Ձեր վստահելի աղբյուրը

Նախագահ Սերժ Սարգսյանը մարտի 13-ի երեկոյան հանդիպում է ունեցել աշխատանքային այցով Հայաստան ժամանած Բելառուսի Նախագահ Ալեքսանդր Լուկաշենկոյի հետ:

Հայաստանի նախագահը ողջունել է Բելառուսի իր գործընկերոջ այցը մեր երկիր և նշել, որ հայերն ու բելառուսները երկար տարիներ ապրել են նույն պետության մեջ, իսկ անկախություն ձեռք բերելուց հետո մաս են կազմել միևնույն անվտանգության համակարգի` անդամակցելով Հավաքական անվտանգության պայմանագրի կազմակերպությանն, ինչն առանձնակի նշանակություն է տալիս երկկողմ հարաբերություններին:
Նախագահի մամլո գրասենյակի հաղորդմամբ, Սերժ Սարգսյանը միաժամանակ ասել է, որ կան որոշ հարցեր, որոնց քննարկումն ավելի արդյունավետ կարող է լինել առաջին դեմքերի մակարդակով` հատկապես ներկա միջազգային ֆինանսատնտեսական ճգնաժամի պայմաններում, երբ տնտեսական հարաբերությունները դրական ազդակների կարիք ունեն, և երկու երկրներում մեծ ջանքեր են գործադրվում ճգնաժամի հետևանքները մեղմելու համար:

Ալեքսանդր Լուկաշենկոն շնորհակալություն հայտնելով ջերմ ընդունելության համար, նշել է, որ ժամանել է բարեկամ երկիր: Նրա խոսքով, Բելառուսը և Հայաստանը շատ սերտ գործընկերներ են, և չունեն բանակցությունների համար փակ թեմաներ` սկսած ռազմաքաղաքական համագործակցությունից վերջացրած տնտեսական, ֆինանսական, առևտրի խնդիրներով:

Երկու երկրների ղեկավարները քննարկել են փոխադարձ հետաքրքրություն ներկայացնող հարցերի լայն շրջանակ, մասնավորապես անդրադարձել առևտրատնտեսական կապերի ակտիվացմանը, միջազգային կառույցների շրջանակում սերտ գործակցությանը: Նրանք երկկողմ հարաբերությունների զարգացման գործում մեծ դեր են վերապահել նաև բելառուսահայ համայնքին, որը Ալեքսանդր Լուկաշենկոյի խոսքով, լիովին ինտեգրված է երկրի կյանքում:
Հայաստանի և Բելառուսի նախագահները մտքեր են փոխանակել նաև միջազգային հրատապ թեմաների վերաբերյալ: