Ձեր վստահելի աղբյուրը

Ռովշեն Նասիրլին այն 43 ադրբեջանցիներից մեկն է, ով «Եվրատեսիլ» երգի միջազգային մրցույթում քվեարկել է Հայաստանը ներկայացնող Ինգա և Անուշ Արշակյանների օգտին: Օրերս նրան կանչել են Ազգային անվտանգության նախարարություն, և ինչպես պատմել է «Ազատություն» ռադիոկայանի ադրբեջանական խմբագրության թղթակցին, իրենից բացատրություն են պահանջել, թե ինչու է ձայնը տվել Հայաստանին: «Ասացին, որ դա ազգային անվտանգության հետ կապված հարց է: Ինձ վրա հոգեբանական ճնշում էին գործադրում. «Ի°նչ է, դու քո ազգը չունե°ս: Ինչո°ւ ես Հայաստանի օգտին քվեարկել»: Ինձ հարկադրեցին բացատրագիր գրել»,-պատմել է նա «Ազատություն» ռադիոկայանի լրագրող Ուլքեր Աքիֆքիզին:

Արշակյան քույրերի օգտին քվեարկած Ռովշեն Նեսիրլիին օգոստոսի 12-ին են հարցաքննության կանչել Ազգային անվտանգության նախարարության` Նասիմի տարածքային բաժանմունք: Նրանից բացատրություն են պահանջել, թե ինչու է իր ձայնը տվել Հայաստանի ներկայացուցիչներին: Նեսիրլիի խոսքով` իրեն հարցաքննած անվտանգության աշխատակցի ձեռքին կար իր անունից բացի այլ մարդկանց անունների և հեռախոսահամարների ցուցակ:

Պաշտոնական տվյալներով` «Եվրատեսիլ 2009» երգի միջազգային մրցույթի ժամանակ Հայաստանի ներկայացուցիչների օգտին Ադրբեջանից քվեարկել է 43 մարդ: Նրանցից մեկը` Ռովշեն Նասիրլին պատճառաբանել է, որ իր ձայնը տվել է Հայաստանի ներկայացուցիչներին` ի նշան դժգոհության Ադրբեջանը ներկայացնող Արաշի կատարմանը:

«Եթե Ադրբեջանի խորհրդարանի պատգամավորը կարող է գնալ Հայաստան, ապա ի°նչ վատ բան կա, եթե ադրբեջանցին իր ձայնը տալիս է Հայաստանին: Նրանց ասացի, որ եթե չեք ուզում Հայաստանին ձայն տրվի, էլ ինչո°ւ եք այդ մրցույթին մասնակցում»,-ասել է Նասիրլին:

Ռադիոկայնաը եզրակացնում է, որ փաստորեն կապ ապահովող «Azercell» ընկերությունն է Հայաստանի օգտին քվեարկած Ադրբեջանի քաղաքացիների տվյալները փոխանցել Ազգային անվտանգության նախարարությանը:

Ադրբեջանցի իրավապաշտպան Էվազ Հասանովը նշել է, որ Հայաստանի օգտին քվեարկած ադրբեջանցիներին Ազգային անվտանգության նախարարություն կանչելն ու հարցաքննելը նախ և առաջ նշանակում է բռնանալ քաղաքացիների ընտրության իրավունքի վրա: Հասանովն ընդգծել է, որ այդ քվեարկությունը բացառապես երաժշտական բնույթի է եղել, հետևաբար որևէ կերպ չէր կարող վնաս հասցնել պետության հեղինակությանը:

«Այդ հարցում հակապետական ոչինչ չկա: Դա ազատ քվեարկություն է եղել, ընդամենը համակրանքի ցուցադրում: Ոչ ավելին: Մարդկանց չպետք է այդչափ վերահսկողության տակ պահել: Եթե Ազգային անվտանգության նախարարությունը հետևում է բոլոր ադրբեջանցիների հեռախոսազանգերին ու sms հաղորդագրություններին, նշանակում է այս երկրում միայն ոստիկանական ռեժիմ կա, միայն հսկողության տակ առնված մարդիկ կան»,-ասել է իրավապաշտպանը: