Ձեր վստահելի աղբյուրը

««Լույս» հիմնադրամի տնօրենի ընտրությունից անցել է մոտ մեկ տարի, սակայն մինչ հիմա չկա այդ հիմնադրամի ֆիզիկական հասցեն, էլեկտրոնային կայքը, կամ որևէ հեռախոսահամար: Ոչինչ չի արվում, ամեն ինչ բարձիթողի վիճակում է»,- այսօր լրագրողներին իր մտահոգությունը հայտնեց ֆիզիկամաթեմատիկական գիտությունների դոկտոր, ՀՀ ԳԱԱ թղթակից անդամ Արթուր Իշխանյանը:

Ըստ նրա, ՀՀ վարչապետի կողմից երկու տարի առաջ հաստատվել էր «Աշխարհի առաջատար բուհերում բարձրակարգ կադրերի պատրաստման նպատակով ՀՀ և սփյուռքահայ առավել օժտված երեխաների հայտնաբերման և նրանց այդ առաջատար բուհերն ընդունվելուն օժանդակելու ծրագրի հայեցակարգի» ժամանակացույցը, իսկ այդ ծրագրի իրականացման համար մեկ տարի առաջ էլ ստեղծվել է աշխատանքային խումբ և «Լույս» հիմնադրամը: Այս տարի հուվարի 9-ին հիմնադրամի տնօրեն է ընտրվել սփյուռքահայ Ժակլին Կարաասլանյանը, բայց այդ մասին հայտարարվել է հունվարի 25-ին ոչ պաշտոնական ձևով: Նշենք, որ հայեցակարգի հեղինակը Արթուր Իշխանյանն է:

Նրա խոսքով, ուսանողները բազմաթիվ հայտեր են ներկայացնում հենց իրեն, ինքն էլ կառավարությանը, սակայն հայտերը մնում են անպատասխան: «Ես համարում եմ, որ այս ամենը խայտառակություն է և անհեթեթություն»,- հավելեց նա:

Արթուր Իշխանյանը հայտնեց, որ դեռևս 2008 թվականի հոկտեմբերի 1-ին վարչապետը հայտարարել էր, որ 2009 թվականի հունվարի 1-ից հիմնադրամը գործելու է և կրթաթոշակներ է տրամադրելու 2008-2009 ուս տարվա համար, սակայն մինչ այժմ ոչ մի քայլ չի ձեռնարկվել հիմնադրամի գործունեությունը իրականություն դարձնելու համար: «Ծրագրի իրականացման դեպքում պետք է կրթաթոշակ ստանային մոտ 205 ուսանող, որից կեսը պետք է լինեին սփյուռքահայեր»,- հավելեց նա:

ԳԱԱ թղթակից անդամը տեղեկացրեց, որ «Լույս» հիմնադրամին աջակցելու պատրաստակամություն էին հայտնել մի շարք սփյուռքահայ բարերարներ, ինչպես նաև Հայաստանում բնակվող գործարարներ, «սակայն այդ ամենին էլ ուշադրություն չդարձրեցին»:

Նա տեղեկացրեց, որ այս հիմնադրամի գործունեությունն իրականություն դարձնելու համար նույնիսկ մի շարք գիտնականների ստորագրությամբ նամակ են ուղարկել կառավարությանը, որը նույնպես անպատասխան է մնացել:

Արթուր Իշխանյանի խոսքով, արտերկրում սովորելու համար ընտրվել է աշխարհի լավագույն բուհերի ցանկը: «Այդ բուհեր ընդունվելը բավականին դժվար է և հիմնականում այդտեղ ընդունվում են միջազգային օլիմպիադաներին մասնակցած ուսանողները: Ինչ վերաբերում է հայտերի ընտրությանը, ապա բոլոր դիմողներին հնարավորություն էր տրվելու քննություններ հանձնել, իսկ ընդունվելու դեպքում ստանալ պետական կրթաթոշակ: Նախատեսվել էր, որ չի լինելու մասնագիտությունների ընտրության սահմանափակում»,- հավելեց նա:

Արթուր Իշխանյանը հորդորեց փոխել ծրագրի ձևաչափը «Կառավարականից պետք է անցնել նախագահականի` սահմանելով նախագահական կրթաթոշակներ, որպեսզի գործընթացը ավելի արագ լինի և մեկ հրամանագրով հնարավոր լինի այս ծրագիրը իրականացնել»,- հավելեց նա:

Հիշեցնենք, որ համաձայն հայեցակարգի, այն ուսանողները, որոնց պետք է տրամադրվեր կրթաթոշակ, պետք է յուրաքանչյուր տարի 1-ից 2 անգամ մոտ մեկ ամիս տևողությամբ այցելեին հայրենիք, մասնակցեին հայոց լեզվի, պատմության և մշակույթի ինտենսիվ դասընթացներին, նաև լսեն բազմաթիվ վերլուծական դասախոսություններ հանրապետության տարբեր գերատեսչություններում:

Նախատեսվել էր, որ յուրաքանչյուր դիմումի գրացումից հետո 30 օրվա ընթացքում պետք է տեղեկացվեր քննություններին մասնակցելու մասին, որից հետո դիմողը կարող է հանձնել քննությունները: «Այս ամենը մնացել է միայն թղթի վրա»,- ցավով և հիասթափությամբ ասաց Արթուր Իշխանյանը:

ԳԱԱ թղթակից անդամը հայտնեց, որ նման ծրագիր իրականացվում է նաև Վրաստանում և Ադրբեջանում: Այժմ արտերկրում Ադրբեջանից սովորում է 700, իսկ Հայաստանից միայն 80 հոգի: