Ձեր վստահելի աղբյուրը

Համաձայն aysor.am-ի տվյալների, արդեն մի քանի օր է` Հայաստանում են գտնվում վրացական երկու հեռուստաընկերությունների նկարահանող խմբեր: Գործուղման նպատակն է «հավաքել տեսանյութեր», որոնք պետք է հաստատեն Վրաստանի նախագահի քարոզչական այն մոդելը, ըստ որի «ճգնաժամի պայմաններում հարևաններն ապրում են ավելի վատ, քան վրացիները»:

Վրացի հեռուստալրագրողներին այս պահին հաջողվել է հավաքել մի քանի տասնյակ րոպե տևողությամբ արխիվային կադրեր, նկարահանել շինարարությունը կիրակի օրերին, պանորամայով նկարել Նաիրիտ գործարանը և մի քանի հարցազրույց անցկացնել արմատական ընդդիմության ներկայացուցիչների և քաղաքականացված տնտեսագետների հետ: Դատելով ամեն ինչից, առաջիկայում վրացական մի շարք հեռուստաընկերություններով, ինչպես նաև ակումբներում ու դպրոցներում կցուցադրվի մի ֆիլմ այն մասին, թե «ինչքան վատ է հարևան Հայաստանում» «հերոսական նախագահի գլխավորությամբ պայքարող» Վրաստանի համեմատ: Ընդ որում, նախատեսվում է քարոզչությունն իրականացնել անձամբ Սահակշվիլու կողմից հնչեցված տարօրինակ մի միֆի շրջանակում, ըստ որի Վրաստանը խափանված շարժիչով առագաստանավ է:

Վրաստանի նախագահի մոտ իր երկրի վերաբերյալ նման պատկերացումը ձևավորվել է նախորդ տարվա դեկտեմբերին: Civil.Ge վրացական լրատվական կայքէջի տեղեկատվության համաձայն, նախագահ Սահակաշվիլին աշխարհի տնտեսական ծանր իրավիճակի մասին փոքր և միջին բիզնեսի ներկայացուցիչներին պատմել է դեռ 2008-ի դեկտեմբերի 11-ին: Հենց այդ ժամանակ Սահակշվիլին հայտարարեց, որ վերջերս այցելել է Լատվիա, Ուկրաինա և Կատար:

Վրաստանի նախագահի խոսքով, «Լատվիայում անկում է ապրել բանկային ողջ համակարգը, երկիրը գտնվում է դեֆոլտի մեջ»: «Հունգարիան մոտ է դեֆոլտի վտանգին, Չեխիայում կատաստրոֆիկ խնդիրներ կան, վերջերս ես եղել եմ մեր հարևան Ադրբեջանում և գրեթե 100 տոկոսով դադարեցված է շինարարությունը…Ես եղել եմ Կատարում, որտեղ մեկ շնչին ընկնող եկամուտը 40 անգամ ավելի է, քան Վրաստանում, և այնտեղ գործնականորեն շինարարությունը դադարեցված է»:

«Մեր փոքրիկ նավը մտնում է այնպիսի փոթորկի մեջ, որտեղ ավելի մեծ նավեր կարող են խորտակվել»,-ասել է Սահակշվիլին: «Ուստի մեր խնդիրն է, մինչև այդ փոթորկում հայտնվելը, ինչպես արդեն հայտնվել է Ուկրաինան, որտեղ արդյունաբերության մեծ մասը գրեթե կանգ է առել, ինչպես հայտնվել է Ռուսաստանը Վրաստանի հետ պատերազմից հետո, որտեղ բորսաների 80 տոկոսը անկում են ապրել, իսկ աշխատավարձերի պարտքերը կազմում են տնտեսության 13 տոկոսը, մեր նավի վրա պետք է կատարենք փոփոխություններ. հանենք առագաստները, վերանորոգենք շարժիչը, յուղենք բոլոր մասերը, որպեսզի մեր նավը լինի ավելի դիմացկուն, քան որևէ մեծ նավ, և որպեսզի Տիտանիկի ճակատագիրը մեզ բաժին չընկնի»: