Ձեր վստահելի աղբյուրը

«Վավերագրական ֆիլմեր նկարահանող «Ազդ փրոդաքշն» ընկերությունն արդեն ավարտել է անցյալ տարի սկսած Կիլիկիայի մասին պատմող ֆիլմի նկարահանումները: Այժմ ընթանում են ֆիլմի մոնտաժային աշխատանքները: Բացի այդ, ընկերությունն արդեն թողարկել է Կիլիկիայի մասին պատմող պատկերազարդ ալբոմը, որտեղ մանրամասն ներկայացված են պատմական թագավորության «հարստությունները»:

Ինչպես Panorama.am-ի հետ զրույցում ասաց «Ազդ փրոդաքշն»-ի հիմնադիր, պրոդյուսեր, ռեժիսոր Հայկ Հարությունյանը, «Կիլիկիա» ֆիլմը ցուցադրվելու է Հանրային հեռուստատեսությամբ:

«Շատ ծավալուն աշխատանք է իրականացվել: 140 րոպեանոց ֆիլմ է լինելու, բաղկացած է 4-5 մասերից: Կլիլիկիայի Հայկական թագավորության մասին է ֆիլմը»,-ասաց Հ. Հարությունյանը:

Ըստ նրա, ֆիլմում ներկայացվելու է Կիլիկիայի պատմությունը, բերդաքաղաքներն ու ամրոցները: Մի խոսքով, այն, ինչ ունեցել ենք և այն, ինչ այսօր չունենք: Ինչպես Հ. Հարությունյանն է բնորոշում, սա պատմութուն է մի ողջ հազարամյակի, փառահեղ հաղթանակնների և ջախջախիչ պարտությունների: Մակեդոնացուց մինչև Տիգրան Մեծ, Անտոնիոսի ու Կլեոպատրայի սիրերգությունից մինչև Պետրոս առաքյալ, երկու իշխանական տների հարյուրամյա ատելության և սիրով պսակվող համերաշխության մասին:

Բացի այդ, ֆիլմը յուրօրինակ պատմություն է մեծ ու հզոր աշխարհների բախման, երբ իրար դեմ էին դուրս գալիս ժամանակի խոշորագույն տերությունները: Պատմություն՝ փառքի` Հայկական միացյալ թագավորության` եզակի նշանակություն ունեցող երևույթի մասին:

«Եվ անգամ դարեր անց յուրաքանչյուրն, ով կիմանա այս պատմությունը, ակամայից այն կկոչի ֆենոմեն»,-նկատեց ռեժիսորը:

Նրա հավաստմամբ, ֆիլմի նկարահանման աշխատանքերն իրականացվել են Կիլիկիայի տարածքում, որտեղ և անցյալ տարի եղել է նկարահանող խումբը: Տեղում մոտ 50 օր իրականացվել են նկարահանումներ:

Ֆիլմը, ռեժիսորի խոսքերով, ստեղծվել է որոշ չափով դոկումենտալ և որոշ չափով էլ խաղարկային ոճերի զուգակցումից: Ֆիլմն ունի երեք լեզվով DVD տարբերակ, որը նույնպես հասանելի կլինի հանրությանը:

Ըստ Հ. Հարությունյանի, ֆիլմը քաղաքական առումով նույնպես մեծ նշանակություն ունի, այն հնարավոր է օգտագործել որպես գործիք` Հայաստանի արտաքին քաղաքականության մեջ, քանի որ ռեժիսորը վստահ է, որ ֆիլմը կարող է լավ ազդեցություն ունենալ երկրի իմիջի բարձրացման գործում:

Ինչ վերաբերում է ֆիլմի ֆինանսավորմանը, ապա «Ազդ փրոդաքշնին» աջակցել է «ՎիվաՍել» ընկերությունը: Մինչ այդ ընկերությունը դիմել է շուրջ 50 կոմերցիոն և պետական կազմակերպությունների, սակայն աջակցության նպատակով ոչ մի արձագանք չի ստացել:

Նույնիսկ, Հ. Հարությունյանի հավաստմամբ, ծրագիրն ընկերությունը ներկայացրել է մշակույթի, սփյուռքի, կրթության և գիտության նախարարություններին, բայց կրկին… լռություն:

Ինչպես ռեժիսորն է վկայում, Հայաստանի մշակութային ժառանգության վերաբերյալ ծրագիրը, պարզապես, նրանց չի հետաքրքրել:

«Գոնե հետաքրքրություն ցուցաբերեին, քանի որ սա մենք չենք անում տուն տանելու համար, սա մասսայական արտադրանք է, որը նաև Հայաստանի համար պրոպագանդայի, PR-ի գործիք է: Պատմական Հայաստանը ներկայացնելու այս միջոցը մնայուն է լինելու, քանի որ ալբոմը կամ DVD-ն հնարավորություն կտա մի քանի սերունդի ծանոթանալ ծրագրի հետ»,-նկատեց «Ազդ փրոդաքշնի» հիմնադիրը:

Նա ավելացրեց, որ Կիլիկիայի մասին պատմող ալբոմը մեկ շաբաթից վաճառվելու է գրախանութներում:

Նշենք, որ ընկերությունը ֆիլմը ցանկացել է ներկայացնել «Ոսկե ծիրան» կինոփառատոնին, բայց փառատոնի ներկայացուցիչները նշել են, թե ֆիլմը փառատոնի ձևաչափին չի համապատասխանում: Ռեժիսորը կես-կատակ կես-լուրջ նշեց, որ հավանաբար ֆիլմը համապատասխանում է միջազգային լավագույն կինոփառատոնների ձևաչափին ու չբացառեց, որ այն մի օր կներկայացվի միջազգային կինոփառատոններից որևէ մեկում: