Ձեր վստահելի աղբյուրը

Կրթության և գիտության նախարար Արմեն Աշոտյանն այսօր ընդունել է ՀՀ-ում Գերմանիայի Դաշնային Հանրապետության լիազոր դեսպան Անդրեա Վիկտորինի գլխավորած պատվիրակությանը:

Հաշվի առնելով, որ սա դեսպանի վերջին աշխատանքային հանդիպումն էր մեկնումից առաջ, նախարարը շնորհակալություն է հայտնել մեր երկրի կրթության և գիտության նկատմամբ ցուցաբերած մեծ ուշադրության և աջակցության համար: Նա ընդգծել է, որ հայ-գերմանական հարաբերությունները կրթական ոլորտում միշտ արդյունավետ են եղել, և հույս հայտնել, որ չնայած համաշխարհային տնտեսական ճգնաժամին` առկա բոլոր ծրագրերը կպահպանվեն ու կընդլայնվեն: Այս մասին հայտնեցին ԿԳՆ մամուլի ծառայությունից:

Ա. Աշոտյանը նշել է, որ պատահական չէ, որ Գերմանական ակադեմիական փոխանակման ծառայությունն /DAAD/ այս տարի հայ երիտասարդներին հատկացվող կրթաթոշակներն ավելացրել է: «Վերջին տարիների ընթացքում ձևավորվել է եվրոպական կրթություն ստացած մասնագետների մի մեծ խումբ, որի ներգրավվածությունը մեր երկրի հասարակական և տնտեսական ոլորտներում դեռևս կատարյալ չէ: Մենք հետևողական ենք լինելու հայրենիք վերադարձողների համար աշխատաշուկայում ստեղծել նպաստավոր պայմաններ` նրանց գիտելիքներն արդյունավետ օգտագործելու համար»:

Դեսպանն իր գոհունակությունն է հայտնել Գերմանիայի կառավարության կողմից Հայաստանի կրթական ոլորտում իրականացվող գործընթացների ծավալի վերաբերյալ` նշելով, որ ծրագրային ներդրումների առումով այն գերազանցում է եվրոպական շատ երկրների աջակցությանը: Դեսպանն իր խոսքում անդրադարձել է Հայաստանի հանրակրթական դպրոցներում գերմաներենը որպես օտար լեզվի դասավանդման խնդրին: Նա նշել է, որ ՀՀ-ում գործում է երեք դպրոց, որոնք շրջանավարտներին տրամադրում են գերմաներեն լեզվի իմացության դիպլոմ. ևս մեկ դպրոց նախատեսվում է ներգրավել այդ գործընթացում:

Ա. Վիկտորինն անդրադարձել է նշված դպրոցներում գերմաներենի անհրաժեշտ չափն ապահովող ժամաքանակի խնդրին, որին լուծում էր տրվել դեռևս այս տարվա ապրիլ ամսին կնքված երկկողմանի պայմանագրով: «Հատկանշական է, որ Գերմանիան այն երկրներից է, որը ՀՀ քաղաքացիներին հնարավորություն է տալիս Գերմանիայում ստանալ լիարժեք կրթություն` բակալավրից մինչև ատենախոսության պաշտպանություն: Եվ այս առումով խիստ կարևոր է գերմաներենի դասավանդման խնդիրը` դպրոցական նստարանից սկսած»,- նշեց դեսպանը: Դեսպանը հավելել է նաև, գերմանական կողմը մեծ ջանքեր է ներդնում մարզերում գերմաներեն լեզվի զարգացման ուղղությամբ:

Հանդիպմանը ներկա մեր տարածաշրաջնում Գյոթեի համալսարանի ներկայացուցիչ տիկին Սյուզան Բանդաուն տեղեկացրել է, որ Կրթության ազգային ինստիտուտի հետ համատեղ իրականացվել են ուսուցիչների վերապատրաստման սեմինարներ` գերմանացի և ավստրիացի, ինչպես նաև հայ մասնագետների մասնակցությամբ: Նա նշել է, որ իրենց գրասենյակը հետաքրքրված է Համաշխարհային բանկի ֆինանսավորած «Որակ և համապատասխանություն» ծրագրով և պատրաստակամություն հայտնել ներգրավվել իրականացվող ծրագրերի գործընթացում, ինչպես նաև` մասնակցել ավագ դպրոցի համար նախատեսվող գերմաներենի դասագրքի բովանդակային փորձաքննությանը:

Հանդիպման ավարտին ՀՀ կրթության և գիտության նախարար Արմեն Աշոտյանը, հաջողություն մաղթելով դասպանին, հույս է հայտնել, որ նա հետագայում ևս կայցելի Հայաստան` որպես մեր ժողովրդի բարեկամ: