Ձեր վստահելի աղբյուրը

Մայիսի 21-ին Երևան ժամանեցին ԱԻԲԱ-ի ընտանիքի մի շարք անդամներ և միջազգային տեխնիկական պաշտոնյաներ` Երևանի մարզահամերգային համալիրում մայիսի 23-30-ը կայանալիք բռնցքամարտի աշխարհի պատանեկան առաջնության կազմակերպչական աշխատանքների ընթացքին ու առկա հնարավորություններին ծանոթանալու նպատակով: Նրանք շրջեցին համալիրում, խոսեցին կազմկոմիտեի անդամների հետ և իրենց հետաքրքրող հարցերի վերաբերյալ սպառիչ պատասխաններ ստացան, իսկ այնուհետև իրենց տպավորություններն արտահայտեցին ԱԻԲԱ աշխարհի բռնցքամարտի պատանեկան առաջնության կայքի թղթակցի հետ զրույցներում:

ՕՍՎԱԼԴՈ ԲԻՍԲԱԼ (տեխնիկական պատվիրակ).- Ամեն ինչ շատ լավ է կազմակերպված: Ամենակարևորն այն է, որ այստեղ մենք գտել ենք առաջնությունը կազմակերպելու պատրաստ մարդկանց: ԱԻԲԱ-ի նախագահ Չինգ Կո Վուն նույնպես վստահ է, որ Երևանում ամեն ինչ լավ է ընթանալու, և մենք արձանագրելու ենք մարզական մի հիանալի իրադարձության կայացման փաստը:

ՕԼԱՖ ՎԵԼՏՄԱՆ (միջոցառման մենեջեր).- Մենք գոհ ենք ոչ միայն ջերմ ընդունելությունից, այլև կատարված աշխատանքից:

ՄԱՆԳԱԼԴԱՍ ԿԻՇԵՆ (միջազգային տեխնիկական պաշտոնյա).- Շատ տպավորված ենք ձեր մարզահամերգային համալիրով և այստեղ անցկացրած մի քանի ժամվա ընթացքում արդեն հասկացել ենք, որ լավ ձեռքերում ենք հայտնվել:
Հայաստանի բռնցքամարտի ֆեդերացիայի նախագահ Արման Մուրադյանը ԱԻԲԱ-ի ընտանիքի անդամների հետ հանդիպման ընթացքում նշեց, որ ամեն ինչ արվելու է, որպեսզի նման խոշոր միջոցառումը Հայաստանում վերջինը չլինի:

Ներկայացնելով աշխատանքների ընթացքը` ՀԲՖ առաջին փոխնախագահ, ԱԻԲԱ-ի միջազգային կարգի մրցավար Դերենիկ Գաբրիելյանը նշեց, որ համալիրում հերթապահելու է բուժանձնակազմ, միևնույն ժամանակ երևանյան լավագույն հիվանդանոցներից մեկում երեք հիվանդասենյակ առանձնացվելու են հատուկ այն նպատակով, որպեսզի հնարավոր լուրջ վնասվածքների դեպքում մարզիկներն անհրաժեշտ օգնություն ստանան: Մարզական անհրաժեշտ հանդերձանքը մատակարարելու է «Top Ten» կազմակերպությունը: Բոլոր հյուրանոցներում, որտեղ կհանգրվանեն մարզիկներն ու առաջնությունը սպասարկող անձինք, ստեղծված են անվտանգության բոլոր պայմանները. ոստիկանության ներկայացուցիչները կհերթապահեն 24 ժամ: Խցանումների մեջ չհայտնվելու և մրցումներից չուշանալու համար ոստիկանությունը կուղեկցի նաև մրցավայր ժամանող թիմերին ու մրցավարներին:

Ավելացնենք, որ մեր թղթակցի հետ զրույցների ընթացքում հյուրերը գոհունակությամբ էին արտահայտվում աշխարհի առաջնության կազմակերպչական աշխատանքների վերաբերյալ: «Սա օլիմպիական մակարդակ է: Մենք Արգենտինայում մրցաշար ենք անցկացրել այնպիսի մարզահամալիրում, որն իր հնարավորություններով չի կարող նույնիսկ համեմատվել Երևանի մարզահամերգային համալիրի հետ»,- ընդգծեց նրանցից մեկը: