Ձեր վստահելի աղբյուրը

Բրիտանական հեղինակավոր Jethro Tull ռոք խմբի ղեկավար Յան Անդերսոնը (Ian Anderson) սովորություն ունի` ինչ երկիր որ այցելում է, հյուրանոցի իր համարից սկզբում դիտում է քաղաքը կամ ընդհանուր պատկերացում կազմում համակարգչի միջոցով: Հայաստան գալուց նա խախտել է իր սովորությունը: «Բայց այսօր ես այդպես չարեցի ու հյուրանոցից դուրս եմ եկել, զբոսնել քաղաքով, դիտել որոշ տեսարժան վայրեր: Համակարգիչս չեմ էլ միացրել», -այսօր «Արմենիա Մարիոթ» հյուրանոցում կազմակերպված ասուլիսում հայտարարեց խմբի ղեկավար Յան Անդերսոնը:

Վաղը Կ. Դեմիրճյանի անվան Մարզահամերգային համալիրում տեղի է ունենալու բրիտանական հեղինակավոր խմբի համերգը, որի ընթացքում հնչելու են նրանց հայտնի կատարումները, հիմնականում 60-ական թվականներից:

«Անհամբեր սպասում ենք վաղվա համերգին: Մեզ համար յուրահատուկ հնարավորություն է, որ կարող ենք ելույթ ունենալ այս երկրում», - ասաց Անդերսոնը:
Նույն ուրախությունն է նաև խմբի կիթառահար Մարտին Բարրի (Martin Barre) մոտ: Խմբի անդամներն ասացին, որ հուզված են, քանի որ տեղյակ չեն` հանդիսատեսն ինչպիսին է լինելու:

Հայաստանի մասին Յան Անդերսոնը շատ է լսել. Հունաստանում Հայաստանի դեսպանը մի քանի տարի առաջ նրան հայկական կոնյակ է նվիրել ու պատմել մեր երկրի մասին: Ավելին, նա տեղյակ է Հայաստանի ժողովրդագրական վիճակի մասին և տեղեկացել է Կենտրոնական հետախուզական կայքէջից: «Դա իմ ամենասիրած կայքէջն է, որտեղից էլ հիմնականում երկրների մասին տեղեկություններ եմ ստանում: Այդ կայքը պարբերաբար թարմացվում է, և գիտեմ օրինակ, թե որքան կին ու տղամարդ կա Հայաստանում, և որքանն են ՁԻԱՀ-ով հիվանդ», - նկատեց Յան Անդերսոնը:

Հարցին, թե ինչպե՞ս է ստացվում, որ այդքան երկար տարիներ նրանք համագործակցում են միևնույն խմբում և Անդերսոնը, և Բարրը ասացին, որ 41 տարի իրենք համագործակցում են միևնույն նպատակի` երաժշտություն ստեղծելու համար:
«Հրաշալի է 41 տարի ընկեր լինելը»,- հավելեց Բարրը:

Մյուս հարցին, թե ինչպե՞ս է ստացվում, որ մի քանի սերունդների շրջանում նրանց երաժշտությունը մնում է սիրելի ու անփոխարինելի, «Jethro Tull»-ականները պատասխանեցին. «Մեր երաժշտությունը խառնուրդ է. Օգտագործում ենք բլյուզ, ջազ, ֆոլկ: Այնպես ենք անում, որ նոր սերնդի շրջանում ևս հետաքրքրություն առաջանա»:

Տեղեկանք` Jethro Tull խումբը կազմվել է 1968-ին` բրիտանական John Evan Band և McGregor’s Engine բլյուզ խմբերի միավորման արդյունքում: Jethro Tull-ը թողարկել է շուրջ 40 ալբոմ, վաճառել 60 միլիոնից ավել տպաքանակ: Jethro Tull-ի երաժշտությունը հեշտությամբ որևէ ժանրի չես դասի, սկսած բլյուզից, ֆոլկ ռոքից, պռոգ-ռոքից, ջազի ազդեցությամբ գործերից մինչև արևելյան ելևէջներ: Յան Անդերսոնը, ով ղեկավարում է խումբը ստեղծման օրվանից ի վեր և համաշխարհային ռոք երաժշտության շրջանակներում հայտնի է որպես Jethro Tull խմբի ձայն և ֆլեյտահար: 2008-ին նա տոնել է իր երաժշտական գործունեության 40 ամյակը: 3 տասնամյակի ընթացքում 40 երկրներում 2500 համերգ տալուց հետո Jethro Tull-ը ամբողջ աշխարհում տարեկան 100 համերգ է տալիս իր հին ու նոր երկրպագուների համար: