Ձեր վստահելի աղբյուրը

Ռուսաստանի կողմից Հայաստանին տրամադրվելիք 500 միլիոն կայունացման վարկը հավանաբար Հայաստան կհասնի մայիսի վերջին կամ հունիսի սկզբին: Այս մասին Panorama.am-ին ասաց ֆինանսների նախարարության մամուլի քարտուղար Իրինա Այվազյանը: Կայունացման վարկը պետք է ուղղվի Հայաստանի տնտեսության վրա համաշխարհային ֆինանսատնտեսական ճգնաժամի հետևանքները մեղմելուն:

Նշենք, որ վարկը տրամադրվելու է 15 տարի մարման ժամկետով, որից 4 տարին արտոնյալ է (տոկոսադրույքը՝ Libor+3): Կնքված համաձայնագիրը, ըստ պաշտոնական հաղորդագրություն, չի ենթադրում Հայաստանի կողմից որևէ այլ ոչ ֆինանսական պարտավորությունների կատարում:

Հիշեցնենք, որ փետրվարի 27-ին Մոսկվայում Հայաստանի և Ռուսաստանի վարչապետները համաձայնեցրել էին վարկի ստացման պայմանները: Ռուսաստանի վարչապետ Վլադիմիր Պուտինը հայտարարել էր, որ վարկի տրամադրման համար նախ հարկավոր է, որ Ռուսաստանի վերափոխված բյուջեն հաստատվի Պետական դումայում:

Ի. Այվազյանը նշեց, որ բյուջեն հաստատումից հետո ապրիլի վերջին կստորագրվի վարկ տրամադրելու պայմանագիրը, իսկ մայիսին կամ հունիսին արդեն կտրամադրվի այն: Ի դեպ, Ռուսաստանի կառավարությունը մարտի 19-ին արդեն հաստատել է փոփոխված բյուջեի տարբերակը և ներկայացնել Դումայի քննարկմանը:

Բացի Ռուսաստանի կողմից տրամադրվելիք 500 միլիոն դոլար վարկից, Հայաստանն ակնկալիքներ ունի, որ վարկեր կստանա նաև Ասիական զարգացման բանկից՝ շուրջ 40 միլիոն դոլար, Համաշխարհային բանկից` 50 միլիոն դրամ: Ինչպես օրեր առաջ ասել էին վարչապետ Տիգրան Սարգսյանն ու ֆինանսների նախարար Տիգրան Դավթյանը, առաջիկա երկու շաբաթվա ընթացքում Հայաստանի Կենտրոնական բանկը ՀԲ-ից կստանա այդ գումարը, որը առևտրային բանկերի միջոցով ամբողջությամբ տրամադրվելու է փոքր և միջին բիզնեսի զարգացմանը: