Ձեր վստահելի աղբյուրը

Հայաստանի նախագահ Սերժ Սարգսյանի հրավերով այսօր կայացած երրորդ թեմատիկ խորհրդակցության ընթացքում, որի ժամանակ կուսակցությունների ղեկավարների հետ քննարկվել են հայ-թուրքական կարգավաորմանը վերաբերող խնդիրները, հանրապետության ղեկավարը խոսել է գործընթացը նախաձեռնելու շարժառիթների մասին:

«Հրավիրելով Թուրքիայի նախագահին Հայաստան և նախաձեռնելով այս ողջ գործընթացը` ես նպատակ եմ հետապնդել բացել երկկողմ հարաբերությունների կարգավորման հնարավորությունների պատուհանը Հայաստանի և Թուրքիայի համար, ցույց տալ, որ Ցեղասպանության արհավիրքով անցած ժողովուրդը, և Հայաստան երկիրը, որ կանգուն է և տեր է իր ժողովրդի ցավին, իրականում բավարար ուժ ունի առաջինը ձեռք մեկնելու և աշխարհի զարգացման ընթացքին հակընդդեմ շարժվելու անիմաստությունը մատնացույց անելու»,- ասել է Սերժ Սարգսյանը:

Միևնույն ժամանակ նա նշել է, որ ծանոթ է խնդրի առնչությամբ հնչած ամենատարբեր կարծիքներին:

«Լսել եմ դրական, խրախուսող կոչեր, լսել եմ քննադատություն, այդ թվում խիստ քննադատություն, լսել եմ նաև մտահոգություններ: Անշուշտ ես էլ եմ տեսնում ռիսկեր, ես էլ ունեմ մտահոգություններ»,- ընդգծել է նախագահն ու նշել, որ այսօրվա խորհրդակցությամբ ցանկանում է բոլոր մտահոգությունները համադրված տեսնել, որպեսզի ռիսկերը ճիշտ գնահատվեն ու հետագա անելիքները հասկանալի դառնան:

Իմի բերելով անցնող երկուսուկես շաբաթների ընթացքում հնչեցված դիտարկումներն ու դիրքորոշումները` նախագահ Սերժ Սարգսյանն ասել է.

«Հասարակական-քաղաքական քննարկումների այս առաջին օրերի ընթացքում ես դեռ չեմ լսել ընդդեմ սահմանների բացմանն արտահայտվող որևէ քաղաքական ուժի կարծիք, միգուցե այսօր հնչեն, չգիտեմ, բայց, համոզված եմ, որ նման դիրքորոշումը քաղաքական դաշտում, համենայն դեպս, տիրապետող չէ: Չկան կամ քիչ են նաև Թուրքիայի հետ դիվանագիտական հարաբերությունների հաստատմանը դեմ դիրքորոշումները: Եվ եթե մեր տրամաբանական ճանապարհը մենք սկսում ենք այս ելակետերից, ապա պետք է կարողանանք հասկանալ որտե՞ղ ենք, ի՞նչ ունենք և ու՞ր ենք գնում»:

Նախագահի ելույթից հետո արդեն փակ դռների հետևում կուսակցությունների ղեկավարներն իրենց մոտեցումներն են ներկայացրել նախագահի առաջ քաշած հարցադրումների վերաբերյալ: