Ձեր վստահելի աղբյուրը

Առողջապահության նախարարությունում մտավախություն ունեն, որ զբոսաշրջության ակտիվացման հետ միաժամանակ A/H1N1 (խոզի գրիպ) վարակի ներթափանցման հավանականությունը մեր երկիր կմեծանա: Մտավախությունը, մասնավորապես, ավելի է հիմնավոր դառնում, երբ Հայաստանի հարևան Ռուսաստանում ու Վրաստանում «խոզի գրիպի» դեպքեր են արձանագրվել` բոլորն էլ ներմուծված օտար երկրներից:

ՀՀ առողջապահության նախարարության պետական հիգիենիկ և հակահամաճարակային տեսչության համաճարակաբանության բաժնի գլխավոր մասնագետ Լիանա Թորոսյանը Panorama.am-ին տեղեկացրեց, որ առողջապահության նախարարությունում ստեղծվել է հատուկ հանձնաժողով, հաստատվել է գրիպի հնարավոր պանդեմիայի դեմ պայքարի ազգային ծրագիր և իրենք աշխատում են դրա կետերին համապատասխան:

Նա վստահեցրեց, որ սահմանային կետերում, մասնավորապես, «Զվարթնոց» օդանավակայանում, որտեղ գնացող-եկողների հոսքը մեծ է, ուժեղացվել է հսկողությունը: Տեղադրվել են մարդկանց ջերմությունը որոշող հատուկ սարքեր և երկիր մուտք գործողներին տրվում է թերթիկ` իրենց տվյալները գրանցելու համար:

«Դա մեզ հնարավորություն է տալիս հետագայում կապվել այդ ուղևորի հետ ու պարզել` ինչպիսին է նրա առողջական վիճակը և ինչ գանգատներ ունի», -բացատրեց մասնագետը:

Նա նաև տեղեկացրեց, որ առողջապահության ոլորտի մասնագետները հանդիպել են տուրիստական կազմակերպությունների ներկայացուցիչների հետ և նրանց տեղեկացրել վարակի մասին:

Առողջապահության համաշխարհային կազմակերպության հայաստանյան գրասենյակի ներկայացուցիչ Իրինա Պապիևան տեղեկացրեց, որ Հայաստանն արդեն իսկ ԱՀԿ-ից ստացել է համապատասխան սարքավորումներ` տեստ-համակարգեր, որոնց օգնությամբ հնարավոր է այդ վարակը ախտորոշել մարդկանց մոտ:

Նա բացատրեց, որ ԱՀԿ-ի կողմից հայտարարված պանդեմիայի 6-րդ ֆազան պայմանավորված է ոչ թե նրանով, որ վիրուսը շատ ծանր է, այլ նրանով, որ դրա ընդգրկվածության աշխարհագրական տարածքը մեծ է: Մինչ այժմ ԱՀԿ տվյալներով, վարակն արձանագրվել է 160 երկրում, կա հաստատված 160 հազար դեպք և շուրջ 900 մարդ էլ մահացել է դրանից:

Լիաննա Թորոսյանը ներկայացրեց, որ «խոզի գրիպն» իր ախտանշաններով ոչնչով չի տարբերվում սովորական գրիպից` մինչև 7 օր ինկուբացիոն շրջան, մարդու մարմնի ընդհանուր ջերմության բարձրացում, ֆիզիկական թուլություն: Եվ Պապիևան, և Թորոսյանը մարդկանց մխիթարում են, որ վարակը շատ տանելի է և մահացու չէ:

Իսկ ինչո՞վ են նրանք բացատրում արդեն իսկ գրանցված մահվան դեպքերը: Ըստ մասնագետների, ուսումնասիրությունները ցույց են տվել, որ մահացել են այն մարդիկ, ովքեր շնչառական օրգանների հետ կապված և այլ խրոնիկական հիվանդություններ են ունեցել:

«Այդ վիրուսը շատ պաթոգեն չի, հիվանդությունը մահացու չի`  ընթանում է ինչպես սովորական վիրուսը և նույնիսկ առանց սպեցիֆիկ և հակավիրուսային միջոցների հնարավոր է անցնի: Այն դեպքերը, որոնք մահացու են եղել, ուղեկցվել են խրոնիկական այլ հիվանդություններով: Ռիսկային հիվանդություններ են օրինակ` ասթման, ռեսպիրատոր այլ հիվանդությունները, դիաբետը, սրտային հիվանդությունները, գիրացումը, ուռուցքային հիվանդությունները: Հենց տվյալ գրիպից մահացու ելք չի եղել երբեք», -ասաց Պապիևան:

Թորոսյանը վստահեցրեց, որ Հայաստանը այս պահի դրությամբ պատրաստ է և կարող է դիմակայել վիրուսին: Մեր դիտարկմանը, թե Անգլիայի նման զարգացած երկրում չեն կարողանում դիմակայել վիրուսին, ի՞նչ երաշխիքներ ունի մասնագետը, որ Հայաստանում կարող են դիմակայել դրան, Թորոսյանը պատասխանեց, որ մեր երկիրն ստացել է հակաբիոտիկներ, բժիշկների համար համապատասխան հագուստ:

«Բացի այդ, մեր առաջնային օղակի մասնագետները վերապատրաստվել են, տպագրել ենք «Կանխարգելենք գրիպը» փոքրիկ բրոշյուրներ, բացվել է թեժ գիծ և հասարակության հետ տեղեկատվական աշխատանքներ են տարվում», -ներկայացրեց համաճարակաբանության բաժնի գլխավոր մասնագետը:

Ի դեպ, թեժ գծի հեռախոսահամարն է`  650305, 528872:

Հաշվի առնելով այն, որ վիրուսը կրելը հեշտ է ընթանում` հնարավո՞ր է, այնուամենայնիվ, դեպք եղած լինի, բայց մասնագետները արձանագրած չլինեն, հարցին, Լիանա Թորոսյանը պատասխանեց, որ ոչ, միևնույնն է, առաջնային օղակը տեղյակ կլինի: Սակայն, մեզանում շատ են դեպքերը, երբ մարդիկ սովորական գրիպի ժամանակ չեն դիմում բժշկի և բուժվում են տնային պայմաններում: Մեր այս դիտարկմանը, մասնագետը պատասխանեց. «Հիմա առաջնային օղակի բժիշկները մարդկանց հետ շատ են շփվում և մենք էլ հասարակության հետ ենք աշխատում, տեղեկացնում նրանց»:

Մասնագետները նույն խորհուրդներն են տալիս, ինչպես սովորական գրիպի ժամանակ. եթե հիվանդ եք, մնացեք տանը, հաճախակի լվացեք ձեռքերը, օգտագործեք անձեռոցիկներ, խուսափեք հիվանդ մարդկանց հետ շփվելուց: