Ձեր վստահելի աղբյուրը

Գիտությունների ազգային ակադեմիայի տարեկան հաշվետու ժողովի ժամանակ այսօր ՀՀ վարչապետ Տիգրան Սարգսյանը բարձր գնահատելով հաշվետու ժողովի աշխատանքը, նաև նշեց, որ այն գիտության զարգացման առկա հիմնախնդիրների քննարկման հասարակական լայն շրջանակներում երկխոսություն ծավալելու բացառիկ հնարավորություն է, իսկ սկիզբը նախորդ տարվա տարեկան ժողովի ժամանակ հայտարարել է հանրապետության նախագահ Սերժ Սարգսյանը:

Վարչապետը նկատեց, սակայն, որ հանրապետության նախագահի կողմից բարձրացրած ու հասարակական բուռն քննարկումների առարկա դարձած հարցերը դեռևս չեն կորցրել իրենց արդիականությունը: «Ի՞նչպիսին է լինելու ակադեմիայի ապագան, կա մոտեցում, որ ֆունդամենտալ գիտությունը չափազանց ծանր բեռ է Հայաստանի համար. անհրաժեշտ է զբաղվել միայն կիրառական գիտությամբ»,-հարցրեց վարչապետն ու ասաց. «Գիտության ասպարեզում կան շատ բացասական երևույթներ, որոնք պետք է բացահայտել ու դրանց լուծումներ տալ: Մեղադրանք է հնչում, որ ակադեմիայի որոշ ինստիտուտներ չեն կարողանում բավարար արդյունքներ տալ, որոնք կարող են օգտակար լինել հասարակության ու տնտեսության զարգացման համար»: Ըստ Տ. Սարգսյանի, միասնական ուժերով հարկավոր է բոլոր հարցերին սպառիչ պատասխաններ տալ, որոնք պետք է լինեն ոչ միայն խոսքով, այլև՝ գործով:

ԳԱԱ-ի արդիականությունը վարչապետը պետական կարևորության խնդիր համարեց, իսկ նախագահի հանձնարարականը՝ օրենքի նախագիծ մշակելու վերաբերյալ, դրա վառ ապացույցը: Վարչապետը նշեց, որ պետք է կարողանալ բացահայտել հասարակական զարգացումների օրինաչափությունները, ժամանակակից գիտության հիմնական ուղղությունները և Հայաստանի մասնագիտացումը: Տ. Սարգսյանի խոսքով, գիտության որոշ ճյուղերում Հայաստանն «անդառնալի ետ է մնացել» ժամանակակից զարգացումներից, իսկ առանձին ոլորտներում, դեռևս հարաբերական առավելություններ ունի:

«Այժմ Գիտությունների ազգային ակադեմիայից պահանջվում է, որ նա վերածվի Հայաստանի ներսում գիտելիք ինտեգրող ուժի: Դա նշանակում է, որ մենք պետք է համագործակցության մեխանիզմներ ու մթնոլորտ ստեղծենք գիտությամբ զբաղվող սուբյեկտների միջև: Ավելին՝ ակադեմիայից պահանջվում է ինտեգրում աշխարհի լավագույն գիտական կենտրոններին և դրա շնորհիվ՝ մեր հարաբերական առավելությունների իրացնելու հնարավորություն ստեղծել»,-ասաց վարչապետը:

Իսկ ակադեմիայում սփյուռքի բաժնի ստեղծումը նա կարևորագույն ձեռքբերում համարեց: Ըստ նրա, հնարավոր է ասպարեզ ստեղծել, որ գիտությամբ զբաղվել ցանկացողի համար մուտքը ասպարեզ բաց լինի: Բացի այդ, Տ. Սարգսյանը ելույթի վերջում ավելացրեց, որ ակադեմիայի շրջանակներում սերունդների միջև գիտելիքների փոխանցման արդյունավետ մեխանիզմներ պետք է ստեղծվեն, այդ թվում՝ ժամանակակից տեղեկատվական տեխնոլոգիաների օգտագործմամբ:

Նշեն, որ վարչապետի խոսքով, կառավարությունն իր հերթին, պետք է նրան հասնի, որ գիտությունը հասարակության կողմից ընկալվի որպես արժեք: