Ձեր վստահելի աղբյուրը

110 ֆիլմ 40 երկրներից: 50-ից ավելի հայկական ֆիլմեր: Այս ամենն ու դեռ ավելին «Ոսկե ծիրան» 6-րդ միջազգային կինոփառատոնի շրջանակներում` հուլիսի 12-19-ը:

Արդեն վեց տարի է անընդմեջ «Ոսկե ծիրան» կինոփառատոնը հնարավարություն է ընձեռում հայ հանդիսատեսին դիտել միջազգային տարբեր փառատոներում ներկայացված ֆիլմերը, շփվել համաշխարհային կինոարվեստի հայտնի դեմքերի հետ:
Ինչ կարող ենք դիտել. Ինչպես միշտ, փառատոնը կընթանա 3 հիմնական ծրագրերով` միջազգային խաղարկային, վավերագրական, «Հայկական համայնապատկեր»:

Փառատոնը բացվելու է ռեժիսոր Լորան Տյուելի «Մերձավոր շրջապատ» ֆիլմով, որի պրոդյուսերն է ֆրանսահայ անվանի կինոգործիչ Ալան Թերզյանը:

«Ոսկե ծիրան»-ն այս տարի հատուկ անդրադարձ կկատարի նաև հայ կինոյի մեծ անուններին` հետահայաց ցուցադրություններով նշելով «Հնձան», «Աշնան արև», «Տերը» ֆիլմերի ռեժիսոր Բագրատ Հովհաննիսյանի և «Տժվժիկ», «Մորգանի խնամին», «Հեղնար աղբյուր», «Ընկեր Փանջունի» ֆիլմերի ռեժիսոր Արման Մանարյանի 80-ամյա հոբելյանները, Արտավազդ Փելեշյանի «Սկիզբը» և այլն:

«Ոսկե ծիրանի» շրջանակներում, Սերգեյ Փարաջանովի ծննդյան 85 և «Նռան գույնը» ֆիլմի 40-ամյակի առթիվ, տեղի է ունենալու հայ կինոյի պատմության մեջ իր արժանի տեղը զբաղեցրած այդ ֆիլմի հայկական տարբերակի ցուցադրությունը:

Փառատոնի ոչ մրցութային ծրագրում այս տարի նույնպես կլինեն Երևանյան պրեմիերաներ: Դրանց շարքում է հանրահայտ ռուս ռեժիսոր Սերգեյ Սոլովյովի վերջին աշխատանքներից «Աննա Կարենինա»-ն և «Ասսա 2»-ը: Հեղինակը Երևան կայցելի իր ֆիլմերի դերասանուհու` Տատյանա Դրուբիչի հետ միասին:

«Ոսկե ծիրան»-ի շրջանակներում կկայանա նաև Ֆրենսիս Ֆորդ Կոպոլայի «Տետրո» ֆիլմի երևանյան պրեմիերան, որը կներկայացնի ռեժիսորի հայազգի պրոդյուսեր Անահիտ Նազարյանը:

Այս տարվա համար նորություն կլինի «Վարպետներ» ծրագիրը, որը կներառի 3 մեծանուն ռեժիսորների` Լուիս Բյունուելին, Միքելանջելո Անտոնիոնիին և Տոնինո Գուերային նվիրված ֆիլմեր: Նորույթներից է նաև «Արտադրված է Հայաստանում» տեղեկատվական ծրագիրը, որը կներառի վերջին տարիներին Հայաստանի ազգային կինոկենտրոնի և վավերագրական ֆիլմերի «Հայք» ստուդիայի կողմից նկարահանված ֆիլմերը:

Այս տարի 3-րդ անգամ «Ոսկե ծիրան» կինոփառատոնի շրջանակներում, համատեղ ֆիլմարտադրությունը խթանելու նպատակով, հուլիսի 14-16-ը կկայանա «Ռեժիսորներ առանց սահմանների» տարածաշրջանային համատեղ արտադրության ֆորումը:

«Մեկ օր Եվրոպայում» արտամրցութային ծրագրում կցուցադրվեն լավագույն ֆրանսիական, գերմանական, հոլանդական և լեհական ֆիլմերը: Հուլիսի 14-ը կլինի ֆրանսիական կինոյի օր, հուլիսի 16-ը` լեհական, հուլիսի 17-ը`գերմանական: Ինչպես նաև ամեն երեկո կներկայացվի «Արաբական գիշերներ» ծրագիրը:

Հետահայաց ցուցադրությունների շարքում կցուցադրվեն մեր ժամանակների 3 մեծանուն ռեժիսորների ֆիլմեր, ովքեր ներկայացնում են 3 տարբեր աշխարհամասեր` լեհ Յեժի Սկոլիմովսկին, ճապոնացի Կոհեյ Օգուրին և ամերիկացի Ռոբ Նիլսոնը: Բոլոր 3 հեղինակները կլինեն փառատոնի հյուրերը և կմասնակցեն իրենց ֆիլմերի ցուցադրություններին:
Նախորդ տարիների նման փառատոնի ընթացքում վարպետության դասեր կանցկացնեն անվանի կինոգործիչներ` ի դեմս Ռոբ Նիլսոնի, Անջեյ Կրակովսկու, Նանա Ջորջաձեի, Սերգեյ Սոլովյովի և Կոհեյ Օգուրիի:

Ժյուրի- Այս տարի միջազգային խաղարկային ֆիլմերի ժյուրիի նախագահն է ճապոնացի հանրահայտ ռեժիսոր և սցենարիստ Կոհեյ Օգուրիրն: Ժյուրիի կազմում են նաև գերմանացի Ալբերտ Վիդերշպիլը, իսպանացի Պակո Պոշը (փառատոնի առաջին իսպանացի ժյուրին է), ամերիկահայ դերասան, գրող Էրիկ Պողոսյանը, վրացի Նանա Ջորջաձեն (կրկին առաջին անգամ) և կանադահայ Արսինե Խանջյանը:

Միջազգային վավերագրական ֆիլմերի ժյուրիի նախագահն է ռուսական կինոարտադրության և հեռուսատեսության ասպարեզում ամենահայտնի դեմքերից մեկը` Ալեքսանդր Ռոդնյանսկին: Նրա հետ ժյուրիի կազմում կլինեն նաև Մեծ Բրիտանիայից Յան-Հայդեն Սմիթը, Գերմանիայից` Մայքլ Վիդեման, Թուրքիայից` Էնիս Ռիզան, Հայաստանից` Արտյոմ Մելքումյանը:

Հայկական համայնապատկեր մրցույթի ժյուրին գլխավորելու է Նիդերլանդներից Հայկ Բալյանը: Ժյուրիի կազմում են նաև ԱՄՆ-ից Էրիկ Նազարյանը, Գերմանիայից Նորիկ Քեշիշյանը, Հայաստանից` Անետա Երզնկյանն ու Գրիգոր Հարությունյանը:
Ինչպես միշտ, այս տարի էլ մասնակիցներին գնահատելու է միջազգային կինոլրագրողների և կինոքննադատների ասոցիացիաների միջազգային ֆեդերացիայի ժյուրին` ֆիպրեսսի ժյուրին` Ժան-Մաքս Մեժան (Ֆրանսիա), Ջովաննի Օտտոնե (Իտալիա), Արծվի Բախչինյան (Հայաստան):

Համաշխարհային եկեղեցական խորհրդի ժյուրիի` էկումենիկ ժյուրիի կազմում ընդգրկված են Գվիդո Կոնվենտսը` Բելգիա, Դենիս Մյուլլերը` Ֆրանսիա, Հայ առաքելական եկեղեցու ներկայացուցիչը:
Դե ինչ, իհարկե, խոստումնալից ծրագիր է: Ու ինչպես նախօրեին ասել էր փառատոնի տնօրեն Հարություն Խաչատրյանը, ամեն ինչ պատրաստ է:

Վաղը նախքան փառատոնի մեկնարկը` 19:00, Երևանի ս. Զորավոր եկեղեցում տեղի կունենա ծիրանի օրհնության արարողությունը, ծիրան, որը, կարծես թե, դարձել է Հայաստանի «խորհրդանիշը»: «Ոսկե ծիրան» կինոփառատոնը նույնպես Հայաստանի «յուրօրինակ խորհրդանիշն» է դարձել. համաշխարհային կինոաշխարհի ներկայացուցիչների մոտ «Ոսկե ծիրանը» «ասոցացվում» է Հայաստան երկրի հետ: