Ձեր վստահելի աղբյուրը

ՀՀ կրթության և գիտության նախարար Սպարտակ Սեյրանյանը և Բուլղարիայի Հանրապետության կրթության և գիտության նախարարի տեղակալ Կիրչո Աթանասովը այսօր ստորագրեցին «Հայաստանի Հանրապետության և Բուլղարիայի Հանրապետության կառավարությունների միջև կրթության և գիտության բնագավառներում 2009-2012 թթ. համագործակցության ծրագիր»:

Հայ-բուլղարական հարաբերությունները կրթության և գիտության ոլորտում ձևավորվել են դեռևս 1994 թ.-ին` Հայաստանի Հանրապետության և Բուլղարիայի Հանրապետության կառավարությունների միջև ստորագրված համագործակցության հուշագրով: 2006 թ.-ին կնքված համաձայնագրի ժամկետը լրացել էր այս տարի, դրա համար կողմերը ձեռնամուխ են եղել նոր ծրագրի ստորագրմանը` հետագա համագործակցությունը խորացնելու նպատակով:

ՀՀ ԿԳ նախարար Ս. Սեյրանյանը շնորհակալություն հայտնեց իր գործընկերոջը, ինչպես նաև` Բուլղարիայի Հանրապետության կառավարությանն ու ողջ ժողովրդին` Սոֆիայի քաղաքային խորհրդի կողմից Հայոց ցեղասպանության զոհերի հիշատակը հարգելու կապակցությամբ: «Դա ոչ միայն մարդասիրական քայլ է, այլև բարեկամ ժողովրդի և բարեկամ պետության վերաբերմունքը մեր ժողովրդի նկատմամբ` ապրիլի 24-ի նախօրյակին»,- նշեց նախարարը:

Անդրադառնալով ստորագրվող փաստաթղթին` նախարար Ս. Սեյրանյանը շեշտեց, որ նախորդ համաձայնագրի բոլոր կետերը կատարվել են, և որն էլ հիմք է հանդիսացել ստորագրվող ծրագիրը նոր բաղադրիչներով հարստացնելու համար: «Բուլղարիայի ղեկավարությունը լուրջ ուշադրություն է դարձնում Բուլղարիայում ապրող մեր հայրենակիցների հայեցի դաստիարակության խնդիրներին: Բազմաթիվ կրթական հաստատություններում հայերենը ուսումնասիրվում է` որպես մայրենի լեզու, և այս առումով ՀՀ կրթության և գիտության նախարարությունը լուրջ աջակցություն է ցուցաբերել այդ դպրոցներին` ինչպես ծրագրերի և դասագրքերի ապահովման, այնպես էլ ուսուցիչների վերապատրաստման առումով»,- ասաց Ս. Սեյրանյանը:

Ուշադրություն հրավիրեց նաև Սոֆիայի համալսարանում գործող հայագիտական կենտրոնի աշխատանքներին: Աշխատանքների կատարելագործման նպատակով կենտրոնն աշնանը կհամալրվի համապատասխան մասնագետով:

Բուլղարիայի Հանրապետության կրթության և գիտության նախարարի տեղակալ Կիրչո Աթանասովը խորհրդանշական համարեց, որ դեռևս 2006 թ.-ին իրեն էր պատիվ ընձեռվել ստորագրելու համաձայնագիրը: Նա վստահեցրեց, որ եռամյա համագործակցության այս հուշագիրը նոր հեռանկարներ է բացում երկու ժողովուրդների համագործակցության համար:

Երկու երկրների կրթության և գիտության ոլորտի բարձրաստիճան պաշտոնյաները տեղեկացրին նան, որ «Ինֆորմատիկա» առարկայի դպրոցականների միջազգային օլիմպիադան այս տարի կկայանա Բուլղարիայում, որին կմասնակցեն նաև հայ աշակերտները: