Ձեր վստահելի աղբյուրը

Արագածոտնի մարզում գործում է կրթության ոլորտի 127 պետական ոչ առևտրային կազմակերպություն, այդ թվում` 121 հանրակրթական դպրոց, 3 հատուկ դպրոց, 2 արհեստագործական ուսումնարան և 1 մարզադպրոց: Այս տարվա հունվարի դրությամբ մարզի բոլոր դպրոցներում աշակերտների թիվը կազմում է 20441:

Կոմպլեկտավորվել է 1281 դասարան, որոնցից 118-ը առաջին դասարան է` 1536 աշակերտով: Վերջին տարիներին նկատվում է աշակերտների թվի նվազում, որի հիմնական պատճառները երկուսն են` սոցիալ-դեմոգրաֆիական /հանրապետության սոցիալ տնտեսական իրավիճակով պայմանավորված ծնելիության նվազում/ և արտագաղթ: Այս վիճակագրությունը ներկայացվել է նախօրեին մարզպետարանում կայացած ուսուցիչների ավանդական խորհրդակցության ժամանակ:

Մարզպետարանի կրթության, մշակույթի և սպորտի վարչության պետ Սիրամարգ Ղուկասյանի տվյալներով, դպրոցներից 91-ը միջնակարգ է, 30-ը` հիմնական: Ավագ դպրոցների ռազմավարական ծրագրի իրականացման նպատակով 2008-2009 ուսումնական տարում հանրապետության փորձնական 10 ավագ դպրոցների թվում ընդգրկվել է նաև Աշտարակ քաղաքի Ն. Սիսակյանի անվան թիվ 5 միջնակարգ դպրոցը, որտեղ փորձնական ավագ դպրոցում ընդգրկված է 222 աշակերտ:

2008-2009 ուսումնական տարում այստեղ առաջին դասարան չի կոմպլեկտավորվել: Աշտարակ քաղաքի մյուս կրթօջախներում ավագ դպրոցում սովորող 11-րդ դասարանի 206 աշակերտ հունիս ամսին ավարտեց դպրոցը և այդ դպրոցները ՀՀ կառավարության համապատասխան որոշման համաձայն արդեն վերակազմավորվել են որպես հիմնական դպրոցներ: Թալինի բնագիտամաթեմատիկական հատուկ և Ապարանի թիվ 3 միջնակարգ դպրոցներն էլ վերակազմավորվել են որպես ավագ դպրոցներ: Այսպիսով, մարզի 3 քաղաքներում կա 1-ական ավագ դպրոց:

Դպրոցներից 20-ը ազգային փոքրամասնությունների համար են/ եզդիաբնակ գյուղերում են/ որտեղ կոմպլեկտավորվել է 110 դասարան` 740 աշակերտով:

Գործում են նաև 8 երաժշտական, 5 գեղարվեստի դպրոց և 6 մանկապատանեկան մարզադպրոց (որից 1-ը մարզային ենթակայության է): Ազատ ըմբշամարտի, հունահռոմեական ըմբշամարտի և վոլեյբոլի 22 խմբերում ընդգրկված է 253 սան: Չնայած շենքային վատ պայմանների և սպորտային համապատասխան բազայի բացակայության, մարզպետարանի մանկապատանեկան մարզադպրոցն ունի բարձր ցուցանիշեր թե հանրապետական, և թե միջազգային մակարդակներում:

Նոր ուսումնական տարվա կապակցությամբ շնորհավորելով բոլորին, մարզպետ Սարգիս Սահակյանը մանկավարժներին հորդորեց զերծ մնալ արատավոր երևույթներից, աշխատել մանկավարժին բարոյականությանը հարիր արժանապատվությամբ, նվիրվածությամբ ու սիրով: Ի դեպ, մարզպետն արդեն սեպտեմբերի 1-ի առթիվ շնորհավորական խոսք է հղել մանկավարժներին, դպրոցականներին, ծնողներին: