Ձեր վստահելի աղբյուրը

«Տեղեկատվական տեխնոլոգիաների անվտանգությունը նոր սերնդի համար» խորագրով միջազգային երիտասարդական մրցույթ-համաժողովին, որը անցկացվել է ապրիլի 28-29-ը, Հայաստանից մասնակցել է ՀՊՃՀ-ն (Պոլիտեխնիկը):

Մրցույթը կազմակերպել էր Տեղեկատվության պաշտպանության ասպարեզում աշխարհի առաջատար եռյակի մեջ մտնող «Կասպերսկու լաբորատորիա» ընկերությունը, որն ունի ավելի քան 1400 աշխատակից Մոսկվայում և մասնաճուղեր` ավելի քան 30 երկրներում: Առաջին փուլին ներկայացված է եղել 86 աշխատանք 13 երկրներից:

Պոլիտեխնիկից ներկայացված է եղել մեկ աշխատանք «Տեղեկատվության անվտանգություն և ծրագրային ապահովում» ամբիոնից: Առաջին փուլում 86 աշխատանքներից տարբեր անվանակարգերում հաղթող է ճանաչվել 8 աշխատանք, այդ թվում նաև` նշված ամբիոնի «Ծրագրային համակարգի մշակում` նախատեսված ինֆորմացիայի գաղտնագրման պահպանության մեթոդների հետազոտման և ուսումնասիրության համար» վերնագրով ամբիոնի` բակալավրատի ուսանողուհի Ելենա Կոսոլապովայի և մագիստրատուրայի երկրորդ կուրսի ուսանողուհի Նինա Ազիզյանի համատեղ աշխատանքը:

Երկրորդ փուլին ներկայացվել է 17 աշխատանք 6 երկրներից: «Կասպերսկու լաբորատորիա» ընկերության ֆինանսավորմամբ Նինա Ազիզյանը և վերոնշյալ ամբիոնի վարիչ Գևորգ Մարգարովը մեկնել են Մոսկվա` մասնակցելու համաժողովի 2-րդ փուլին:

Համաժողովին մասնակցությունը և այս նշանակալի ձեռքբերումը հնարավորություն տվեց համալսարանին անդամակցելու և օգտվելու «Կասպերսկու ակադեմիա» ուսումնական ծրագրից, մասնավորապես` 80 % զեղչով օգտվելու ընկերության բոլոր ծրագրային համակարգերից, ձեռք բերելու ընկերության բոլոր ուսումնական նյութերը, մասնակցություն միջոցառումներին, կազմակերպելու ՀՊՃՀ ուսանողների պրակտիկան, ստաժավորումը ընկերության գլխամասային գրասենյակում:

Համալսարանի ուսանողուհիների կողմից ներկայացված աշխատանքը ամենաբարձր գնահատականի է արժանացել կազմկոմիտեի կողմից, և, նրանց գնահատմամբ, գիտական մեծ նշանակություն և կիրառելիություն ունի տեղեկատվական տեխնոլոգիաների, տեղեկատվական անվտանգության ոլորտներում: Եվ նախատեսված 3 առաջին կարգի դիպլոմներից մեկը շնորհվել է ՀՊՃՀ համալսարանի ներկայացուցիչներին: Բացի պատվավոր դիպլոմից` ՀՊՃՀ ներկայացուցիչներին հանձնվել են հուշանվերներ և արժեքավոր մրցանակ (320 GB արտաքին հիշող սարք):

ՀՊՃՀ միջազգային համագործակցության և կրթական բարեփոխումների գծով պրոռեկտոր Ռուբեն Աղգաշյանը, ոգևորված համալսարանի ուսանողների հաջողություններով, նշեց, որ այս հաջողությունը բուհի` ճիշտ ընտրած կրթական ռազմավարության վառ ապացույցն է:

Ներկայումս համաձայնություն է ձեռք բերվել պայմանագիր կնքել «Կասպերսկու լաբորատորիա» ընկերության հետ, քանի որ, ըստ Տեղեկատվության անվտանգություն և ծրագրային ապահովում» ամբիոնի վարիչի Գևորգ Մարգարովի, ընկերության ղեղակավությունը բավականին բարձր է գնահատել հայ ճարտարագետների գիտական ներուժը տեղեկատվական տեխնոլոգիաների բնագավառում:

Ակնկալվում է, որ աշնանը ընկերության մասնագետները կայցելեն Պոլիտեխնիկ` Տեղեկատվական անվտանգություն մասնագիտությամբ ուսանողների համար դասախոսություններ կարդալու:

Նինա Ազիզյանն էլ բավականին տպավորված է վերադարձել համաժողովից, քանի որ հնարավորություն է ունեցել շփվելու, կապեր հաստատելու բնագավառի կարկառուն ներկայացուցիչների, մասնագետների հետ, մասնակցելու մաստեր-կլասին հենց ընկերության գլխավոր գրասենյակում: