Ձեր վստահելի աղբյուրը

Հայաստանում անցկացվող «23.5» խորագիրը կրող թուրքական ֆիլմերի փառատոնի շրջանակներում այսօր Մոսկվա կինոթատրոնում փառատոնի ֆիլմաշարի ցուցադրություն էր կազմակերպվել զանգվածային լրատվամիջոցների ներկայացուցիչների համար: Հայաստանում թուրքական ֆիլմերի փառատոնը սկսվել է մարտի 13-ին և շարունակվելու է մինչև մարտի 31-ը: Փառատոնի ֆիլմաշարը կազմված է վավերագրական, խաղարկային և անիմացիոն կարճամետրաժ Ֆիլմերից: Ֆիլմաշարում ընդգրկված է 7 ֆիլմ:

Խաղաղարար նախաձեռնությունների կովկասյան կենտրոնի նախագահ Գեորգի Վանյանը նշեց, որ «23.5» փառատոնի մեկնարկը նախատեսված էր անցած տարի հունվարին, որպես «Ադրբեջանական օրեր Հայաստանում» աղմկահարույց ծրագիր շարունակություն, սակայն այն կասեցվեց: «Եվ մեր կենտրոնի հետևողական աշխատանքի արդյունքում, վերջապես այն մեկնարկեց այս տարի»,- հավելեց նա:

Փառատոնի ֆիլմերն արդեն դիտել, քննարկել են և իրենց նախընտրած ֆիլմի օգտին ԵՊՀ, Թատրոնի և կինոյի ինստիտուտի, Գեղարվեստի ակադեմիայի և այլ բուհերի ուսանողներ ու դասախոսներ:

Գ. Վանյանի խոսքով, այս փառատոնի նպատակն է երկու երկրների միջև կինոյի միջոցով երկխոսություն սկսել: «Փառատոնը անվանվել է 23.5, քանի որ 23.5-ը ես համարում եմ Հրանդ Դինքի փիլիսոփայության և աշխարհահայացքի փիլիսոփայության անկյունաքարը»,-ասաց նա, նաև կարծիք հայտնելով, թե Հայաստանում Հրանդ Դինքի մասին այդքան էլ տեղեկացված չեն:

Մինչ փառատոնի սկսելը, բոլոր ֆիլմերը ներկայացվել են Երևանի և Նոյեմբերյանի և հարակից սահմանամերձ գյուղերի բարձր դասարաններիի մի խումբ դպրոցականների ու ուսանողների, որոնց կարծիքներն օգտագործվել են ֆիլմերը ներկայացնող պաստառներում: Գ. Վանյանի խոսքով, փառատոնի միակ անվանակարգի` «Հանդիսատեսի համակրանք» մրցանակակիրը որոշվելու է կինոդիտողի քվեարկությամբ:

Նա տեղեկացրեց, որ ֆիլմաշարը դիտումների և նպատակային քննարկումների կազմակերպման համար ընդունվում են հայտեր առանձին խմբերի, կրթական հաստատությունների և մշակութային և այլ հաստատությունների կողմից: Նրա տեղեկացմամբ, արդեն ստացել են հայտեր կրթական հաստատություններից, մշակութային կենտրոններից և մարզերից:

Խաղաղարար նախաձեռնությունների կովկասյան կենտրոնի նախագահը հայտնեց, որ փառատոնի շրջանակներում հայտարարվել են լավագույն հոդվածի մրցույթ` «Հրանտ Դինքը չորրորդ ուղու հայելի» և «Ինչի մասին ենք լռում» վերնագրերով: Լավագույն հոդվածները տպագրվելու են հայերեն, ռուսերեն, թուրքերեն, անգլերեն: Հոդվածների հայտերը ընդունվում են մինչև ապրիլի 15-ը:

Լավագույն 3 հոդվածներին հանձնվելու են մրցանակներ. Առաջին մրցանակի համար սահմանվել է 30 հազար, երկրոդ մրցանակի համար` 20 հազար, իսկ երրորդ մրցանակի համար 10 հազար դրամ: