Ձեր վստահելի աղբյուրը

Քիչ առաջ Ազգային ժողովի արտահերթ նստաշրջանում ձայների մեծամասնությամբ ընդունվեց Հայաստանի և Միջազգային զարգացման ընկերակցության միջև ստորագրված «Կրթության որակի և համապատասխանության երկրորդ վարկային ծրագիրը»:

Ծրագրի բուռն քննարկման ընթացքում ԱԺ դաշնակցական պատգամավոր Արծվիկ Մինասյանը կոպիտ քննադատության ենթարկեց կրթության ներկայիս համակարգը: Իր ելույթի ժամանակ պատգամավորը հայտարարեց, որ կրթական համակարգը վաղուց արդեն որակ չի ապահովում և արտասահմանից եկող ուսանողների թիվը գնալով նվազում է: Նրա խոսքերով, ստեղծված այն տպավորությունը, թե Հայաստանում ապահովվում է բարձրորակ կրթություն, այդպես չէ:

«Ինչի՞ համար է, որ մեր ուսանողը փորձում ստանալ գիտելիքներ: Նրանց 80 տոկոսը, եթե հարցնեք, չգիտեն իրենց ապագան: Այսինքն, ի սկզբանե խզված է կապը մասնագիտական կողմնորոշման և կրթության միջև: Կրթական հաստատությունները իրենց ուսանողական կազմը համալրելիս հաշվի չեն առնում` երբ այս կամ այն անձը ավարտեց, ի վիճակի՞ է անցնել աշխատանքի», -հայտարարեց Արծվիկ Մինասյանը:

Նշենք, որ վարկային այս ծրագրով նախատեսվում է, որ Հայաստանը կստանա շուրջ 25 մլն դոլար վարկ: Ծրագիրը ներկայացնելիս կրթության, գիտության նախարար Արմեն Աշոտյանն ասաց, որ նոր վարկային ծրագրով շարունակելու են առաջին վարկային ծրագրի ընթացքում ձեռք բերված համապատասխան կառույցների ստեղծման, հզորացման ու գործառույթների ընդլայնման քաղաքականությունը:

«Առաջին վարկային ծրագիրը, որի գործունեության ժամկետն ավարտվում է այս տարի աշնանը, թույլ տվեց Հայաստանի կրթության համակարգում իրականացնել լայնածավալ բերափոխումներ, ներմուծել ինստիտուցիոնալ նոր համակարգ և մեծ քայլ կատարել դեպի եվրոպական միջազգային կրթական համընդհանուր տարածք», - հավելեց Աշոտյանը:

Այս ծրագրի շրջանակներում հիմնական շեշտադրոմը, բացի հանրակրթական ոլորտից, դրվելու է նաև նախադպրոցական կրթության վրա: Ծրագրով նախատեսվում է նաև մանկավարժների վերապատրաստում և ուսանողների վարկավորում` կրթությունը մատչելի դարձնելու համար:

«Լավ սովորողը լավ է ապրում: Սա եղել է մարդկության պատմության ողջ ընթացքում, հակառակ պարագայում գիտելիքը դառնում է ինքնպատակ, եթե չի սպասարկում տնտեսությանը և չի բերում տնտեսական հետևանքներ», - իր ելույթը եզրափակեց Աշոտյանը:

ԱԺ մյուս պատգամավոր Անահիտ Բախշյանը հիշեց իր մանկավարժական գործունեության տարիները և հայտարարեց, որ 2005-2009 թվականների նույն վարկային ծրագրի իրականացման ընթացքում զգալի բացթողումներ են թույլ տրվել:

«Մեր ուսուցիչները գնում էին իբրև թե վերապատրաստման, բայց գալիս էին հին գիտելիքներով, ոչ մի նոր բան չէին ստանում», -հավելեց պատգամավորը:

«Մենք հաստատում ենք համաձայնագրեր, վերցնում ենք միջոցներ, ստանձնում ենք պարտավորություններ և մեր հետագա սերունդը պետք է փակի այդ պարտավորությունները, բայց այդ միջոցների ծախսը չենք կարողանում համակարգաստեղծ մակարդակով իրականացնել», - իր քննադատությունը շարունակեց դաշնակցական պատգամավորը:

Հիշեցնենք, որ կոալիցիոն կառավարության շրջանակներում կրթության, գիտության նախարարությունը երկար տարիներ զբաղեցրել է Դաշնակցությունը. ընդամենը մայիսի 12-ին է Հանրապետական կուսակցության քվոտայով նախարար նշանակվել Արմեն Աշոտյանը: