Ձեր վստահելի աղբյուրը

Ադրբեջանական մտավորականները, ի նշան հայ մտավորականների հետ երկխոսության, նախատեսում են այս տարվա հուլիսին փոխայցեր կազմակերպել Ստեփանակերտ, Երևան և Բաքու: Հիշեցնենք, որ նմանատիպ այց տեղի է ունեցել նաև 2007-ի հունիսի 28-ին, երբ երկու երկրների` Հայաստանի և Ադրբեջանի մտավորականներն այցելել են Ստեփանակերտ, Երևան և Բաքու:

«Մենք կարծես չենք նկատում Ադրբեջանում կատարվող վտանգավոր դրսևորումները և փորձում ենք ձևացնել, թե ամեն ինչ նորմալ է, ու նրանց հետ գնում ենք երկխոսության: Ըստ իս, նման երկխոսությունը ի սկզբանե դատապարտված է տապալման», -«Արմատ» ակումբի այսօրվա ասուլիսում հայտարարեց Armenianhouse.org էլեկտրոնային գրադարանի տնօրեն Կարեն Վրթանեսյանը:

«Եթե հանդիպման է գնում հայ մտավորականը կամ Հայաստանի քաղաքացին ու իր մեջ պետք է կրի մի դիրքորոշում` եթե ես հարաբերվեմ ադրբեջանցու հետ, դա չի տարածվի իմ ազգային շահերի վրա: Եթե մենք կրենք մի հստակ դիրքորոշում, որ մեր ազգային խնդիրները որևէ առնչություն չունեն մեկ երկու հանդիպման հետ, ապա դրանք վտանգավոր չեն կարող լինել», - իր հերթին սպասվող հանդիպման մասին նման կարծիք հայտնեց հոգեբանական գիտությունների թեկնածու, ռազմական հոգեբան Դավիթ Ջամալյանը:

Հայ հանրության մեծ մասի շրջանում տարածված այն մտայնությունը, թե թուրքը փոխվել է, հոգեբանը անհեթեթ է համարում, քանի որ ըստ նրա` «թուրքը նույն թուրքն է»: «Եթե մենք ինքներս մեզ նման մտայնությամբ խաբում ենք և որոշում ենք գնալ նման հանդիպումների, ապա դա հանգեցնում է նրան, որ բթանում է հայության վտանգի զգացողությունը ու այդ դեպքում մենք` հայերս, թուլանում ենք», -հավելեց հոգեբանը:

Ադրբեջանի կողմից հնչած հարյուրավոր քարոզչական թեզերից Կարեն Վրթանեսյանը հիշեցրեց այն հայտարարությունները, որով իբրև «Հայաստանը օկուպացրել է Ադրբեջանի միջազգայնորեն ճանաչված տարածքը»: «Ցավոք սրտի շատ անտարբեր ենք վերաբերվում նման քարոզչությանը, ու ընդամենը ասում ենք, որ դա անհեթեթություն է: Բայց նման պնդումներով հենք է դրվում ապագա ոտնձգությունների համար», - հավելեց նա:

Հետաքրքրվեցինք` կա՞ ուսումնասիրություն` ադրբեջանցինե՞րն են ավելի հայատյաց, թե՞ հակառակը: Հոգեբանը վկայակոչելով մի ուսումնասիրության տվյալ, որը կատարվել է Հայաստանում և Ադրբեջանում, տեղեկացրեց` պարզվել է, որ ադրբեջանցիները շատ ավելի հայատյաց են, քան հակառակը:

«Մեզ մոտ պաշտպանական ագրեսիվ դիրքորոշումը այնքան է թուլացել, որ մղվել է երկրորդ պլան: Դա բնական է, որովհետև պատերազմում հաղթանակածը մենք ենք: Ադրբեջանցիներն այդպես չեն մտածում. նրանք զինադադարի կնքումից հետո առայսօր պատրաստվում են ռևանշիստական պատերազմի: Ադրբեջանական հանրույթը չի կարող ավելի քիչ հայատյաց լինել, եթե 16 տարի այնտեղ մարդատյացության քարոզչություն է, ամեն հայկականի նկատմամբ տոտալ ատելության քարոզչություն է», - հավելեց հոգեբանը:

Այս պարագայում, բանախոսների համար մի բան հստակ էր, որ նման գաղափարախոսության տակ ձևավորված նոր սերունդը հնարավոր չէ, որ հանդուրժող լինի: Հետևաբար նրանք դատարկ են համարում փոխադարձ վստահություն հաստատելու մասին հայտարարությունները:

Բանախոսների համոզմամբ, մենք` հայերս պետք է գիտակցենք, որ ապրում ենք թշնամու կողքին և շատ հնարավոր է, որ մոտ ապագայում պատերազմ լինի: «Կարևոր է, որ մենք հոգեբանորեն չթուլանանք», -հավելեց հոգեբան Ջամալյանը:

Մեր հաջորդ հարցին, թե ե՞րբ կվերանա մարդատյացությունը, Կարեն Վրթանեսյանը պատասխանեց. «Երբ Ադրբեջանում ցանկություն լինի այն վերացնելու: Ադրբեջանն այսօր իր խնդիրները փորձում է լուծել մեզ որպես տիեզերական չարիք ներկայացնելով: Մինչ նրանք իրենց խնդիրները լուծում են ի հաշիվ մեզ, մարդատյացությունը շարունակվելու է: Ադրբեջանը կշարունակի նման քարոզչություն, մինչև Հայաստանից ուժեղ հակազդեցություն չստացվի»: