնույթ են կրում և դրված են ամուր հիմքերի վրա»: