Ձեր վստահելի աղբյուրը

«Հունիսի 24-ին սկսվեց Ազգային ժողովի նախագահ Հովիկ Աբրահամյանի աշխատանքային այցը Ստրասբուրգ, որի ընթացքում նա հանդիպումներ է ունենում Եվրոպայի խորհրդի կառույցների ղեկավարների եւ ԵԽ Խորհրդարանական Վեհաժողովում ներկայացված քաղաքական ուժերի ղեկավարների հետ:

Առավոտյան ԱԺ նախագահ Հ. Աբրահամյանը հանդիպեց ԵԽ Վենետիկի հանձնաժողովի նախագահ Ջիաննի Բուքիքիոյի հետ: Հայաստանի խորհրդարանի ղեկավարը բարձր գնահատեց Վենետիկի հանձնաժողովի եւ դրա նախագահի դերը Հայաստանում քննարկվող օրինագծերը եվրոպական չափանիշներին համապատասխանեցնելու գործում: Այդ համատեքստում նա հատկապես կարեւորեց ԵԽ Վենետիկի հանձնաժողովի դերակատարությունը Քրեական օրենսգրքում կատարված փոփոխությունները կյանքի կոչելու գործում: Զրույցի ընթացքում կողմերը համաձայնեցին, որ Հայաստանն արդեն մեծ առաջընթաց է արձանագրել իր օրենսդրությունը եվրոպական չափանիշներին համապատասխանեցնելու գործում, եւ այժմ հասունացել է այդ օրենսդրությունը ճշգրիտ կիրարկելու եւ իրագործելու ժամանակը:

Այնուհետեւ Ազգային ժողովի նախագահ Հովիկ Աբրահամյանը հանդիպես ԵԽ Մարդու իրավունքների հարցերով հանձնակատար Թոմաս Համարբերգի հետ: Խորհրդարանի ղեկավարը նրան եւս շնորհակալություն հայտնեց Հայաստանի հարցերի հանդեպ իր ցուցաբերած աջակցության եւ կառուցողական քննադատության համար: Նա շեշտեց, որ Հայաստանը ԵԽ լիիրավ անդամ է, եւ դրանով իսկ իրեն պարտավորված է համարում բարեխղճորեն կատարել ԵԽ շրջանակներում իր ստանձնած բոլոր պարտականությունները: Նա նաեւ կարեւորեց ԵԽ բոլոր անդամ պետությունների միասնական ջանքերը` ԵԽ վարկանիշը բարձր պահելու եւ կազմակերպության վարկին չվնասելու գործում: Զրույցի ընթացքում կողմերը նաեւ քննարկեցին 2008թ. մարտի 1-2-ի իրադարձություններն ուսումնասիրող ԱԺ ժամանակավոր հանձնաժողովի գործունեությանը վերաբերող հարցերը:
Հունիսի 24-ի առավոտյան ԱԺ նախագահ Հովիկ Աբրահամյանը նաեւ հանդիպումներ ունեցավ ԵԽԽՎ-ում Միավորված եվրոպական ձախերի խմբակցության ղեկավար Թինի Կոկսի եւ Եվրոպական ժողովրդական կուսակցության խմբակցության ղեկավար Լուկ վան դեն Բրանդտի հետ: Հանդիպումների ընթացքում Հայաստանի խորհրդարանի ղեկավարն իր զրուցակիցներին ներկայացրեց Հայաստանի Հանրապետության նախագահի առաջարկությամբ Ազգային ժողողի կողմից համաներում հայտարարելու գործընթացի մանրամասները: Նա շեշտեց, որ դա արդյունավետ հանգուցալուծում էր, որին հաջողվեց հասնել նաեւ ԵԽԽՎ մեր գործընկերների բարեկամական եւ շիտակ աջակցության շնորհիվ: Զրուցակիցների խնդրանքով պրն. Աբրահամյանը նաեւ անդրադարձավ Հարավային Կովկասի տարածաշրջանի խնդիրներին:

Հունիսի 24-ի կեսօրին ԱԺ նախագահը նաեւ հանդիպեց ԵԽԽՎ նախագահ Լուիս-Մարիա դե Պյուչի հետ: Զրույցի ընթացքում կողմերը բարձր գնահատեցին Հայաստանում ներքաղաքական համաձայնություն ձերք բերելու գործում վերջերս արձանագրված հաջողությունը: Նրանք համակարծիք էին, որ, այնուամենայնիվ, դեռեւս անելիքներ կան, որոնք կյանքի կոչելու գործում Հայաստանի ժողովրդի անփոխարինելի գործընկերն է լինելու Եվրոպայի խորհուրդն ու այդ կառույցի տրամադրած փորձագիտական եւ այլ գործիքները:

ԵԽԽՎ նախագահի հետ հանդիպելուց հետո պրն. Աբրահամյանը ճեպազրույց ունեցավ լրատվամիջոցների ներկայացուցիչների հետ:

Հունիսի 24-ի երկրորդ կեսին Ազգային ժողովի նախագահը կհանդիպի ԵԽԽՎ-ում Եվրոպական ազատականների եւ ժողովրդավարների դաշինքի խմբակցության նախագահ Մաթիաս Յորշիի, Եվրոպական ժողովրդավարական խմբակցության նախագահ Դեյվիդ Ուիլշարի եւ Մարդու իրավունքների եվրոպական դատարանի նախագահ Ժան-Պոլ Կոստայի հետ:
Նույն օրը Ստրասբուրգի ժամանակով ժամը 18.00-ին /Երեւանի ժամանակով ժամը 21.00-ին/ ԱԺ նախագահ Հովիկ Աբրահամյանը ներկա կգտնվի ԵԽԽՎ լիագումար նիստին, որի ընթացքում կքննարկվի Հայաստանի հարցը: Նախատեսվում է, որ նա ելույթով հանդես կգա քննարկումն ամփոփող քվեարկությունն իրականացնելուց հետո»:

ՀՀ ԱԺ հասարակայնության հետ կապերի վարչություն