Ձեր վստահելի աղբյուրը

Ապրիլի 1-ին որոշ էստոնական լրատվամիջոցներում տեղեկատվություն է հայտնվել, որ Էստոնիայի ֆուտբոլի ֆեդերացիայի նախագահ Այվար Պոխլակը մեղադրել է Հայաստանի ֆուտբոլի ֆեդերացիային ոչ պարկեշտ պահվածքում: Իրավիճակը պարզաբանելու համար ՀՖՖ գործադիր տնօրեն Արմեն Մինասյանն իր մեկնաբանությունն է տվել ՀՖՖ պաշտոնական կայքէջին:

«Դժվար է պատկերացնել, որ Էստոնիայի ֆուտբոլի ֆեդերացիայի նախագահը կարող է իրեն այսպիսի հայտարարություններ թույլ տալ, առավել ևս, որ մենք միշտ լավ, կարելի է ասել` ընկերական հարաբերություններ ենք ունեցել Էստոնիայի ֆեդերացիայի հետ: Իրականում եղել է այսպես. Հայաստանի հավաքականի Տալլին ժամանելուն պես Էստոնիայի ֆեդերացիայի ներկայացուցչուհին հայտնեց մեզ, որ նախորդ օրը Տալլինում անձրևային եղանակ էր, «Ա Լե Կոկ» մարզադաշտը, որտեղ պետք է տեղի ունենա Էստոնիա-Հայաստան հանդիպումը, գտնվում է վատ վիճակում, և, հնարավոր է, հարկ լինի նախախաղային մարզումն անցկացնել այդ մարզադաշտի հարևանությամբ գտնվող արհեստական խոտածածկով դաշտում: Ինչպես և նախատեսված էր, տեղի ժամանակով 17:00-ին Հայաստանի հավաքականը ժամանեց «Ա Լե Կոկ» մարզադաշտ: Եղանակը բարենպաստ էր ամբողջ օրվա ընթացքում, և, մեր կարծիքով, խաղադաշտը նախախաղային մարզում անցկացնելու համար գտնվում էր նորմալ վիճակում: Մեզ թույլատրեցին այնտեղ մարզում անցկացնել, սակայն խնդրելով, որքան հնարավոր է, քիչ վարժություններ կատարել գնդակով: Չհասցրեցին ֆուտբոլիստները դուրս գալ խաղադաշտ, երբ տրիբունաներից մեր պատվիրակության վրա հարձակվեց մի մարդ` վանկարկելով անպարկեշտ խոսքեր, բառացիորեն եմ ասում` негодяи, сволочи: Ինչպես պարզվեց քիչ անց, դա Էստոնիայի ֆուտբոլի ֆեդերացիայի նախագահ Այվար Պոխլակն էր: Ի պատասխան մեր բազմաթիվ խնդրանքներին` չշարունակելու հայհոյանքներն ու դրսևորելու ավելի պարկեշտ պահվածք, ինչը բնորոշ է յուրաքանչյուր կիրթ մարդու, առավել ևս` ցանկացած ֆեդերացիայի նախագահի, նա շարունակեց հարձակվել ֆուտբոլիստների վրա: Միայն ՀՖՖ նախագահ Ռուբեն Հայրապետյանին հաջողվեց նրան հանգստացնել, և ՀՖՖ ղեկավարությունը որոշեց դաշտից դուրս բերել Հայաստանի հավաքականի ֆուտբոլիստներին:

Ինչ վերաբերում է Էստոնիայի ֆուտբոլի ֆեդերացիայի նախագահի` մեր հասցեին հնչեցրած մեղադրանքներին, ապա դրանք պարզապես դատարկ սուտ են և չեն համապատասխանում իրականությանը: Իսկ Այվար Պոհլակի այն հայտարարությանը` «նրանք սպառնում էին, թե ինչ է լինելու մեզ հետ, եթե վիճակահանության արդյունքում մենք ևս մեկ անգամ ընկնենք միևնույն խմբում», ապա ես կցանկանամ ավելացնեմ, որ նա նույնիսկ տեղյակ չէ, որ մեր երիտասարդական և կանանց հավաքականները հայտնվել են միևնույն խմբում, և մենք, հակառակը, էլ ավելի լավ ընդունելություն կկազմակերպենք, որպեսզի նա հասկանա, թե որն է իսկական հյուրընկալությունը: Իսկ, թե ինչպես են դիմավորում հյուրերին Հայաստանում, մենք ցուցադրեցինք էստոնացիներին Երևանում:
Ի դեպ, թե ով է սխալ, իսկ ով` ճիշտ այս պատմության մեջ, փաստում են նաև այն բազմաթիվ ներողություն խնդրող խոսքերը, որոնք հնչեցրեցին մեր էստոնական գործընկերները: Նրանց համար իրենց նախագահի այսպիսի պահվածքը նույնպես անակնկալ էր: Եվ, ընդհանրապես, ինչի մասին կարելի է խոսել, եթե այս մարդը բոլորին է հայտնի իր ոչ համարժեք պահվածքով: Հատկանշական է, որ Պոխլակն այժմ ցանկություն է հայտնել անձամբ հանդիպել ՀՖՖ նախագահ Ռուբեն Հայրապետյանի հետ և ներողություն խնդրել նրանից:

Կցանկանայի ավելացնել, որ այս տհաճ միջադեպից և Էստոնիայի ֆուտբոլի ֆեդերացիայի նախագահի այսպիսի պահվածքից զատ, Էստոնիայի ֆեդերացիայի մյուս բոլոր աշխատակիցների կողմից մեր նկատմամբ ցուցաբերվել է պատշաճ մակարդակի ընդունելություն, ինչի համար ես նրանց հայտնում եմ իմ խորին շնորհակալությունը»: