Ձեր վստահելի աղբյուրը

Հայաստանի հեռահաղորդակցության ոլորտում գործունեության լիցենզիա ստացած «Օրանժ Հայաստան» երրորդ օպերատորը պատրաստվում է այս տարեվերջ շուկա դուրս գալ: Շուկա դուրս գալուն պես, այստեղ հեռահաղորդակցության ոլորտում խոստանում են բաժանորդներին «ծայրահեղ բարձր» որակ ապահովել: «Օրանժ Հայաստան» ընկերության ծրագրերի և գործունեության մասին Panorama.am-ը բացառիկ հարցազրույց է ունեցել ընկերության գլխավոր տնօրեն Բրունո Դյութուայի հետ:

-«Ֆրանս-տելեկոմ»-ն իր «Օրանժ» ապրանքանիշով ի՞նչ նպատակներ և ծրագրեր ունի, որոնք պետք է իրականացնի Հայաստանում:

-Ես փորձեմ մի քիչ ավելի ընդհանրական պատասխանել այդ հարցին, որովհետև մեզ մոտ այդ հարցի որոշ կողմերը կոնֆիդենցիալ են: Մենք այս տարվա ավարտին պետք է մտնենք շուկա և չենք կարող ամբողջությամբ բացահայտել, թե ինչ է լինելու մեր առաջարկությունը: Մենք ընդհանրական օպերատոր ենք լինելու, որի թիրախը լինելու են ինչպես հասարակության բոլոր շերտերը, այնպես էլ կորպորատիվ հաճախորդները: Մենք մեր ուշադրությունը սևեռելու ենք ոչ միայն քաղաքների, այլև Հայաստանի գյուղական համայնքների բնակչությանը: Մեր ծրագրերի փիլիսոփայությունից է ելնում, որ մենք ցանկանում ենք ծառայություններ մատուցել հասարակության բոլոր շերտերին: Մենք ուզում ենք Հայաստան բերել ընդհանուր իմաստով շատ բարձր որակ, և մեր սպառողները պետք է վստահ լինեն, որ Օրանժը Հայաստանում մեծ համաշխարհային խմբի մաս է կազմում:

-Ինչպես հասկացա, դուք ձեր ծառայությունների մասին մանրամասն չեք ուզում խոսել, սակայն ձեր ընկերության կողմից բազմիցս նշվել է Հայաստանում համարների տեղափոխելիության և ազգային ռոումինգ ծառայությունների ներդրման մասին:

-Դուք գիտեք` ինչ է նշանակում ազգային ռոումինգ. օրինակ «Օրանժ»-ի բաժանորդը եթե գտնվեր այնպիսի տարածքում, որտեղ «Օրանժը» չի սփռվում, ազգային ռոումինգի առկայության պարագայում մեր բաժանորդը կկարողանար օգտվել մեկ այլ օպերատորի ծառայություններից: Նման նախագիծ մեզ մոտ առհասարակ գոյություն չունի: Այդ հարցի շուրջ մենք մեր մրցակիցների հետ որևէ բանակցություն չենք վարում: Մեր կարծիքով, մեր բաժանորդի համար դա այնքան էլ մեծ կարևորություն ունեցող երևույթ չէ: Եվրոպական որոշ երկրներում նման ծառայություն եղել է, որովհետև նոր օպերատորը ի վիճակի չի եղել երկրի ողջ տարածքում կապ ապահովել: Բայց «Օրանժ Հայաստան»-ը իր գործունեության առաջին իսկ օրվանից ծածկելու է Հայաստանի ողջ տարածքը:
Համարների տեղափոխելիությունը միանգամայն այլ երևույթ է. սկզբունքն այն է, որ մի բաժանորդը կարող է անցում կատարել մյուս օպերատորին` պահպանելով իր հեռախոսահամարը: Ցանկացած երկրում, ցանկացած բաժանորդի համար դա մեծ առավելություն է, եթե իհարկե, այդ անցման համար նա մեծ գումարներ չի ծախսում: Հանրային ծառայությունները կարգավորող հանձնաժողովը (ՀԾԿՀ), եթե չեմ սխալվում, հունվարին հայտարարեց, որ նրանք նման ցանկություն ունեն այդ ուղղությամբ շարժվելու: Հանձնաժողովը հայտարարեց, որ իրենք աշխատում են այդ հարցի շուրջ և որոշ ժամանակ հետո պետք է քայլեր կատարեն այդ ուղղությամբ: Պետք է ազնիվ լինենք. «Օրանժ Հայաստան»-ը կողջունի նման քայլերը, որոնք նախևառաջ բաժանորդների շահին են ուղղված, նաև նոր բիզնես հնարավորություններ են ստեղծում: Համարների տեղափոխելիություն ծառայությունը գոյություն ունի Եվրամիության շատ երկրներում և ԱՊՀ տարածքում այդ ուղղությամբ առաջին քայլերն են արվում:

-Նշված ծառայությունների ներդրումը ՀԾԿՀ-ի՞ նախաձեռնությունն է:

Այո: Քանի որ երևույթը վերաբերում է բոլոր օպերատորներին, շատ դժվար կլիներ այդ քայլին գնալ երկկողմանի բանակցությունների ճանապարհով: Այդտեղ հանրային շահի խնդիր կա, ու սովորաբար դա բոլոր երկրներում արվում է ոլորտը կարգավորող հանձնաժողովի կողմից:

-Որքա՞ն գումար է մինչ այժմ ընկերությունը ներդրել Հայաստանում գործունեություն իրականացնելու համար, հաշվի առնելով նաև այն հանգամանքը, որ կառավարության մամուլի ծառայության հաղորդագրության համաձայն, դուք վստահեցրել եք, թե շուկայում ներդնելու եք ևս 70 մլն դոլար:

-Մեր խոսքը վարչապետին եղել է հստակ. ասել ենք, որ այս տարվա ընթացքում կներդնենք 75 մլն դոլար գումարած այն 51,5 մլն եվրոյին, որ վճարել ենք լիցենզիայի համար: Հաստատում ենք ևս մեկ անգամ, որ 75 մլն դոլար ներդրումը կլինի այս տարի: Այդ գումարից առաջին եռամսյակում գումարներ ներդրվել են, սակայն երկրորդ եռամսյակում է սկսվելու ներդրումային մեծ փուլը: Նախորդ տարվա նոյեմբերին լիցենզիա ստանալուց հետո աշխատանքները շատ ակտիվ էին և հիմնականում ուղղված էին ռադիոցանցերի, ինժեներական աշխատանքների նախագծմանը: 75 մլն-ի առյուծի բաժինը ծախսվելու է մայիսից նոյեմբեր ընկած ժամանակահատվածում:

-Դուք ծառայությունների բարձր որակի մասին խոսեցիք, կարելի՞ է իմանալ, թե մոտավորապես ինչ ծառայություններ եք մատուցելու, որոնք չեն մատուցում Հայաստանում գոյություն ունեցող երկու օպերատորները:

Շատ դժվար է նախապես ասել, որովհետև իսկապես, կոնֆիդենցիալ է: Բայց մեր խնդիրն է բոլոր հարցերում լինել ծայրահեղ բարձրորակ: Տեխնիկական մասով պայմանագիր ենք ստորագրել «ՆՈԿԻԱ-Սիմենս» ընկերության հետ, որն առաջարկում է աշխարհի ամենաբարձրորակ և ամենաարդիական սարքավորումները: Մենք վստահ ենք, որ տեխնոլոգիայի տեսանկյունից մերը Հայաստանում լավագույնն է լինելու: Բաժանորդների հետ շփումներում, սպասարկման կետերում մենք նույնպես պետք է փորձենք լինել նորարար, դինամիկ և որակի տեսանկյունից էականորեն տարբերվենք մեր մրցակիցներից: Կարծում եմ, որ գին-ծառայություն հարաբերակցության մեջ Հայաստանում դեռևս տարածք կա աշխատելու և ավելի ընդարձակ ծառայություններ առաջարկելու հասարակությանը:

-Իսկ հասարակությանն այդքան պահանջվա՞ծ էր երրորդ օպերատորի գոյությունը, այսինքն, ինչո՞վ էր գրավիչ շուկան, որ «Օրանժ» որոշեց հաստատվել մեր երկրում:

Եթե իմ ընկերությունը որոշել է 51, 5 մլն եվրո վճարել լիցենզիայի համար, ուրեմն հավատում է զարգացման հնարավորություններին: Ես կարծում եմ, որ ամենակարևոր պատճառն այն է, որ Հայաստանի տնտեսությունը զարգացում է ապրելու և մենք հավատում ենք, որ 10-15 տարվա ընթացքում Հայաստանի ՀՆԱ-ն զգալի աճ կարձանագրի: Բացի այդ, մի կողմ թողնելով բջջային կապը, պարզ է, որ Հայաստանում դեռևս հսկայական դաշտ կա ինտերնետի, շարժական ինտերնետի զարգացման համար:

-Հայաստանյան մյուս օպերատորների հետ համագործակցությունն ինչպե՞ս է լինելու:

-Ցանկացած երկրում բոլոր բջջային օպերատորները պարտավոր են համագործակցել: Այսօրվա դրությամբ մեր երկու մրցակիցների հետ մենք շատ նորմալ հարաբերությունների մեջ ենք:

-Համաշխարհային ֆինանսատնտեսական ճգնաժամը որոշակի ազդեցություն ունեցե՞լ է «Ֆրանս-Տելեկոմ» ընկերության վրա:

-«Ֆրանս-Տելեկոմ» խումբը վերջերս հայտարարեց առաջին եռամսյակի իր ցուցանիշների մասին և անցյալ տարվա նույն ժամանակահատվածի համեմատ ՖՏ եկամուտները ընդամենը 0, 4 տոկոսով են նվազել: Սակայն, ՖՏ ֆինանսական վիճակը մենք համարում ենք, որ շատ առողջ վիճակում է, ինչը չի ազդի Հայաստանում գործունեություն իրականացնելու վրա:

-Հնարավո՞ր է նախապես հայտարարվածից շուտ «Օրանժ-Հայաստանը» սկսի գործարկվել:

Վաղվանից մինչև տարեվերջ ցանկացած պահի մենք կարող ենք շուկա մտնել: Մեզ համար հիմնականում ամենադժվարը ցանցի կառուցումն է: Մենք չենք ցանկանա սկսել ծառայություն մատուցել, եթե դույզն-ինչ կասկածենք դրա որակի վրա: Գիտենք, որ շուկայում մեծ ակնկալիքներ կան, բայց մենք կնախընտրեինք, որ ավելի լավ է` շուկան մի փոքր սպասի եւ մենք մատուցենք ծառայություններ լավագույն որակով: