Ձեր վստահելի աղբյուրը

«Այսօր Հայաստանը ևս իր մասնակցությունն է բերում միասնական, անվտանգ և զարգացող Եվրոպայի կերտման գործընթացին, փորձում կառուցել իր ապագան խաղաղ և ներդաշնակ միջավայրում», Եվրոպայի օրվա առիթով կազմակերպված ընդունելությանը իր ելույթում ասել է ԱԳ նախարար Էդվարդ Նալբանդյանը` շնորհավորելով բոլորին Եվրոպայի օրվա առթիվ:

«Մահաբեր այդքան պատերազմներից, երկու դաժան աշխարհամարտերից հետո վերածնվելու ուժ գտնելով և ժողովուրդների համար հաշտ ու միասնական ճակատագիր կերտելով` Եվրոպան ողջ մարդկության համար դարձավ, խաղաղության, կայունության, ներդաշնակության ու միասնության խորհրդանիշ և ուղենիշ:

Ընդամենը մի քանի տասնամյակ առաջ անիրական երազանք թվացող միասնական Եվրոպայի ստեղծումն այսօր դարձել է անշրջելի իրականություն: Դրանում մեծ է եվրոպական ժողովուրդների ավանդը, նրա քաղաքական առաջնորդների դերը:

Պատմությունն անշուշտ կերտում են ժողովուրդները, բայց պատմությունը կերտում են և անհատները: Այսօր արժանին է մատուցվում եվրոպական պետական այրերին, նրանց իմաստնությանն ու խիզախությանը, նրանց քաղաքական կամքին և վճռականությանը, ինչը եվրոպական ժողովուրդներին հնարավորություն տվեց վերագտնելու ապագայի նկատմամբ վստահությունը և մեր մոլորակին վերադարձրեց ապահով ապագայի հույսը:

Անկախությունից ի վեր ձեռք բերված մեր հաջողությունները, ինչպես ներքին բարեփոխումների և տնտեսական զարգացման, այնպես էլ արտաքին աշխարհի հետ հարաբերություններում, չեն կարող աննկատ անցնել: Այդ առաջընթացի ընթացքում մեզ համար մեծապես կարևոր է եղել Եվրոպայի աջակցությունը:

Այսօր Հայաստանը անդամակցում է մայրցամաքի առանցքային կառույցներին` Եվրոպայի խորհրդին ու Եվրոպայում անվտանգության և համագործակցության կազմակերպությանը, իր ներդրումը բերելով դրանց աշխատանքներին և համաեվրոպական օրակարգի ձևավորմանը` անվտանգության և ժողովրդավարության ամրապնդման հարցերում:

Զգալի առաջընթաց են ապրել մեր կապերը Եվրոպական միության հետ: Ընթացիկ տարի լրանում է Գործընկերության և համագործակցության մասին համաձայնագրի ուժի մեջ մտնելու տասնամյակը: Այս տարեդարձին մենք մոտենում ենք նոր ձևաչափերում մասնակցությամբ, ընդլայնված երկկողմ օրակարգով: Հայաստանի և Եվրոպական միության միջև հարաբերությունների խորացման նոր հնարավորություններ են բացվում վերջերս Պրահայում կայացած Արևելյան գործընկերության պաշտոնական մեկնարկից հետո: Հայաստանն առաջիններից մեկը ողջունեց ԵՄ տարածաշրջանային այս նախաձեռնությունը և որպես գործընկեր երկիր իր ամենագործուն մասնակցությունն է ունենում Արևելյան գործընկերության կայացման աշխատանքներում:

Եվրոպական միության և Հայաստանի ղեկավարության միջև ամենաբարձր քաղաքական մակարդակի շփումներին զուգահեռ` ամրապնդվում են նաև մեր տնտեսական համագործակցությունն ու առևտրային կապերը: Այսօր Հայաստանի արտահանման զգալի մասը բաժին է ընկնում եվրոպական մրցունակ շուկային, իսկ ապրանքաշրջանառության ծավալները կայուն զարգացման միտում ունեն: Այս ամենը վկայում է, որ ընդհանուր արժեքների վրա հիմնված համագործակցությունը կարող է հաջողված լինել : Հայ ժողովուրդը շատ լավ գիտի խաղաղության արժեքը: Բնականաբար, այդ խաղաղությունը պահպանելու հանձնառությունը ևս շատ ամուր է ու հստակ: Այդ գիտակցությամբ է, որ Հայաստանի Հանրապետության Նախագահի գլխավորությամբ մեր արտաքին քաղաքականություն ջանում է կարգավորել առկա հիմնախնդիրները: Դա հնարավոր է անել տարածաշրջանում փոխադարձ վստահության և հարգանքի միջոցով, այն նույն եղանակով, ինչը հնարավոր դարձրեց Եվրոպայում բաժանարար գծերի վերացումը և մայրցամաքի հետագա ներդաշնակ զարգացումը», -ասել է նախարարն իր ելույթում, փոխանցում են նախարարության հասարակայնության հետ կապերի բաժնից: