Ձեր վստահելի աղբյուրը

Ֆինանսատնտեսական ճգնաժամի այս պայմաններում Հայաստանի ֆինանսների նախարար Տիգրան Դավթյանը ցանկալի համարեց, որ համաշխարհային տնտեսության ու ֆինանսական համակարգի համար ընդհանուր խաղի կանոններ հստակեցվեն, որոնք պարտադիր կլինեին բոլոր երկրների համար: Ինչպես նախարարը նշեց ասուլիսում, այդպիսի խաղի կանոններ որոշ չափով առկա են:

Խոսքն արժույթի միջազգային հիմնադամի մասին է: «Ասածիս, երեևի ավելի շատ համապատասխանում է արժույթի միջազգային հիմնադրամը, սակայն այն ավելի շատ այդ խաղի կանոնները մոնիտորինգ է կատարում ու կիրառում է այն երկրների նկատմամբ, որոնք արժույթի միջազգային հիմնադրամից վարկային ռեսուրսներ են ստանում»,-նշեց Տ. Դավթյանը:

Նրա հավաստմամբ, այդ ռեսուրսները տրամադրելու ընթացքում է տեղի ունենում մակրոտնտեսական քաղաքականության ճշգրտումը, բանակցություններն ու այս կամ այն ռեժիմների պահպանումը: Այս առիթով, Մոսկվայում կայացած ԱՊՀ երկրների ֆինանսատնտեսական ոլորտի ներկայացուցիչների հանդիպման ժամանակ նշվել է, թե ավելի ցանկալի կլինի, եթե արժույթի միջազգային հիմնադրամի մանդատն ու գործողությունների շրջանակների ավելի ընդլայնում ու հզորացում լինի: Իսկ արժույթների միջազգային հիմնադրամը համաշխարհային բանկի հետ միասին, նախարարի խոսքով, տնտեսական այս վիճակում իր վրա կարող է ավելի մեծ բեռ ու կարգավորման պարտականություններ վերցնել:

Անդրադառնալով Ռուսաստանի՝ Հայաստանին վարկ տրամադրելու թեմային, նախարարը նշեց, որ գործընթացը շարունակվում է նախապես նշված ընթացակարգով: Սակայն վարկի տրամադրման ժամկետի փոփոխություն կլինի, թե՝ ոչ, դա պայմանավորված է Ռուսաստանում իրականացվող ներպետական ընթացակարգերով: «Հիմա Դումա է ներկայացվել Ռուսաստանի բյուջեի փոփոխության տարբերակը, որտեղ ներկայացված է նաև մեր վարկն առանձին տողով ու կարծում եմ, որ բյուջեի քննարկումից ու պետական Դումայի հաստատելուց հետո այն պետք է անցնի նաև Ֆեդերացիայի խորհրդի հաստատմանը, նախագահի կողմից ստորագրվի, ուժի մեջ մտնի բյուջեն, որից հետո համաձայնագիրը ստորագրելու համար իրավական հիմք կլինի»,-նշեց ֆինանսների նախարարը: Իսկ համաձայնագիրը, ամենայն հավանականությամբ, ինչպես նշեց Տ. Դավթյանը, կստորագրվի ապրիլի վերջին կամ մայիսին: Նախարարն այսպիսի սցենարի շարունակության դեպքում հավանական համարեց, որ Հայաստանն այդ վարկը կստանա մայիսի վերջին կամ հունիսին: